Giuyonan ba sa Diyos ang Tanang Relihiyon?

Kasagarang tubag:

▪ “Ang tanang relihiyon padulong sa Diyos.”

▪ “Dili importante kon unsay imong relihiyon, ang importante sinsero ka.”

Unsay tubag ni Jesus?

▪ “Sulod kamo agi sa sigpit nga ganghaan; tungod kay halapad ug haluag ang dalan padulong sa kalaglagan, ug daghan ang mga nagasulod agi niini; samtang sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.” (Mateo 7:13, 14) Si Jesus wala magtudlo nga ang tanang relihiyon padulong sa Diyos.

▪ “Daghan ang moingon kanako nianang adlawa, ‘Ginoo, Ginoo, wala ba kami managna sa imong ngalan, ug naghingilin sa mga demonyo sa imong ngalan, ug naghimog daghang gamhanang mga buhat sa imong ngalan?’ Ug unya ako magaingon kanila: Wala gayod ako makaila kaninyo! Pahilayo gikan kanako, kamong mga mamumuhat sa kalapasan.” (Mateo 7:22, 23) Wala ilha ni Jesus ang tanang nangangkon nga nagsunod kaniya.

DAGHANG tawo ang debotado gayod sa ilang tinuohan ug mga tradisyon. Apan komosta man kon kini nga mga pagtulon-an dili subay sa gitudlo sa Bibliya? Gipakita ni Jesus nga peligroso ang pagsunod sa hinimog-tawo nga mga tradisyon sa dihang siya miingon ngadto sa mga lider sa relihiyon sa iyang adlaw: “Gihimo ninyo nga walay pulos ang pulong sa Diyos tungod sa inyong tradisyon.” Dayon iyang gikutlo kining mga pulonga gikan sa Kasulatan: “Kining mga tawhana nagpasidungog kanako pinaagi sa ilang mga ngabil, apan ang ilang kasingkasing halayo kaayo kanako. Kawang lamang nga sila nagpadayon sa pagsimba kanako, tungod kay sila nagtudlo sa mga sugo sa mga tawo ingon nga mga doktrina.”—Mateo 15:1-9; Isaias 29:13.

Dili lang tinuohan sa usa ka tawo ang hinungdanon, kondili ang iyang panggawi usab. Ang Bibliya nag-ingon maylabot niadtong nangangkon nga nagsimba sa Diyos: “Sila nagpahayag sa dayag nga sila nakaila sa Diyos, apan sila naglimod kaniya pinaagi sa ilang mga buhat.” (Tito 1:16) Maylabot sa mga tawo sa atong panahon, ang Bibliya nag-ingon: “Inay higugmaon ang Diyos, ilang higugmaon ang kahilayan. Bisan tuod ipakita nila nga sila relihiyoso, ang ilang pagsimba bakak. Ayaw pagpakig-uban kanila.”—2 Timoteo 3:4, 5, Contemporary English Version.

Kinahanglan gayod ang pagkasinsero, apan dili kay kana ra. Ngano? Tungod kay bisag sinsero ang usa, basin sayop ang iyang gituohan. Busa hinungdanon gayod ang tukma o matuod nga kahibalo bahin sa Diyos. (Roma 10:2, 3) Ang pagbaton niini nga kahibalo ug ang pagbuhat sa gisulti sa Bibliya gikinahanglan aron uyonan kita sa Diyos. (Mateo 7:21) Busa, ang matuod nga relihiyon naglangkit sa pagbaton ug hustong motibo, hustong tinuohan, ug hustong panggawi. Ug ang hustong panggawi nagkahulogag adlaw-adlaw nga pagbuhat sa kabubut-on sa Diyos!—1 Juan 2:17.

Kon gusto ka nga mahibalo ug dugang sa kon unsay gitudlo sa Bibliya bahin sa Diyos, kontaka ang mga Saksi ni Jehova alang sa libreng pagtuon sa Bibliya.

[Blurb sa panid 9]

Ang matuod nga relihiyon naglangkit sa pagbaton ug hustong motibo, hustong tinuohan, ug hustong panggawi