Among mga Magbabasa Nangutana

Ang Ato Bang mga Pag-antos Silot Gikan sa Diyos?

Nakaeksperyensiya ka na bag masakit nga kasinatian nga tungod niana nakapangutana ka kon gituyo ba sa Diyos nga ikaw mag-antos? Usahay, tungod sa wala damhang pagkasakit, aksidente, o kamatayon sa usa ka membro sa pamilya, kita mobati nga gisilotan sa Diyos.

Apan kasukwahi niana, mahupayan ka gayod sa pagkahibalo nga kabubut-on sa Diyos nga ang mga tawo magmalipayon ug mahilayo sa kapeligrohan. Sa pagkatinuod, sa dihang gilalang sa Diyos si Adan ug Eva, sila iyang gipapuyo sa “tanaman sa Eden”—usa ka paraiso diin walay mga kalisdanan ug kasakit.—Genesis 2:15.

Ikasubo nga ang unang magtiayon misupak sa Diyos ug ilang giwala ang maong maanindot nga kahimtang. Tungod niana, sila ug ang ilang mga anak naalaot, ug lakip na kita karon. Ngano? Ang maong kahimtang ikatandi sa mahimong epekto kon ang usa ka amahan dili mobayad sa abang sa ilang gipuy-ang balay—ang tibuok pamilya papahawaon ug silang tanan makasinatig kalisdanan. Sa susama, ang tanang tawo nakasinatig daghang kalisdanan sukad nga mirebelde ang unang magtiayon. (Roma 5:12) Daghang katuigan human sa maong pagrebelde, ang matarong nga si Job mimulo nga kon ang iyang kasakit ug kagul-anan ‘ibutang sa timbangan,’ mas ‘bug-at pa kini kay sa balas sa kadagatan.’—Job 6:2, 3.

Ang laing hinungdan sa atong kalisdanan mao ang atong limitadong katakos sa paghibalo sa kon unsay mahitabo sa umaabot. Pananglitan, handurawa nga dunay baligyang mga balay sa dapit nga pirme ang sunog. Kay wala ka mahibalo nga pirme diay ang sunog sa maong lugar, ikaw mipalit ug balay ug mipuyo didto. Tungod niana, nameligro ang imong kinabuhi ug sa imong pamilya. Bisan unsang kalisdanan nga mahimong motungha didto dili gayod silot gikan sa Diyos, dili ba? Husto gayod ang giingon sa Bibliya: “Si bisan kinsa nga walay kasinatian motuo sa tagsatagsa ka pulong, apan ang usa nga maalamon magapalandong sa iyang mga lakang.”—Proverbio 14:15.

Bisan tuod makasinati kitag mga kalisdanan karon, makapahupay ang pagkahibalo nga hapit nang wad-on sa Diyos ang tanang pag-antos. Sa dihang mahitabo kana, dili ka na makasinatig kalisdanan, ni makakitag mga tawong naglisod o makadungog pa bahin niana. Ang mga luha sa kasakit, kaguol, kamatayon, ug pagbangotan mawala na. (Pinadayag 21:4) Makapalipay usab ang saad sa Diyos nga sa umaabot, sa dihang ang mga tawo magtukod ug balay ug magtanom diha sa kaumahan, kana dili na madaot tungod sa gubat o katalagman. Hinunoa, ang buhat sa ilang mga kamot ‘magamit sa bug-os.’—Isaias 65:21-25.

Samtang nagpaabot ka sa panahon nga wagtangon sa Diyos ang tanang pag-antos, unsay imong mahimo karon aron dili kaayo ka mabug-atan sa mga kalisdanan? Una sa tanan, “salig kang Jehova sa bug-os mong kasingkasing ug ayaw pagsalig sa kaugalingon mong pagsabot,” matod sa Bibliya. (Proverbio 3:5) Pangayoa ang giya ug paghupay sa Diyos. Subaya ang maalamong dalan nga iyang gilatid diha sa Bibliya. Kini makatabang kanimo sa paghimog maayong mga desisyon ug manalipod kanimo gikan sa mga kadaot nga mahimong likayan.—Proverbio 22:3.