Mga Biktima sa Bagyo sa Myanmar Gitabangan

NIADTONG Mayo 2, 2008, ang kusog kaayong Bagyong Nargis mihapak sa Myanmar, ug kini nabalita dayon sa tibuok kalibotan. Duolag 140,000 ka tawo ang gikataho nga namatay o nawala tungod sa dagkong mga balod nga mihapak sa rehiyon sa Irrawaddy Delta.

Katingalahan kaayo nga walay bisan usa sa mga Saksi ni Jehova sa maong dapit ang namatay. Sila naluwas tungod kay panahon sa bagyo, sila midangop sa ilang lig-ong pagkatukod nga mga Kingdom Hall. Sa usa ka dapit, 20 ka Saksi ug 80 nga dili mga Saksi ang mitungtong sa atop sa Kingdom Hall sulod sa siyam ka oras tungod kay misaka ang tubig ug singko metros. Silang tanan naluwas. Ikasubo, 300 ka tawo sa maong dapit ang namatay. Sa daghang lugar, ang Kingdom Hall mao ray tinukod nga nagpabiling nagbarog.

Duha ka adlaw human sa bagyo, ang opisina sa mga Saksi ni Jehova sa Yangon nagpadalag grupo nga nagdalag hinabang sa kongregasyon sa Bothingone nga nahimutang sa Irrawaddy Delta. Sila mibiyahe agi sa mga lugar nga grabeng naapektohan, diin nagpasad ang nagakadugta nga mga patayng lawas. Samtang nagbiyahe, sila nag-amping nga dili mabiktima sa mga tulisan hangtod nga nakaabot sila sa Bothingone dala ang suplay sa bugas, noodles, tubig, ug mga kandila. Sila ang unang grupo nga nagdalag hinabang sa maong lugar. Human mahatag ang mga hinabang ngadto sa mga Saksi sa maong dapit, ang grupo naghatag ug pakigpulong nga gipasukad sa Bibliya ug nagbilin usab silag mga Bibliya ug binase-sa-Bibliya nga mga basahon tungod kay nangaanod ang tanang butang sa mga Saksi didto.

Dalayegon kaayo ang tinamdan sa mga Saksi nga naapektohan sa bagyo. Usa kanila nga gikan sa usa ka kongregasyon sa rehiyon sa Irrawaddy nga grabeng naa pektohan miingon: “Nawad-an mi sa tanan namong kabtangan. Ang among mga balay nangaguba. Ang among mga tanom nangadaot. Walay hinlong tubig nga mainom tungod sa baha. Apan, ang mga igsoon wala ra kaayo mabalaka, dili sama sa uban. Sila misalig kang Jehova ug sa iyang organisasyon. Mosunod kami sa instruksiyon nga among madawat, kon kami ba magpabilin o mobakwet.”

Diha usay 30 ka Saksi, nga bisag nawad-an sa ilang kabtangan, malipayon gihapong nanganta ug mga alawiton sa Gingharian samtang nagpanaw sulod sa napulo ka oras paingon sa dapit diin atua ang grupo nga nagtagana ug pagkaon, sinina, ug kapuy-an. Sa wala pa sila makaabot sa maong dapit, sila nakabalita nga dunay sirkitong asembliya sa kasikbit nga lungsod. Busa mitambong una sila aron madasig sa mga pakigpulong nga binase sa Bibliya ug aron makapakig-uban usab sa ubang mga Saksi didto.

Sa katibuk-an, 35 ka balay sa mga Saksi ang naguba, ug 125 ka balay ug 8 ka Kingdom Hall ang nakaagom ug gamayng kadaot. Ikalipay, ang opisina sa mga Saksi wala ra kaayo maapektohi.

Sa primero, walay makasulod-gawas sa opisina sa mga Saksi tungod sa mga kahoyng nangatumba nga nagbabag sa karsada. Paglabay sa pipila ka oras, kapin sa 30 ka Saksi nga nagtrabaho sa maong opisina ang mitabang sa paghawan sa karsada. Nakadayeg ang mga tawo nga nakakita sa ilang gibuhat. Pagkataudtaod, dihay nangabot nga mga babayeng Saksi nga nagdalag mga prutas ug bugnawng mainom alang sa mga nagtrabaho ug maingon man usab sa mga silingan, kinsa nakadayeg sa ilang nakita. Sa dihang nakita sa usa ka reporter ang ilang gihimo, siya nangutana, “Kinsa kining mga tawhana nga kugihan kaayo?” Pagkahibalo niya kon kinsa sila, siya miingon, “Unta mas daghan pang mga tawo ang matinabangon sa komunidad sama sa mga Saksi ni Jehova!”

Ang mga Saksi nag-organisar dayon ug duha ka komite nga maoy magdumala sa pagpanghatag ug hinabang sa mga Saksi sa apektadong mga lugar. Daghan kaayong mga Saksi ang miboluntaryo sa maong buluhaton. Sulod sa pipila ka adlaw, natukoran dayog balay ang mga Saksi nga nawad-ag mga pinuy-anan. Sa dihang miabot ang usa ka grupo aron tukorag balay ang usa ka Saksi, nahingangha pag-ayo ang iyang mga silingan. Ang usa kanila miingon: “Kining babaye nga Saksi gitukoran ug balay sa mga kaubanan niya sa simbahan. Apan ang akong mga higala nga Budhista wala gayod motabang kanako. Maayo pag nag-Saksi na lang ko sa dihang iya kong gisangyawan!”

Sa dihang gisusi sa mga magtutukod ug sa komite ang usa ka balay sa Thanlyn nga nadaot pag-ayo, sila natandog sa giingon sa pamilyang Saksi nga tag-iya sa balay: “Okey ra. Maayom-ayom pa ning among balay. Kapuy-an pa ni namo—wala ray problema! Ang ubang mga Saksi wala gayoy kapuy-an. Palihog tabangi sila!”

Sa usa ka lugar sa Yangon, dihay mga tawo nga modangop unta sa usa ka simbahan sa ilang dapit. Apan, gisirad-an ang pultahan niini ug wala gayoy makasulod. Daghan ang nasuko ug gusto nilang gub-on ang pultahan. Sa laing bahin, daghang tawo ang gipasulod sa mga Saksi ni Jehova sa ilang Kingdom Hall panahon sa bagyo. Pananglitan, sa Kingdom Hall sa lungsod sa Dala, gipasulod sa usa ka magtiayong Saksi ang 20 niya ka silingan nga midangop didto. Pagkabuntag, kining mga tawhana wala nay balay nga kaulian, ug sila gipanggutom na. Busa, ang bana mipalit ug bugas aron makakaon sila.

Dihay usa ka pamilya sa Yangon nga ang ubang membro maoy mga Saksi ni Jehova, ug ang uban lahig relihiyon. Apan, human sa bagyo, ang tibuok pamilya nanambong na sa Kingdom Hall. Ngano? Ang usa ka membro sa pamilya misaysay: “Ang among mga kauban sa simbahan miingon nga sila mobisita kanamo human sa bagyo, apan wala gayod sila  mangadto. Ang mga Saksi lamang ang miduaw. Inyo kaming gihatagag bugas ug tubig. Lahi kamo sa ubang relihiyon!” Ang dili-Saksi nga mga membro sa pamilya nainteres pag-ayo sa pagtuon sa artikulo sa Ang Bantayanang Torre nga “Dunggon ni Jehova ang Atong mga Pagtuaw Alang sa Tabang,” ug gani mikomento sila panahon sa pagtuon.

Usa ka semana human sa bagyo, ang usa ka babaye nga nagtuon sa Bibliya uban sa mga Saksi mitambong sa Kingdom Hall. Panahon sa tigom, gibasa ang usa ka sulat gikan sa opisina sa mga Saksi ni Jehova nga naghisgot kon unsay nahimo aron matabangan ang mga biktima, maingon man sa mga kasinatian niadtong mga naluwas sa bagyo. Samtang gibasa ang sulat, nakahilak ang maong babaye. Nakadayeg gayod siya sa ilang gihimo ug nalipay usab sa pagkahibalo nga luwas ra ang tanang Saksi. Pagkahuman sa tigom, siya gihatagag pipila sa iyang mga kinahanglanon ug gitaorag tolda duol sa iyang balay. Siya miingon nga ang mga Saksi nag-atiman gayod kaniya.

Si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Ang disipulo nga si Santiago naghisgot usab nga ang tinuod nga pagtuo sa Diyos inubanag maayong mga buhat. (Santiago 2:14-17) Ang mga Saksi ni Jehova nagsunod gayod niana ug naningkamot sa pagpakitag gugma pinaagi sa pagtabang sa mga nanginahanglan.

[Blurb sa panid 11]

Ang Bibliya nag-ingon nga ang tinuod nga pagtuo sa Diyos inubanag maayong mga buhat