Kon Unsay Atong Makat-onan Kang Jesus

Bahin sa “Kataposan”

Unsa may matapos?

Ang mga tinun-an ni Jesus nangutana kaniya: “Unsa man unya ang ilhanan sa imong presensiya ug sa kataposan sa sistema sa mga butang?” (Mateo 24:3) Sa pagtubag nianang pangutanaha, si Jesus wala mag-ingon nga ang literal nga yuta maoy malaglag. Una pa niana, siya naghisgot bahin sa “sistema sa mga butang” ug naggamit sa maong termino sa pagtumong sa tibuok sekular ug relihiyosong sistema nga gimandoan ni Satanas. (Mateo 13:22, 40, 49) Busa mao kana ang sistema nga iyang gipasabot sa dihang siya miingon: “Moabot ang kataposan.”—Mateo 24:14.

Giunsa paghubit ni Jesus ang kataposan?

Ang kataposan niining hiwi nga sistema maoy usa ka “maayong balita.” Si Jesus miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” Gihubit ni Jesus ang kataposan sa presenteng sistema sa mga butang niining paagiha: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa. Sa pagkatinuod, gawas kon kanang mga adlawa pamub-on, walay unod nga maluwas.”—Mateo 24:14, 21, 22.

Kinsa may laglagon?

Kadto lamang wala mahigugma ug mag-alagad kang Jehova ug kang Jesus ang pagalaglagon. Ang maong mga tawo wala magpatalinghog sa Diyos. Si Jesus miingon: “Maingon kaniadto sa mga adlaw ni Noe, mao man usab unya ang presensiya sa Anak sa tawo. Kay ingon nga sila niadtong mga adlawa sa wala pa ang baha, . . . sila [wala] magtagad hangtod nga miabot ang baha ug gibanlas silang tanan.” (Mateo 24:36-39) Si Jesus miingon nga daghan ang nagasubay sa dalan paingon sa kalaglagan. Apan, siya nagsaad nga  adunay ‘hagip-ot nga dalan padulong sa kinabuhi.’—Mateo 7:13, 14.

Kanus-a matapos kining sistemaha sa mga butang?

Sa dihang gipangutana bahin sa ilhanan sa iyang presensiya “ug sa kataposan sa sistema sa mga butang,” si Jesus mitubag: “Ang nasod motindog batok sa nasod ug ang gingharian batok sa gingharian, ug aduna unyay mga kanihit sa pagkaon ug mga linog . . . ug tungod sa pag-uswag sa kalapasan mobugnaw ang gugma sa kadaghanan.” (Mateo 24:3-12) Busa ang tanang makapasubong balita karon adunay makapadasig nga kahulogan—sa dili madugay ang Gingharian sa Diyos magdalag pakigdait sa masinugtanong katawhan. Si Jesus miingon: “Sa dihang makita ninyo nga nagakahitabo kining mga butanga, hibaloi nga ang gingharian sa Diyos haduol na.”—Lucas 21:31.

Unsay angay nimong buhaton?

Si Jesus miingon nga “gihatag [sa Diyos] ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Aron makapasundayag ug pagtuo sa Diyos ug sa iyang Anak, kinahanglang mailhan nimo sila pag-ayo. Busa si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Pagbantay nga ang mga kabalaka ug problema dili mopugong kanimo sa pagkat-on kon unsaon pagpasundayag sa imong gugma sa Diyos. Si Jesus miingon: “Apan bantayi ang inyong kaugalingon nga ang inyong mga kasingkasing dili mabug-atan sa . . . mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag. Kay moabot kini.” Kon imong sundon ang pasidaan ni Jesus, ikaw ‘molampos sa pag-ikyas niining tanang butang nga gitakdang mahitabo.’—Lucas 21:34-36.

Alang sa dugang impormasyon, tan-awa ang kapitulo 9, “Nagkinabuhi na ba Kita sa ‘Kataposang mga Adlaw’?,” diha sa librong Unsay Tinuod nga Gitudlo sa Bibliya? a

[Footnote]