Kon Unsay Atong Makat-onan Kang Jesus

Bahin sa mga Pag-ampo nga Dunggon sa Diyos

Si Jesus kanunayng mangita ug mingawng dapit aron makaampo. Gidasig usab niya ang iyang mga sumusunod sa paghimo niana. Ang Bibliya nag-ingon: “Sa higayon nga didto siya sa usa ka dapit nga nag-ampo, sa paghunong niya, usa sa iyang mga tinun-an miingon kaniya: ‘Ginoo, tudloi kami kon unsaon sa pag-ampo’ . . . Siya miingon kanila: ‘Sa dihang mag-ampo kamo, ingnon ninyo, “Amahan, balaana ang imong ngalan.”’” (Lucas 5:16; 11:1, 2) Busa, gipakita ni Jesus nga kita angay lamang moampo sa iyang Amahan, si Jehova. Siya lamang ang atong Maglalalang ug ang “Tigpatalinghog sa pag-ampo.”—Salmo 65:2.

Dunggon ba sa Diyos ang tanang pag-ampo?

Ang sinag-ulo ug balikbalik nga pag-ampo dili gayod dunggon sa Diyos. Si Jesus miingon: “Sa dihang mag-ampo, ayaw balikbalika pagsulti ang samang mga butang.” (Mateo 6:7) Kinahanglang kinasingkasing kitang makigsulti sa atong langitnong Amahan. Kas-a, si Jesus miingon sa iyang mga sumusunod nga ang pag-ampo sa usa ka mahinulsolong makasasala maoy labawng gipabilhan sa Diyos, kay sa pag-ampo sa usa ka hambogirong tawo nga nagsunod pag-ayo sa mga tradisyon sa iyang relihiyon. (Lucas 18:10-14) Busa, aron dunggon sa Diyos ang atong mga pag-ampo, angay kitang mapainubsanon nga mobuhat sa kon unsay giingon sa Diyos. Gani si Jesus miingon: “Sumala sa gitudlo kanako sa Amahan gisulti ko kining mga butanga . . . Ginabuhat ko kanunay ang mga butang nga makapahimuot kaniya.” (Juan 8:28, 29) Si Jesus miampo: “Matuman unta dili ang akong kabubut-on, kondili ang imoha.”—Lucas 22:42.

 Unsay angay natong iampo?

Sanglit gipasipalahan ang ngalan sa Diyos, si Jesus miingon: “Mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.’” (Mateo 6:9, 10) Busa, angay natong iampo nga moabot ang Gingharian sa Diyos tungod kay mao kana ang kagamhanan nga gamiton sa Diyos sa pagtuman sa iyang kabubut-on sa langit, maingon man usab sa yuta. Si Jesus miingon nga kita makaampo alang sa atong pagkaon sa matag adlaw. Makahangyo usab kita bahin sa panarbaho, puy-anan, pamesti, kahimsog, ug uban pa. Dugang pa, si Jesus miingon nga angay kitang mag-ampo alang sa kapasayloan sa atong mga sala.—Lucas 11:3, 4.

Angay ba natong iampo ang uban?

Si Jesus miampo alang sa uban. Ang Bibliya nag-ingon: “Ang mga bata gidala kaniya, aron iyang ikatapion ang iyang mga kamot diha kanila ug makaampo.” (Mateo 19:13) Si Jesus miingon kang apostol Pedro: “Nangamuyo ako alang kanimo nga unta ang imong pagtuo dili moangka.” (Lucas 22:32) Gidasig ni Jesus ang iyang mga sumusunod sa pag-ampo alang sa uban, bisan niadtong naglutos ug nag-insulto kanila.—Mateo 5:44; Lucas 6:28.

Nganong angay kitang mag-ampo nga makanunayon?

Si Jesus naggahin ug panahon aron makaampo, ug iyang gidasig ang iyang mga sumusunod nga “mag-ampo kanunay ug dili moundang.” (Lucas 18:1) Gidapit kita ni Jehova nga mosalig kaniya pinaagi sa mapinadayonon nga pag-ampo sa atong mga gikabalak-an. “Padayon sa pagpangayo, ug kini igahatag kaninyo,” miingon si Jesus. Apan wala kini magpasabot nga si Jehova dili gustong motubag sa mga pag-ampo niadtong nahigugma ug nagtahod kaniya ingong Amahan. Hinunoa, si Jesus miingon: “Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!”—Lucas 11:5-13.

Alang sa dugang impormasyon, tan-awa ang kapitulo 17 sa librong Unsay Tinuod nga Gitudlo sa Bibliya? a

[Footnote]