Among mga Magbabasa Nangutana

Gikan ba sa Diyos ang Tanang Milagrosong Pagpanambal?

Walay duhaduha nga si Jehova nga Diyos adunay gahom sa pagpanambal. Tino nga makahatag usab siya sa maong gahom ngadto sa iyang mga magsisimba. Pananglitan, sa panahon sa mga apostoles, ang milagrosong pagpanambal maoy usa sa talagsaong mga gasa sa iyang balaang espiritu. Si apostol Pablo misulat: “Ang pagpadayag sa espiritu gihatag sa matag usa alang sa mapuslanong katuyoan. Pananglitan, pinaagi sa espiritu gihatag ngadto sa usa ang pulong sa kaalam, . . . ngadto sa lain mga gasa sa pagpang-ayo pinaagi sa maong usa ra ka espiritu, . . . ngadto sa lain pagpanagna, . . . ngadto sa lain pagsultig lainlaing mga pinulongan.”—1 Corinto 12:4-11.

Apan, sa mao gihapong sulat ni Pablo sa mga taga-Corinto iyang gihisgotan nga ang milagrosong mga gasa sa balaang espiritu sa Diyos matapos ra. Siya miingon: “Kon aduna may mga gasa sa pagpanagna, kini sila wagtangon ra; kon aduna may pagsultig lainlaing mga pinulongan, kini sila mohunong; kon aduna may kahibalo, kini wagtangon ra.”—1 Corinto 13:8.

Sa unang siglo, ang milagrosong mga pagpanambal gihimo ni Jesu-Kristo ug sa iyang mga apostoles. Nianang panahona nga bag-o pang natukod ang Kristohanong kongregasyon, ang mga gasa sa espiritu, lakip na ang katakos sa pagpanambal, maoy alang sa paghimaya sa Diyos ug maoy timailhan nga giuyonan ug gipanalanginan ni Jehova ang Kristohanong kongregasyon. Apan sa dihang lig-on na ang kongregasyon, ang pagpasundayag ug hugot nga pagtuo, paglaom, ug gugma mao na ang ilhanan sa pag-uyon sa Diyos, dili ang talagsaong mga gasa sa espiritu. (Juan 13:35; 1 Corinto 13:13) Busa, sa mga tuig 100 C.E., ang Diyos wala na maghatag sa mga tawo ug katakos sa pagpanambal ingong pamatuod sa iyang pag-uyon. a

Apan, makapangutana ka tingali, ‘Nganong makadungog pa man kog mga balita bahin sa milagrosong mga pagpang-ayo?’ Pananglitan, ang usa ka mantalaan nagtaho bahin sa usa ka lalaki nga gitakboyan kono ug kanser. Diha siyay mga tumor sa iyang ulo, sa iyang rinyon, ug bisan diha sa iyang kabukogan. Morag wala na siyay paglaom hangtod nga nakigsulti kono ang Diyos kaniya. Paglabay sa pipila ka adlaw, nawala kono ang iyang kanser.

Kon makadungog kag mga balita nga sama niana, nganong dili nimo suknaon ang imong kaugalingon: ‘Tinuod ba kana? Gipamatud-an ba kana sa mga doktor? Ug bisan pag naayo siya, nagtudlo ba ang Bibliya nga ang Diyos maoy responsable sa tanang nangaayo konohay?’

Hinungdanon kaayo ang tubag nianang ulahing pangutana. Si Jesus nagpasidaan sa iyang mga sumusunod: “Pagbantay sa mini nga mga manalagna . . . Daghan ang moingon kanako nianang adlawa, ‘Ginoo, Ginoo, wala ba kami managna sa imong ngalan, ug naghingilin sa mga demonyo sa imong ngalan, ug naghimog daghang gamhanang mga buhat [mga milagro] sa imong ngalan?’ Ug unya ako magaingon kanila: Wala gayod ako makaila kaninyo! Pahilayo gikan kanako, kamong mga mamumuhat sa kalapasan.”—Mateo 7:15, 21-23.

Dayag nga ang milagroso konohay nga pagpanambal wala gayod maggikan sa Diyos. Aron dili malimbongan niadtong nag-angkon nga naghimog mga milagro pinaagi sa ngalan sa Diyos, kinahanglan nga atong mabatonan ang tukmang kahibalo bahin sa Diyos, gamiton ang hinatag-sa-Diyos nga katakos sa pagpangatarongan, ug mahibaloan kon unsaon pag-ila niadtong nagabuhat sa iyang kabubut-on.—Mateo 7:16-19; Juan 17:3; Roma 12:1, 2.

[Footnote]