Pagpuasa—Kini ba Makapasuod Nimo sa Diyos?

‘Ang pagpuasa makatabang kanimo sa pagpamalandong bahin sa imong relasyon sa Diyos ug magpahinumdom kanimo nga ang materyal nga mga butang dili ang labing hinungdanon sa kinabuhi.’—USA KA KATOLIKONG BABAYE.

‘Ang pagpuasa makatabang nimo sa pagbatog relasyon sa Diyos.’—USA KA HUDIYONG RABBI.

‘Sa akong relihiyon, ang pagpuasa usa ka obligasyon, usa ka balaod nga sundon aron ipakita ang akong debosyon ug pagpasalamat sa Diyos. Magpuasa ko tungod kay gihigugma ko ang Diyos.’—USA KA SUMUSUNOD SA BAHA’I NGA RELIHIYON.

ANG pagpuasa maoy kasagarang batasan sa kadaghanang relihiyon sa kalibotan, lakip na sa Budhismo, Hinduismo, Islam, Jainismo, ug Hudaismo. Daghang tawo nagtuo nga ang paglikay sa pagkaon sulod sa usa ka yugto sa panahon makapasuod nimo sa Diyos.

Unsay imong hunahuna? Angay ka bang magpuasa? Unsay giingon sa Pulong sa Diyos bahin niini?

Mga Yugto sa Pagpuasa sa Kapanahonan sa Bibliya

Sa kapanahonan sa Bibliya, ang mga tawo nagpuasa tungod sa nagkalainlaing mga hinungdan ug kadto giuyonan sa Diyos. Ang pipila nagpuasa aron ipahayag ang labihang kaguol o paghinulsol sa mga sala (1 Samuel 7:4-6), paghangyog pabor sa Diyos o pagtinguha sa iyang paggiya (Maghuhukom 20:26-28; Lucas 2:36, 37), o alang sa mas maayong konsentrasyon samtang mamalandong.—Mateo 4:1, 2.

Apan naghisgot usab ang Bibliya ug mga pagpuasa nga wala uyoni sa Diyos. Si Haring Saul nagpuasa una siya mokonsultag usa ka espiritista. (Levitico 20:6; 1 Samuel 28:20) Ang mga daotan, sama kang Jezebel ug ang relihiyosong mga panatiko nga nagplano sa pagpatay kang apostol Pablo, naggahin ug mga yugto sa pagpuasa. (1 Hari 21:7-12; Buhat 23:12-14) Ilado kaayo ang mga Pariseo sa ilang kanunay nga pagpuasa. (Marcos 2:18) Bisan pa niadto, sila gisaway ni Jesus, ug ang Diyos wala makauyon kanila. (Mateo 6:16; Lucas 18:12) Sa susamang paagi, wala usab pabilhi ni Jehova ang mga pagpuasa sa pipila ka Israelinhon tungod sa ilang daotang panggawi ug daotang mga motibo.—Jeremias 14:12.

 Kini nga mga pananglitan nagpakita nga ang pagpuasa mismo dili makapahimuot sa Diyos. Hinuon, daghang sinserong mga alagad sa Diyos nga nagpuasa ang iyang giuyonan. Busa angay bang magpuasa ang mga Kristohanon?

Obligado ba nga Magpuasa ang mga Kristohanon?

Sumala sa Moisesnong Balaod, ang mga Hudiyo kinahanglang ‘magsakit sa [ilang] mga kalag,’ ang buot ipasabot, magpuasa kausa sa usa ka tuig sa Adlaw sa Pagtabon-sa-Sala. (Levitico 16:29-31; Salmo 35:13) Mao lamang kadto ang pagpuasa nga gisugo ni Jehova nga himoon sa iyang katawhan. a Ang mga Hudiyo nga nagkinabuhi ilalom sa Moisesnong Balaod nagsunod gayod sa maong sugo. Apan ang mga Kristohanon dili na ilalom sa Moisesnong Balaod.—Roma 10:4; Colosas 2:14.

Bisan tuod si Jesus nagpuasa agig pagsunod sa Balaod, siya dili ilado tungod sa maong buhat. Iyang gisultihan ang iyang mga tinun-an kon unsay angay nilang panggawi kon gusto nilang magpuasa, apan wala gayod niya sila sugoa sa pagpuasa. (Mateo 6:16-18; 9:14) Nan, nganong miingon man si Jesus nga ang iyang mga tinun-an magpuasa human sa iyang kamatayon? (Mateo 9:15) Kadto dili usa ka sugo. Ang mga pulong ni Jesus nagpasabot lamang nga sa iyang pagkamatay, ang iyang mga tinun-an maguol pag-ayo ug busa mawad-an silag gana sa pagkaon.

Gipakita sa duha ka asoy sa Bibliya, bahin sa unang mga Kristohanon nga nagpuasa, nga kon ang usa ka tawo magpuasa uban ang maayong motibo, kini dalawaton sa Diyos. (Buhat 13:2, 3; 14:23) b Apan, dili obligado ang mga Kristohanon kaniadto sa pagpuasa. Bisan pa niana, angayng mahibaloan sa usa ka tawo ang pipila ka kapeligrohan sa pagpuasa.

Pagbantay sa mga Kapeligrohan

Usa ka kapeligrohan nga pagalikayan bahin sa pagpuasa mao ang pagpakamatarong-sa-kaugalingon. Ang Bibliya nagpasidaan batok sa ‘pagpakaaron-ingnon nga nagpaubos.’ (Colosas 2:20-23) Ang ilustrasyon ni Jesus bahin sa hambogirong Pariseo nga mibating siya mas maayo sa moral nagpakita nga wala gayod uyoni sa Diyos ang maong tinamdan.—Lucas 18:9-14.

Sayop usab nga ipahibalo sa publiko nga ikaw nagpuasa o magpuasa tungod kay gisultihan ka sa laing tawo nga himoon kana. Sumala sa Mateo 6:16-18, si Jesus nagtambag nga ang pagpuasa maoy personal nga butang, tali lamang kanimo ug sa Diyos, ug dili angayng ipahibalo nimo kini sa uban.

Dili gayod angayng maghunahuna ang usa ka tawo nga ang pagpuasa makapala sa iyang sala. Ang pagpuasa kinahanglang ubanan sa pagkamasinugtanon sa mga balaod sa Diyos aron iya kining dawaton. (Isaias  58:3-7) Ang kinasingkasing nga paghinulsol, dili ang pagpuasa mismo, ang moresulta sa kapasayloan sa mga sala. (Joel 2:12, 13) Gipasiugda sa Bibliya nga kita makadawat ug kapasayloan tungod sa dili-takos nga kalulot nga gipahayag pinaagi sa halad ni Kristo. Ang kapasayloan dili gayod maangkon pinaagi sa bisan unsang mga buhat, apil na ang pagpuasa.—Roma 3:24, 27, 28; Galacia 2:16; Efeso 2:8, 9.

Ang Isaias 58:3 nag-ilustrar sa laing kasagarang sayop. Gipasabot sa mga Israelinhon nga ang ilang pagpuasa maoy sama rag naghimo silag pabor ngadto sa Diyos ug nga tungod niana, angay silang gantihan. Sila nangutana: “Unsay hinungdan nga kami nagpuasa ug wala nimo makita, ug kami nagsakit sa among kalag ug wala nimo matikdi?” Daghan karon ang susamang naghunahuna nga tungod sa ilang pagpuasa, sila makadahom nga ang Diyos mobalos kanila. Hinaot dili gayod nato sundogon ang maong dili-matinahoron ug dili-kasulatanhong tinamdan!

Ang uban nagtuo nga makapaabot silag ganti pinaagi sa pagsakit sa ilang lawas sa pagpuasa, paglatigo sa ilang kaugalingon, o sa susamang butang. Ang Pulong sa Diyos nagsaway sa maong ideya, nga nagpakita nga ang ‘grabeng pagsakit sa lawas walay bili diha sa pagpakigbugno’ sa daotang mga tinguha.—Colosas 2:20-23.

Makataronganong Hunahuna

Ang pagpuasa dili daotan, apan dili obligado ang usa sa pagbuhat niini. Sa pipila ka kahimtang kini mahimong makaayo kon likayan ang mga kapeligrohan nga gihisgotan na. Apan dili nato himoon kining sentro sa atong pagsimba. Si Jehova mao “ang malipayong Diyos,” ug buot niyang magmalipayon ang iyang mga alagad. (1 Timoteo 1:11) Ang iyang Pulong nag-ingon: “Walay mas maayo alang kanila kay . . . nga ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.”—Ecclesiastes 3:12, 13.

Angayng magmalipayon kita sa atong pagsimba, apan wala ilangkit sa Bibliya ang kalipay sa pagpuasa. Dugang pa, kon tungod sa pagpuasa madaot ang atong lawas o mawad-an kitag kusog alang sa malipayong buluhaton nga gisalig sa atong Magbubuhat ngadto sa matuod nga mga Kristohanon—ang pagsangyaw sa maayong balita sa Gingharian—nan kana dayag nga makabalda.

Kon magpuasa kita o dili, dili nato angayng hukman ang uban. Kini dili angayng lantugian sa matuod nga mga Kristohanon, “kay ang gingharian sa Diyos wala magkahulogan ug pagkaon ug pag-inom, kondili nagkahulogan ug pagkamatarong ug pakigdait ug kalipay uban sa balaang espiritu.”—Roma 14:17.

[Mga footnote]

[Blurb sa panid 28]

Ang mga Pariseo nagpakaaron- ingnon nga nagpaubos sa dihang nagpuasa

[Blurb sa panid 29]

“Ang gingharian sa Diyos wala magkahulogan ug pagkaon ug pag-inom, kondili nagkahulogan ug pagkamatarong ug pakigdait ug kalipay”

[Kahon sa panid 29]

Unsay Ikaingon Bahin sa Kuwaresma?

Ang 40-ka-adlaw nga pagpuasa sa Kuwaresma giingon nga maoy paghandom sa 40-ka-adlaw nga pagpuasa ni Kristo. Apan wala gayod si Jesus magsugo sa iyang mga tinun-an nga handomon ang iyang pagpuasa, ni adunay pamatuod nga sila naghimo niana. Gituohan nga ang unang paghisgot bahin sa 40-ka-adlaw nga pagpuasa una pa sa Easter o Pasko sa Pagkabanhaw mao ang anaa sa mga sulat ni Athanasius nga may petsang 330 C.E.

Sanglit si Jesus nagpuasa human sa iyang bawtismo ug dili una pa siya mamatay, morag katingad-anan nga ang pipila ka relihiyon nagsaulog sa Kuwaresma sa mga semana una sa Easter (Pasko sa Pagkabanhaw). Hinunoa, ang 40-ka-adlaw nga pagpuasa sa sinugdang bahin sa tuig kasagarang gihimo sa karaang mga taga-Babilonya, Ehiptohanon, ug mga Grego. Dayag nga kini nga Kristohanon kono nga kostumbre naggikan kanila.