Nagmalipayon Bisan pa sa Akong Pagkabaldado

Sumala sa Giasoy ni Paulette Gaspar

Bisan tuod ako mitimbang ug unom ka libra sa dihang ako natawo, ang doktor nahibalo nga naa koy diperensiya. Sa akong pagkahimugso nabalian kog bukog. Abi god ninyo, duna koy sakit nga gitawag ug osteogenesis imperfecta, nga nagpasabot nga daling malugti ang akong bukog. Gioperahan dayon ko, apan ang mga doktor nagtuo nga dili na masalbar ang akong kinabuhi. Abi nilag dili na ko maabtag 24 oras.

AKO natawo sa Canberra, nga mao ang kaulohang siyudad sa Australia, niadtong Hunyo 14, 1972. Sahi sa gidahom sa kadaghanan, wala ako mamatay nianang adlawa. Apan, nataptan kog pulmonya. Ang mga doktor nagtuo nga dili na ko magdugay, mao nga wala na lang ko nila dapatig tambal. Bisan pa niana, nabuhi ra gihapon ko.

Seguradong nalisdan gayod ang akong ginikanan niadtong panahona. Tungod kay gamay na lang ang purohan nga ako mabuhi, ang nahangawa nga mga doktor ug nars nagtambag sa akong ginikanan nga dili na lang kaayo paduolon nako. Gani, sa una nakong tulo ka bulan sa ospital, wala tugoti ang akong mga ginikanan bisan sa paghikap na lang kanako. Delikado man god nga mabalian kog bukog. Sa dihang nakita sa mga doktor nga luwas na ko sa peligro, ilang giingnan ang akong ginikanan nga dad-on na lang ko sa usa ka dapit alang sa baldadong mga bata.

Apan gidala ko sa akong ginikanan sa among balay. Niadto gong tungora, ang akong inahan nagsugod nag tuon sa Bibliya uban sa mga Saksi ni Jehova. Tungod sa iyang natun-an, gibati niyang obligado gayod siya sa pag-atiman kanako. Apan nalisdan gyod tingali siya sa paggahin ug panahon nga magkasuod mi kay hago kaayo siya sa pag-atiman nako. Kanunay lang kong maospital. Ang akong mga bukog mahimong mabali bisag ligoon lang ko. Moatsi lang gani ko, mahimong malugti ang akong bukog.

Naguol Ko Pag-ayo

Samtang ako nagtubo, kanunay kong naa sa wheelchair. Imposible na gyod kong makalakaw. Bisan pa sa mga kalisdanan, giatiman ko pag-ayo sa akong ginikanan.

Gawas pa niana, naningkamot pag-ayo ang akong inahan sa pagtudlo kanako sa makahupay nga mensahe sa Bibliya. Pananglitan, iya kong gitudloan nga sa umaabot himoon sa Diyos ang tibuok yuta nga usa ka paraiso diin matagamtam sa tanan ang kahingpitan sa espirituwal, mental, ug pisikal. (Salmo 37:10, 11; Isaias 33:24) Apan, giingnan ko ni Mama nga sa  pagkakaron morag imposible nga magmalipayon ko sa akong kinabuhi.

Sa sinugdan, mitungha ko sa eskuylahan alang sa mga baldado. Ang mga magtutudlo wala magdasig nako sa pagkab-ot ug mga tumong, mao nga wala ra sab ko maningkamot. Gani, kalbaryo nako ang pag-eskuyla. Daghang bata didto ang dili maayog pagtratar kanako. Sa ulahi, mibalhin ko sa eskuylahan alang sa normal nga mga bata. Lisod gihapon silang ikasinabot. Bisan pa niana, determinado ko nga matapos ang 12 ka tuig nga pag-eskuyla.

Ilabina sa dihang ako nagtungha na sa hayskul, akong nahunahuna kon unsa kawalay paglaom ug kahaw-ang ang kinabuhi sa akong mga eskolmet. Napamalandong usab nako ang gitudlo ni Mama bahin sa Bibliya. Ako nagtuo nga kadto maoy kamatuoran. Apan niadtong panahona, wala pa modulot sa akong kasingkasing ang mga pagtulon-an sa Bibliya. Akong gisulayan ang paglipaylipay, nga walay paghunahuna sa akong kaugmaon.

Sa nag-edad kog 18, ako mibiya sa among balay ug mibalhig puy-anan kauban sa usa grupo sa mga baldado. Ako nahinam apan nabalaka usab. Nalingaw ko sa akong bag-ong kagawasan ug mga barkada. Daghan sa akong mga higala ang nangaminyo. Nangandoy usab ako nga makabatog kapikas nga nahigugma kanako. Apan tungod sa akong pagkabaldado, lisod kaayo ang pagpangitag kapikas sa kinabuhi. Kini nakapaguol kanako.

Hinunoa, wala gayod nako basola ang Diyos sa akong kahimtang. Akong nakat-onan nga ang Diyos dili maoy hinungdan sa pag-antos. (Job 34:10) Naningkamot ko nga dawaton na lang ang akong kahimtang. Apan, mibati gihapon kog grabeng kaguol.

Inanayng Naulian

Maayo na lang kay nahibaloan sa akong inahan ang akong kahimtang ug siya mikontak sa usa ka ansiyano sa kongregasyon nga nagpuyo duol sa akong gipuy-an. Gitawgan ko sa maong ansiyano ug iya kong gidapit sa pagtambong sa Kristohanong mga tigom sa Kingdom Hall sa mga Saksi ni Jehova. Ako gidumalahan usab sa usa ka sister ug pagtuon sa Bibliya.

Samtang akong nahinumdoman ang mga kamatuoran sa Bibliya nga gitudlo kanako sa akong inahan kaniadto, nausab ang akong panglantaw sa kinabuhi. Ganahan na kong makig-uban sa mga isigka-Kristohanon. Apan, tungod kay mahadlok kong masakitan, dili ko moestorya nila sa akong gibati. Lagmit mao kini ang nakababag nga molalom ang akong gugma sa Diyos. Bisan pa niana, ako nahibalo nga angay gayod nakong ipahinungod ang akong kinabuhi kaniya. Busa niadtong Disyembre 1991, ako nagpabawtismo ingong simbolo sa akong pagpahinungod sa Diyos.

Mihawa ko sa akong gipuy-an kauban sa mga baldado, ug mipuyo sa usa ka apartment nga nag-inusara. Kini parehong naghatag kanakog kaayohan ug mga problema. Pananglitan, ako nag-antos sa hilabihang kamingaw. Nahadlok sab ko nga basig sudlon ug mga lalaki ang akong apartment. Wala madugay mibati na usab ako ug grabeng kaguol. Bisan tuod mapahiyomon ko ug daw malipayon, dili gayod maayo ang akong gibati. Nanginahanglan gyod ko ug usa ka buotan ug maunongong higala.

Akong gibati nga si Jehova nga Diyos nagtagana kanako sa maong higala. Ang mga ansiyano sa kongregasyon mihimog kahikayan nga si Suzie, nga usa ka minyong sister, magpadayon pagdumala sa akong pagtuon sa Bibliya. Si Suzie dili lamang magtutudlo nako, kondili usa usab ka suod ug minahal nga higala.

Gibansay ako ni Suzie sa pagpaambit sa akong nahibaloan ngadto sa uban—sa balaybalay ug di-pormal nga pagsangyaw. Mas napabilhan na nako ang mga hiyas sa Diyos. Apan bisan tuod bawtismado na ko niadto, dili pa gayod lalom ang akong gugma sa Diyos. Diha pa gani higayon nga naghunahuna ko nga moundang na sa  pag-alagad kang Jehova. Ako ning gitug-an kang Suzie, ug iya kong gitabangan nga mabuntog ang maong pagbati.

Gitabangan usab ako ni Suzie nga maamgohan nga ang akong pagpakig-uban sa mga tawong dili tim-os nga nahigugma kang Jehova maoy usa sa mga hinungdan sa akong kagul-anan. Busa nakighigala ako sa mga tawo nga hamtong sa espirituwal—labi na gayod sa mga edaran. Akong gipaningkamotan usab nga mahibalik ang akong maayong relasyon uban sa akong inahan ug magulang nga lalaki. Gibati gayod nako ang kalipay nga wala pa nako batia sukad. Ang mga igsoon sa kongregasyon, ang akong pamilya ug, labaw sa tanan, si Jehova nahimong tinubdan sa akong kalipay ug kusog.—Salmo 28:7.

Usa ka Bag-ong Karera

Human motambog kombensiyon diin akong nadunggan ang usa ka pakigpulong nga nagpasiugda sa kalipay nga gibati sa daghan diha sa bug-os-panahong pag-alagad, ako nakaingon sa akong kaugalingon, ‘Makahimo sab ko niana!’ Siyempre, nahibalo ko nga dili kana sayon tungod sa akong kahimtang. Apan human ako makaampo ug makapamalandong bahin niana, ako miaplay sa pagkahimong bug-os-panahong magtutudlo sa Bibliya, ug nagsugod niadtong Abril 1998.

Sa unsang paagi ako makasangyaw? Kinaiya nako nga dili magsalig ug magpabug-at sa uban, nga magpatabang kanila sa transportasyon ug uban pa. Busa si Suzie ug ang iyang bana nga si Michael misugyot nga mopalit kog motorsiklo. Apan unsaon nako pagsakay niana? Sama sa makita sa larawan, ang akong motorsiklo pinatuyo. Dili na gani kinahanglang ikawas pa nako ang akong 19 kilos nga lawas gikan sa wheelchair!

Tungod niini, ako makahimo na sa pagbisita sa mga tawo ug pagtudlo kanila sa Bibliya sa mga oras nga kombenyente kanila ug kanako. Ganahan gyod kong magpadagan sa akong motorsiklo ug mabatyagan ang hangin nga modapat sa akong nawong—usa sa ordinaryong mga butang nga makapalipay kanako.

Ganahan sab kong makig-estorya sa mga tawo diha sa kadalanan, nga ang kadaghanan kanila buotan ug matinahoron kanako. Malipay gayod ako sa pagtabang sa uban nga makakat-on sa Bibliya. Mahimuot kong mahinumdom sa usa ka higayon nga ako nagsangyaw uban sa usa ka taas nga brader. Gitimbaya sa brader ang tagbalay, kinsa nahibulong nga nagtan-aw nako. Dayon nangutana siya sa akong kauban, “Makasulti ba siya?” Pwerte namong pangatawa. Human nako masangyawi ang babaye, seguradong nahibalo na siya nga makamao diay kong mosulti!

Ako malipayon karon ug nakakat-on na sa paghigugma kang Jehova nga Diyos. Mapasalamaton gayod ako sa akong inahan sa pagtudlo kanako sa mga kamatuoran sa Bibliya, ug masaligon ako nga naglantaw sa haduol nga umaabot sa dihang ang Diyos ‘magabag-o sa tanang butang,’ lakip na sa akong gamayng lawas.—Pinadayag 21:4, 5.

[Blurb sa panid 30]

“Naningkamot ko nga dawaton na lang ang akong kahimtang. Apan, mibati gihapon kog grabeng kaguol”