Mahadlok Ka bag Patay?

DAGHANG tawo motubag, “Dili. Nganong mahadlok man ko?” Sila nagtuo nga ang patay, patay na gyod. Apan milyonmilyon ang nagtuo nga ang mga patay buhi pa gihapon ingong mga espiritu.

Sa Benin, Kasadpang Aprika, daghan ang nagtuo nga ang patay mobalik aron patyon ang ubang membro sa iyang pamilya. Busa ibaligya sa mga tawo ang ilang mga kabtangan, o kaha mangutang aron makapalit ug mga mananap nga ilang ihalad aron malukmay ang ilang patay na nga mga paryente. Ang uban nalangkit sa mga buhat sa espiritismo, kay sila naghunahuna nga dunay espiritu nga mogawas sa lawas inigkamatay sa tawo ug makahimo sa pagkontak sa mga buhi. Ang uban usab nakasugamak ug makahahadlok nga mga kasinatian kay abi nilag nagmulto ang mga patay.

Usa kanila mao si Agboola, ang lalaki nga nagpuyo duol sa utlanan sa Benin ug Nigeria. Siya miingon: “Ang mga tawo sa among dapit nalangkit sa mga buhat sa espiritismo. Ilang ligoon ang mga patayng lawas ingong seremonyas aron andamon sila padulong sa laing kalibotan. Kasagaran akong kuhaon ang sobrang sabon ug sagolan kinig mga dahondahon. Dayon ihaplas ko kini sa akong riple nga akong gigamit sa pagpangayam, ug akong isinggit kon unsang mananapa ang gusto nakong makuha. Komon kaayo kining paagiha ug daw epektibo. Apan, makahahadlok ang ubang paagi sa espiritismo.

“Sa dihang duha sa akong mga anak nga lalaki namatay nga wala mahibal-i ang hinungdan, nagduda ko nga sila gibarang. Mao nga akong giadto ang iladong espiritista aron akong maseguro kini. Tinuod kono ang akong pagduda. Ang nakadaot pa gyod kay matod pa niya nga ang akong mga anak naghulat kono didto sa laing kalibotan aron mahimong ulipon sa tawo nga nagpatay kanila inigkamatay sa maong tawo. Ug siya miingon pa gyod nga mamatay usab ang akong ikatulong anak nga lalaki. Pipila ka adlaw human niana, namatay gayod ang akong anak.”

Wala madugay gikaila ni Agboola si John, usa sa mga Saksi ni Jehova nga taga-Nigeria. Gipatin-aw ni John sumala sa Bibliya ang tinuod nga kahimtang sa mga patay. Nabag-o niini ang kinabuhi ni Agboola. Mabag-o usab niini ang imong kinabuhi.

Buhi ba ang mga Patay?

Kinsa gayoy makatubag niining pangutanaha? Walay tawong makatubag niana, bisan ang gibantog nga espiritista. Si Jehova lamang ang makatubag niana, ang Maglalalang sa kinabuhi ‘sa langit ug sa yuta, sa mga butang nga makita ug sa mga butang nga dili-makita.’ (Colosas 1:16) Siyay naglalang sa mga anghel nga nagpuyo sa langit, ug sa mga tawo ug mga mananap nga nagpuyo sa yuta. Ang tanang kinabuhi nagdepende Kaniya. (Pinadayag 4:11) Busa, matikdi ang gisulti sa Bibliya bahin sa kamatayon.

Si Jehova ang unang naghisgot bahin sa kamatayon. Iyang gipasidan-an si Adan ug Eva nga sila mamatay kon sila dili motuman kaniya. (Genesis 2:17) Unsay ipasabot niana? Si Jehova miingon nga kay siya abog, sa abog siya mopauli. (Genesis 3:19) Sa kamatayon, ang lawas madugta; kini mobalik sa abog ug wala nay kinabuhi.

Si Adan ug Eva kinabubut-ong misupak, busa sila gihukman ug kamatayon. Apan ang ilang anak nga si Abel nauna pa nilag kamatay. Gipatay siya sa iyang magulang nga si Cain. (Genesis 4:8) Si Cain wala mahadlok nga panimaslan sa iyang gipatay nga igsoon. Ang iyang gikahadlokan nga basig panimaslan siya sa mga buhi.—Genesis 4:10-16.

Daghang katuigan sa ulahi, si Haring Herodes  nasuko sa dihang siya gipahibalo sa mga tawong nagtuon bahin sa mga bituon, o mga astrologo, nga may “hari sa mga Hudiyo” nga natawo sa iyang gingharian. Sa iyang paningkamot nga mahanaw ang gihunahuna niyang karibal sa pagkahari, siya nagplano sa pagpatay sa tanang batang lalaki sa Betlehem nga nagpangedarog dos anyos paubos. Apan ang usa ka anghel nagsugo kang Jose nga dad-on si Jesus ug Maria ug ‘mokalagiw ngadto sa Ehipto.’—Mateo 2:1-16.

Sa dihang patay na si Herodes, si Jose giingnan sa anghel nga mobalik na sa Israel kay kadtong buot mopatay sa bata nangamatay na. (Mateo 2:19, 20) Ang anghel, nga usa usab ka espiritu, nahibalo nga si Herodes dili na makadaot kang Jesus. Dili angayng mahadlok si Jose sa patay nang si Haring Herodes. Apan ang gikahadlokan ni Jose mao si Arquelao, ang mabangis nga anak ni Herodes. Busa gipapuyo ni Jose ang iyang pamilya sa Galilea, nga dili na sakop ni Arquelao.—Mateo 2:22.

Kini nga asoy motabang kanato sa pagsabot nga ang mga patay wala nay mahimo. Kon mao, unsaon man nato pagpatin-aw ang nahitabo kang Agboola ug sa uban pang mga tawo?

“Mga Demonyo,” o Daotang mga Espiritu

Sa dako na si Jesus, nakabagat sab siyag daotang mga espiritu. Ilang nailhan si Jesus ug gitawag nila siya nga “Anak sa Diyos.” Si Jesus nakaila usab kanila. Dili sila multo sa mga patay, kondili “mga demonyo.”—Mateo 8:29-31; 10:8; Marcos 5:8.

Ang Bibliya naghisgot bahin sa mga espiritu nga maunongon sa Diyos ug niadtong mirebelde kaniya. Ang basahon sa Genesis nag-ingon nga sa dihang gipapahawa ni Jehova ang di-masinugtanon nga si Adan ug Eva gikan sa tanaman sa Eden, iyang gipabantayan kinig mga kerubin, o mga anghel, sa silangan sa tanaman aron walay makasulod niini. (Genesis 3:24) Lagmit mao kadtoy unang higayon nga ang mga espiritu nakita sa mga tawo.

Sa ulahi, daghan pang mga anghel ang nanganaog sa yuta ug nagsul-ob ug lawas sa mga tawo. Si Jehova wala magsugo kanila. Kondili silay “mitalikod sa ilang nahiangay nga puloy-anang dapit” sa langit. (Judas 6) Hinakog ang ilang motibo. Nangasawa sila, ug nakabatog mestisong mga anak nga gitawag ug Nepilim. Ang mga Nepilim ug ang ilang rebelyosong mga amahan nagpuno sa yuta ug kapintasan ug grabeng pagkadaotan. (Genesis 6:1-5) Gitul-id ni Jehova ang kahimtang ug iyang gipalunopan ang tibuok yuta sa mga adlaw ni Noe. Nangalumos ang daotang mga tawo lakip na ang mga Nepilim. Unsay nahitabo sa mga anghel?

Napugos sila pagbalik sa langit. Apan wala na sila tugti ni Jehova nga makabalik sa “ilang orihinal nga pagkabutang.” (Judas 6) Ang Bibliya nag-ingon: “Ang Diyos wala magpugong sa pagsilot sa mga [anghel] nga nakasala, apan, pinaagi sa pagtambog kanila sa Tartaro, nagtambog kanila ngadto sa mga gahong sa naglugitom nga kangitngit aron itagana sa paghukom.”—2 Pedro 2:4.

Walay lugar nga gitawag ug Tartaro. Kini nagtumong sa kahimtang sa mga anghel nga samag gibilanggo, gipaubos nga gilimitehan sa ilang kalihokan ingon nga mga sinalikway. Ang mga demonyo dili na makasul-ob ug lawas sa tawo, apan sila duna pay dakong gahom sa pag-impluwensiya sa hunahuna ug kinabuhi sa mga tawo. Makahimo usab sila sa pagkontrolar sa mga tawo ug mga hayop. (Mateo 12:43-45; Lucas 8:27-33) Gilimbongan usab nila ang mga tawo pinaagi sa  pagpakaaron-ingnon nga espiritu sa mga patay. Ngano? Aron mapugngan ang mga tawo sa pagsimba kang Jehova sa hustong paagi, ug aron sila malibog bahin sa tinuod nga kahimtang sa mga patay.

Kon Unsaon Pagbuntog ang Kahadlok

Nakombinsir si Agboola nga tinuod ang gisulti sa Bibliya bahin sa kamatayon ug kon unsa gayod ang mga espiritu. Nasabtan usab niya nga kinahanglang mokat-on pa siyag dugang. Iyang gibasa ang Bibliya ug ang mga basahon nga gipasukad sa Bibliya uban kang John. Nahupayan gayod siya sa pagkahibalo nga ang iyang mga anak sama rag natulog sa lubnganan, ug wala maghulat didto sa laing kalibotan aron himoong ulipon sa nagpatay kanila.—Juan 11:11-13.

Nasabtan usab niya nga kinahanglang hunongon na niya sa bug-os ang iyang mga buhat sa espiritismo. Iyang gisunog ang tanan niyang galamiton sa espiritismo. (Buhat 19:19) Gipasidan-an siya sa pipila ka tawo sa ilang lugar nga basig daoton siya sa mga espiritu. Apan wala mahadlok si Agboola. Gisunod niya ang tambag sa Efeso 6:11, 12: “Isul-ob ang kompletong armadura gikan sa Diyos . . . tungod kay kita adunay pakigdumog . . . batok sa daotang mga puwersa nga espirituhanon.” Kining espirituwal nga armadura naglakip sa kamatuoran, pagkamatarong, maayong balita sa kalinaw, pagtuo, ug espada sa espiritu nga mao ang Pulong sa Diyos. Ang maong armadura gikan sa Diyos ug kini gamhanan!

Si Agboola gisalikway sa pipila niya ka higala ug mga paryente sa dihang siya mihunong sa ilang naandang mga buhat sa espiritismo. Apan sa Kingdom Hall sa mga Saksi ni Jehova, siya nakakaplag ug bag-ong mga higala nga nagtuo sa gitudlo sa Bibliya.

Karon siya nahibalo nga sa di madugay, si Jehova maghanaw na sa pagkadaotan dinhi sa yuta ug magpahunong sa tanang kalihokan sa mga demonyo. Sa ngadtongadto, ang Diyos magtapos kanila. (Pinadayag 20:1, 2, 10) Ug iyang buhion pag-usab dinhi sa yuta “ang tanan nga anaa sa handomanang mga lubnganan.” (Juan 5:28, 29) Mahilakip kanila si Abel, ug ang inosenteng mga bata nga gipapatay ni Haring Herodes, ug ang milyonmilyon pang mga tawo. Si Agboola nagtuo nga ang iyang tulo ka anak nga lalaki mabuhi usab uban kanila. Ang imong patay nang mga minahal mahimong mabuhi pag-usab. Sa dihang mabuhi na silang tanan, sila makapamatuod gayod nga gikan sa ilang pagkamatay hangtod sa ilang pagkabuhi pag-usab, sila walay nahibaloang bisan unsa, bisan sa mga seremonya nga gipahinungod kanila.

Ikaw dili gayod angayng mahadlok sa mga patay. Hinunoa, ikauban ra unya nimo sila sa dihang sila mabuhi pag-usab. Sa kasamtangan, nganong dili nimo sulayan ang pagtuon sa Bibliya aron molig-on ang imong pagtuo? Pakig-uban sa mga tawong nagtuo kon unsay tinuod nga gitudlo sa Bibliya. Kon ikaw nalangkit bisan sa ginagmay nga mga buhat sa espiritismo, hunonga dayon kana. Panalipdi ang imong kaugalingon batok sa mga demonyo pinaagi sa pagsul-ob sa “kompletong armadura gikan sa Diyos.” (Efeso 6:11) Ang mga Saksi ni Jehova malipay sa pagtabang kanimo. Sila nagtanyag ug walay bayad nga pagtuon sa Bibliya ginamit ang librong Unsay Tinuod nga Gitudlo sa Bibliya? a

Si Agboola dili na mahadlok ug patay, ug siya usab nakakat-on na sa pagsukol sa mga demonyo. Siya miingon: “Ambot kon kinsay nagpatay sa akong tulo ka anak nga lalaki. Apan sukad nga ako nag-alagad kang Jehova, nakabaton kog pito pa ka anak. Wala sila hilabti sa daotang mga espiritu.”

[Footnote]

[Blurb sa panid 13]

Si Agboola dili na mahadlok ug patay, ug siya usab nakakat-on na sa pagsukol sa mga demonyo

[Hulagway sa panid 12]

Si Cain wala mahadlok nga manimalos kaniya ang iyang patayng igsoon