Ang Papel ni Maria sa Katuyoan sa Diyos

PANAHON sa ministeryo ni Jesus, dihay babaye taliwala sa panon nga misinggit: “Malipayon ang tagoangkan nga nagsabak kanimo ug ang mga suso nga imong gisusohan!” Kon gusto ni Jesus nga simbahon sa mga tawo ang iyang inahan, higayon na unta niya kadto. Apan, siya mitubag: “Dili, hinuon, Malipayon kadtong nagapatalinghog sa pulong sa Diyos ug nagsunod niini!”—Lucas 11:27, 28.

Si Jesus wala maghatag ug talagsaong pasidungog sa iyang inahan; wala usab niya sugoa ang iyang mga sumusunod sa pagbuhat niana. Kon mao, nganong gisimba si Maria sa daghang sinserong mga tawo? Atong susihon kon unsay giingon sa Bibliya maylabot sa pagtuo sa daghang tawo bahin sa inahan ni Jesus.

‘Puno sa Grasya,’ ‘Bulahan sa mga Babayeng Tanan’

Ang anghel nga si Gabriel misulti kang Maria kon unsay iyang papel sa katuyoan sa Diyos. Nianang higayona, ang anghel mitimbaya kaniya nga nag-ingon: “Maayong adlaw, usa nga pinaboran kaayo, si Jehova nagauban kanimo.” (Lucas 1:28) Ang laing hubad niana nagkanayon: “Paglipay, kay puno ka sa grasya; naa nimo ang Ginoo.” Wala madugay human niana, gitimbaya usab ni Elisabet si Maria nga nag-ingon: “Bulahan ka sa mga babayeng tanan, ug bulahan ang bunga sa imong tiyan!” (Lucas 1:42, Biblia sa Kristohanong Katilingban) Dili ba nga kining mga tekstoha nagpakita nga angay gayong simbahon si Maria?

Sa pagkatinuod, ang tubag maoy dili. Ang mga Katoliko naggamit niining mga pulonga  sa dihang mag-ampo sila kang Maria, apan ang Bibliya wala magsugo nga mag-ampo kaniya. Giila ni anghel Gabriel ug ni Elisabet ang dakong pribilehiyo ni Maria ingong inahan sa Mesiyas, apan dili mabasa diha sa Bibliya nga kita mag-ampo kaniya. Sa kasukwahi, sa dihang mihangyo ang mga tinun-an kang Jesus nga tudloan sila sa pag-ampo, iyang gipakita nga ang pag-ampo angayng itumong ngadto sa Amahan. Gani, ang ilado ug sulondang pag-ampo ni Jesus gisugdan sa mga pulong: “Amahan namo nga anaa sa mga langit.”—Mateo 6:9.

Usa sa mga Magmamando

Ang lain pang komon nga pagtulon-an mao nga si Maria usa na ka “Rayna sa Langit.” Ang Bibliya wala gayod magtawag kaniya nianang tituloha. Apan ang Bibliya nagpakita nga siya dunay talagsaong pribilehiyo sa kahikayan sa Diyos sa langit. Unsa kana?

Si Jesus nagtudlo nga ang pipila sa iyang matinumanong mga alagad magmando uban kaniya sa iyang Gingharian. (Lucas 22:28-30) Si Jesus maghatag ug awtoridad sa mga pinili aron mag-alagad ingong “mga saserdote ngadto sa atong Diyos, ug sila magamando ingong mga hari ibabaw sa yuta.” (Pinadayag 5:10) Sumala sa mga ebidensiya diha sa Bibliya, atong masabtan nga si Maria nahilakip niadtong gihatagan niining hataas nga pribilehiyo. Nganong makasulti kita niini?

Lagmit mahinumdom ka nga human sa kamatayon ni Jesus, si Maria “nagpadayon sa pag-ampo” uban sa mga tinun-an ug mga igsoon ni Jesus. Mga 120 sila nga nagtigom, nga naglakip sa “pipila ka babaye.” (Buhat 1:12-15) Samtang ang “pista sa Pentekostes nagapadayon,” matod pa sa Bibliya, “silang tanan nagkatigom sa samang dapit” sa dihang ang balaang espiritu sa Diyos gibubo kanila, nga naghatag kanilag katakos sa pagsultig langyawng mga pinulongan.—Buhat 2:1-4.

Tungod kay nahilakip si Maria niadtong gihatagan sa maong panalangin, kini nagpakita nga siya ug ang ubang mga babaye nga gibuboan ug balaang espiritu gipili aron maghari kauban ni Jesus sa iyang langitnong Gingharian. Pamatuod kini nga si Maria kauban na karon ni Jesus didto sa langit. (Roma 8:14-17) Tagda ang pipila sa pribilehiyo nga iyang nabatonan sa pagtuman sa katuyoan sa Diyos kauban ang ubang mga hari.

Pagtagana sa Kahibulongang mga Panalangin

Ang basahon sa Bibliya nga Pinadayag nag-ingon nga dunay 144,000 ka tawo nga buhion pag-usab ug dad-on sa langit aron mag-alagad kauban ni Jesus ingong mga saserdote, maghuhukom, ug mga hari. (Pinadayag 14:1, 4; 20:4, 6) Ingong mga saserdote, sila makigbahin sa pagtagana sa benepisyo sa halad ni Jesus ngadto sa tanang matinumanong mga tawo aron sila mamahingpit sa espirituwal, moral, ug pisikal. (Pinadayag 21:1-4) Pagkadakong pribilehiyo alang sa tanang maunongong magsisimba ni Jehova nga makasaksi unya nianang makalilipayng panahon! a

Si Maria adunay papel, kaniadto ug karon, sa katumanan sa katuyoan ni Jehova. Siya angay gayong sundogon tungod sa iyang pagkamapaubsanon, pagtuo, pagkamasinugtanon, pagkamaayong inahan, ug sa iyang pagkamainantoson ubos sa pagsulay. Angay usab siyang hatagag dakong pagtahod tungod sa iyang papel sa pagpakatawo sa Mesiyas ug sa pagtagana sa dumalayong mga panalangin alang sa katawhan.

Apan ang labing hinungdanong leksiyon nga atong nakat-onan kang Maria mao nga siya, ug ang ubang matinumanong mga alagad sa Diyos, nag-alagad lamang kang Jehova ug dili sa ubang diyos. Si Maria, ug ang tanang magmamando nga kauban ni Jesus sa langit, nagdayeg sa Diyos nga nag-ingon: “Ngadto sa Usa nga nagalingkod sa trono ug ngadto sa Kordero ang pagdayeg ug ang dungog ug ang himaya ug ang gahom hangtod sa kahangtoran.”—Pinadayag 5:13; 19:10.

[Footnote]

[Blurb sa panid 10]

Angay gayong sundogon ang pagkamapaubsanon, pagtuo, ug pagkamasinugtanon ni Maria