Mga Ilustrasyon Diha sa Bibliya—Nakasabot Ka ba Niini?

ANG usa ka hulagway mahubit sa libolibong mga pulong, apan usahay mahubit kini sa usa o duha lamang ka pulong. Ang Bibliya naggamit ug daghang ilustrasyon, o mga ekspresyon nga magpalihok sa magbabasa sa paghanduraw ug mga hulagway. a Pananglitan, sumala sa usa ka banabana, si Jesus migamit ug 50 ka lainlaing ilustrasyon diha sa usa lamang ka wali—ang Wali sa Bukid.

Nganong angay ka mang maikag niining mga ilustrasyona? Ang usa ka rason mao nga kon imo kanang masabtan, mas ganahan kang mobasa sa Bibliya ug mas molalom ang imong apresasyon sa Pulong sa Diyos. Dugang pa, kon imong mahibaloan ang kahulogan sa ilustrasyon, mas masabtan nimo ang mensahe sa Bibliya. Sa pagkatinuod, kon wala ka makasabot sa ilustrasyon diha sa Bibliya, dili ka lang tingali maglibog kondili masayop ka usab sa pagsabot sa kahulogan niana.

Pagsabot sa mga Ilustrasyon

Ang usa ka ilustrasyon nagtandi sa usa ka ideya ngadto sa lain. Ang ideya nga gitandi gitawag ug tema, ug ang gitandian, mao ang hulagway. Ang panagsama sa duha ka ideya mao ang ilang kaamgiran. Busa ang sekreto sa pagsabot sa tinuod nga kahulogan sa ilustrasyon nagdepende sa imong pag-ila ug pagsabot sa matag usa niining tulo ka elemento.

Usahay, sayon ra tingaling maila ang tema ug ang hulagway. Apan aduna tingali daghang kaamgiran. Unsay motabang kanato sa pag-ila sa tukmang kaamgiran? Sagad makita ang tubag diha sa konteksto, o sa palibot nga mga teksto. b

Pananglitan, si Jesus miingon ngadto sa kongregasyon sa Sardis: “Tino nga gawas lamang kon ikaw momata, ako moanha ingon sa usa ka kawatan.” Dinhi, gitandi ni Jesus ang iyang pag-abot (ang tema) sa pag-abot sa usa ka kawatan (ang hulagway). Apan unsa ang kaamgiran niana? Makatabang kanato ang konteksto. Si Jesus nagpadayon: “Dili mo gayod mahibaloan kon unsang taknaa ako moanha kanimo.” (Pinadayag 3:3) Busa ang pagtandi wala magtumong sa katuyoan sa iyang pag-abot. Siya wala magpasumbingay nga siya moabot aron mangawat. Hinunoa, ang kaamgiran mao nga ang iyang pag-abot wala damha ug wala mahibaloi.

 Apan usahay ang ilustrasyon nga makita diha sa usa ka bahin sa Bibliya makatabang kanato sa pagsabot sa susamang ilustrasyon sa laing teksto. Pananglitan, si apostol Pablo migamit sa ilustrasyon nga gigamit ni Jesus, nga nagsulat: “Kamo nahibalo pag-ayo nga ang adlaw ni Jehova moabot sama sa kawatan sa kagabhion.” (1 Tesalonica 5:2) Dili tin-aw ang kaamgiran diha sa konteksto sa gisulti ni Pablo. Apan, ang pagtandi niini nga ilustrasyon sa gigamit ni Jesus sa Pinadayag 3:3 makatabang kanato sa pag-ila sa kaamgiran. Pagkamaayong pahinumdom kining ilustrasyona alang sa tanang matuod nga mga Kristohanon, nga sila angayng magtukaw sa espirituwal!

Mga Ilustrasyon nga Nagtudlo Kanato Bahin sa Diyos

Walay tawo nga bug-os makasabot sa kinaiya ug gahom ni Jehova. Sa karaang panahon, si Haring David misulat nga ang “pagkadako [ni Jehova] dili matukib.” (Salmo 145:3) Human palandonga ang pipila ka buhat sa paglalang ni Jehova, si Job mipatugbaw: “Tan-awa! Kini maoy kadaplinan lamang sa iyang mga dalan, ug hunghong ra ang atong nadungog bahin kaniya! Apan bahin sa iyang gamhanan nga dalugdog kinsa ba ang makasabot?”—Job 26:14.

Bisag dili nato bug-os nga matukib ang iyang pagkadako, ang Bibliya naggamit ug mga ilustrasyon sa pagtabang kanato nga masabtan ang maanindot nga mga hiyas sa atong langitnong Diyos. Si Jehova gihubit ingong Hari, Magbabalaod, Maghuhukom, ug Manggugubat—usa nga takos gayod sa atong pagtahod. Siya gihulagway usab ingong Magbalantay, Magtatambag, Magtutudlo, Amahan, Tig-ayo, ug Manluluwas—usa nga mahimo natong higugmaon. (Salmo 16:7; 23:1; 32:8; 71:17; 89:26; 103:3; 106:21; Isaias 33:22; 42:13; Juan 6:45) Ang matag usa niining simpleng mga paghubit makapatunghag daghang maanindot nga mga hulagway nga adunay ubay-ubayng kaamgiran. Pinaagi niini nga mga ilustrasyon, mas mailhan nato kon unsang matanga sa pagka-Diyos si Jehova.

Diha sa Bibliya si Jehova gitandi usab sa walay-kinabuhing mga butang. Siya gihubit ingong “Bato sa Israel,” “dakong bato,” ug “salipdanan.” (2 Samuel 23:3; Salmo 18:2; Deuteronomio 32:4) Unsang kaamgiran ang gipakita niini? Maingon nga ang dakong bato lig-ong pagkapahimutang ug dili matarog, si Jehova nga Diyos maoy kasaligan usab nga Tuboran sa kasegurohan alang kanato.

Ang Salmo adunay daghang ilustrasyon nga naghubit sa lainlaing bahin sa personalidad ni Jehova. Pananglitan, ang Salmo 84:11 naghisgot kang Jehova ingong “adlaw ug taming” tungod kay siya mao ang Tuboran sa kahayag, kinabuhi, enerhiya, ug proteksiyon. Sa laing bahin, ang Salmo 121:5 nag-ingon nga “si Jehova mao ang imong salimbong sa imong tuong kamot.” Maingon nga ang usa ka salimbong makapanalipod kanato batok sa naglagiting nga kainit sa adlaw, si Jehova makapanalipod niadtong nag-alagad kaniya batok sa kainit sa kalamidad, nga naghatag kanilag samag landong nga proteksiyon ilalom sa iyang “kamot” o ilalom sa iyang “mga pako.”—Isaias 51:16; Salmo 17:8; 36:7.

Mga Ilustrasyon nga Naghubit Kang Jesus

Ang Bibliya sublisubling nagtawag kang Jesus ingong “Anak sa Diyos.” (Juan 1:34; 3:16-18) Ang ubang mga dili-Kristohanon nalisdan sa pagsabot niini, sanglit ang Diyos walay literal nga asawa ug dili tawhanon. Dayag nga si Jehova  dili magpatunghag anak sama sa usa ka tawo. Busa kining ekspresyona maoy usa ka ilustrasyon. Gituyo kini aron sa pagtabang sa magbabasa sa pagsabot nga ang relasyon ni Jesus sa Diyos maoy sama nianang sa usa ka anak ug amahan. Ang maong ilustrasyon nagpasiugda usab nga nadawat ni Jesus ang iyang kinabuhi gikan kang Jehova, kay Siya ang naglalang kang Jesus. Sa samang paagi, ang unang tawo nga si Adan, gitawag usab nga “anak sa Diyos.”—Lucas 3:38.

Si Jesus naggamit ug mga ilustrasyon sa paghubit sa lainlain niyang papel sa pagtuman sa katuyoan sa Diyos. Pananglitan, siya miingon: “Ako mao ang matuod nga punoan sa paras, ug ang akong Amahan mao ang magtitikad.” Dayon gitandi ni Jesus ang iyang mga tinun-an ngadto sa mga sanga sa paras. (Juan 15:1, 4) Unsang hinungdanong mga punto ang gitudlo niining ilustrasyona? Aron magpabiling buhi ug mabungahon, ang mga sanga sa literal nga paras kinahanglang dili mahimulag sa punoan. Sa samang paagi, ang mga tinun-an ni Kristo kinahanglang magpabilin nga nahiusa kaniya. “Bulag kanako wala gayod kamoy mahimo,” matod pa ni Jesus. (Juan 15:5) Maingon nga ang magtitikad magdahom nga ang paras mamunga, si Jehova nagdahom nga kadtong nahiusa kang Kristo magpatungha usab ug espirituwal nga bunga.—Juan 15:8.

Tinoa Kon Unsa ang Kaamgiran

Kon ato lamang basahon ang ilustrasyon ug wala nato masabti kon unsay kaamgiran, basin dili nato makuha ang punto. Pananglitan, tagda ang mga pulong diha sa Roma 12:20: “Kon ang imong kaaway gigutom, pakan-a siya; kon siya giuhaw, hatagi siya ug tubig nga mainom; kay sa pagbuhat niini ikaw magapundok ug mga baga ibabaw sa iyang ulo.” Ang pagpundok ba ug mga baga ibabaw sa ulo sa usa ka tawo nagpakita nga ikaw nanimalos kaniya? Wala, kon atong masabtan ang kaamgiran niana. Ang ilustrasyon gipasukad sa karaang paagi sa paglunsay ug metal. Ang bato nga adunay metal ipatong sa mga baga, ug ang ubang baga ibutang sa ibabaw niini. Pinaagi niini nga proseso mabulag ang metal gikan sa bato. Sa samang paagi, ang pagpakitag kalulot makapalukmay sa usa ka tawo ug makapagula sa iyang maayong kinaiya.

Ang hustong pagsabot sa mga ilustrasyon dili lamang molamdag sa atong hunahuna kondili motandog usab sa atong kasingkasing. Atong bation ang kabug-at sa sala kon kini gipakasama sa usa ka utang. (Lucas 11:4) Apan sa dihang si Jehova magpasaylo kanato ug magpapas sa atong utang kaniya, kita mobati gayod ug dakong kahupayan. Sa dihang kita giingnan nga siya ‘motabon’ ug ‘mopapas’ sa atong mga sala—sama sa pagpala sa gisulat diha sa pisara—kita gipasaligan nga dili na niya kana hinumdoman pa. (Salmo 32:1, 2; Buhat 3:19) Ug makapahupay gayod ang pagkahibalo nga ang mga sala nga samag sanag-pula o lutong-pula nga panapton mahimong papution ni Jehova sama sa niyebe!—Isaias 1:18.

Pipila lamang kini sa gatosan ka ilustrasyon nga makita diha sa Pulong sa Diyos, ang Bibliya. Busa sa dihang imong basahon ang Bibliya, hatagig linaing pagtagad ang mga ilustrasyon. Paggahin ug panahon sa pagtino kon unsa ang mga kaamgiran niana ug palandonga kana. Sa pagbuhat niana molalom ang imong pagsabot ug apresasyon sa Kasulatan.

[Mga footnote]

[Kahon sa panid 13]

Kon sa Unsang Paagi Makatabang ang mga Ilustrasyon

Ang mga ilustrasyon makatabang kanato sa daghang paagi. Ang punto nga lisod sabton mahimong itandi sa usa ka butang nga daling masabtan. Mahimong mogamit pa ug dugang ilustrasyon aron sa pagpatin-aw sa lainlaing bahin sa usa ka tema. Ang hinungdanong mga ideya pwedeng ipasiugda pinaagig mga ilustrasyon o himoong mas makapadani.

[Kahon sa panid 14]

Ilha ang Lainlaing Elemento

ILUSTRASYON: “Kamo ang asin sa yuta.” (Mateo 5:13)

TEMA: Kamo (mga tinun-an ni Jesus)

HULAGWAY: Asin

KAAMGIRAN NIINI NGA KONTEKSTO: Makapreserbar

LEKSIYON: Ang mga tinun-an nagdalag mensahe nga makapreserbar sa kinabuhi sa daghang tawo

[Blurb sa panid 15]

“Si Jehova mao ang akong Magbalantay. Walay makulang kanako.”—SALMO 23:1