Duna ba Gayoy Nagtagad Kanako?

Mibati ka na bang daw nag-inusara, nga mora bag walay nakasabot sa imong mga problema? Ug bisan pag nahibalo sila niana, mibati ka nga sila walay pagtagad kanimo.

SA DIHANG motungha ang mga problema, ang atong kinabuhi samag gihapak sa bagyo nga walay paglurang. Usahay, makaingon kita nga ang atong nasinatian grabe kaayo nga daw dili na nato maantos. Sagad nga mobati kitag ingon niana sa dihang makaagom kitag masakit nga mga kasinatian, depresyon, grabeng aksidente, laygay nga mga sakit, o uban pa. Tingali mawad-an kitag paglaom ug wala mahibalo kon kang kinsa mangayog tabang. Aduna ba gayoy nagtagad kanato?

“Ang Diyos sa Tanang Paghupay” Nagtagad Kanimo

Ang Bibliya naghubit sa Diyos ingong “ang Amahan sa malumong mga kaluoy ug ang Diyos sa tanang paghupay.” (2 Corinto 1:3) Si Jehova nga Diyos nahibalo nga kita nanginahanglag paghupay. Ang Bibliya naggamit sa pulong “hupay” sa kapig usa ka gatos ka beses, nga nagpasalig nga ang Diyos nakasabot sa atong mga problema ug gusto niya nga hupayon kita. Busa makalaom kita nga bisag ang uban walay pagtagad o wala makasabot sa atong situwasyon, si Jehova nagtagad gayod kanato.

Tatawng makita diha sa Kasulatan ang pamatuod nga ang Diyos nagtagad kanato ingong indibiduwal. Pananglitan, ang Bibliya nag-ingon: “Ang mga mata ni Jehova anaa sa tanang dapit, nga nagpadayon pagbantay sa mga daotan ug sa mga maayo.” (Proverbio 15:3) Ang Job 34:21 nag-ingon usab: “Ang iyang mga mata anaa sa mga dalan sa tawo, ug iyang makita ang tanan niyang mga lakang.” Nakita ni Jehova ang atong ginahimo—maayo man kini o daotan—ug nahibalo siya sa atong kahimtang, busa makahimo siya sa pagtabang kanato. Gipamatud-an kini diha sa gisulti ni propetang Hanani kang Haring Asa sa Juda: “Kon mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.”—2 Cronicas 16:7, 9.

Dunay laing rason kon nganong si Jehova kanunayng nagtan-aw kanato. Si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Si Jehova nagtagad kanato mao nga iyang ginasusi ang atong kasingkasing kon kita interesado ba nga mahibalo ug dugang bahin kaniya. Busa, ang Diyos makahimo gayod sa pagtabang sa matag usa kanato. Pananglitan, sa Dominican Republic, dihay usa ka babaye nga anaa sa ospital kay operahan tungod sa kanser. Siya miampo sa Diyos nga makaplagan ang matuod nga relihiyon. Dayon, miabot ang iyang bana nga nagdalag brosyur nga Unsay Gikinahanglan sa Diyos Kanato? a nga gihatag sa Saksi ni Jehova nga nagsangyaw sa ilang balay nianang buntaga. Gibasa kini sa babaye ug iyang naamgohan nga kini mao ang tubag sa iyang pag-ampo. Gidawat niya ang pagtuon sa Bibliya uban sa usa ka Saksi, ug wala ray unom ka bulan, siya nagpabawtismo.

Diha sa Bibliya, sa basahon sa mga Salmo, makakaplag kitag daghang makapalipayng pahayag sa karaang Hebreohanong mga salmista o mang-aawit  sama ni Haring David nga naghubit sa mahigugmaong pag-atiman ni Jehova sa iyang mga alagad. Sa Salmo 56:8, atong mabasa ang hangyo ni Haring David sa Diyos: “Isulod ang akong mga luha sa imong botelya nga panit. Dili ba anaa man sila sa imong basahon?” Sumala sa maong teksto, si David nahibalo nga si Jehova nasayod sa iyang mga pag-antos ug kasakit. Si Jehova nahibalo gayod niana ug wala niya kana kalimti. Sa pagkatinuod, ang atong Maglalalang nag-atiman sa tanan nga nagbuhat sa iyang kabubut-on, ‘kadtong kansang kasingkasing maoy bug-os alang kaniya.’

Ang laing teksto sa Bibliya nga naghubit sa mahigugmaong pag-atiman sa Diyos mao kanang mabasa diha sa nabantog nga ika-23 nga Salmo. Sa pasiunang mga pulong niini, ang Diyos gipakasama sa usa ka mahigugmaong magbalantay: “Si Jehova mao ang akong Magbalantay. Walay makulang kanako.” Ang mga magbalantay sa karnero sa Tungang Sidlakan nag-atiman sa matag karnero ug nagngalan pa gani sa matag usa niini. Kada adlaw iyang tawgon ang matag usa niini, hapohapon, ug susihon kon duna ba kiniy mga samad. Kon duna kiniy samad, iya kining butangan ug lana o tambal aron dali kining maayo. Kon ang karnero magsakit, iya kining tingalon aron paimnon ug tambal ug patindogon aron dili maglubog ug mamatay. Usa gayod kini ka maayong ilustrasyon kon sa unsang paagi si Jehova nag-atiman niadtong modangop kaniya.

Ang Pag-ampo ug ang Pagkabanhaw—Pamatuod nga ang Diyos Nagtagad Kanato

Kini ug ang uban pang nindot nga mga salmo sa Bibliya gisulat dili lang aron basahon, kondili aron makakat-on usab kita kon giunsa  pagpahayag sa matinumanong mga alagad kaniadto ang ilang kinasingkasing nga paghangyo sa tabang sa Diyos, maingon man ang ilang pagpasalamat tungod sa giya ug mga panalangin gikan kaniya. Ang ilang gipamulong tin-awng nagpakita nga ang karaang mga alagad sa Diyos nagtuo gayod nga siya may pagtagad kanila. Kon atong basahon ug pamalandongon ang maong kinasingkasing nga mga pahayag, bation usab nato ang ilang gibati bahin sa Diyos. Busa, ang atong pribilehiyo sa pag-ampo maoy pamatuod nga ang Diyos nagtagad gayod kanato.

Apan usahay, tungod sa kabug-at sa problema, dili kita mahibalo kon unsaon pagsulti niana ngadto sa Diyos. Kana ba nagpasabot nga si Jehova dili na mahibalo sa atong gibati? Ang Roma 8:26 nagtubag: “Ang espiritu moduyog usab nga motabang sa atong mga kahuyangon; kay ang suliran kon unsay angay natong iampo sumala sa atong gikinahanglan wala nato mahibaloi, apan ang espiritu mangamuyo alang kanato uban ang mga pag-agulong wala mabungat.” Kining tekstoha nagpakita nga dunay pag-ampo sa mga alagad sa Diyos kaniadto diha sa Bibliya nga parehas sa kon unsay gusto natong isulti sa Diyos. Ug si Jehova, ang “Tigpatalinghog sa pag-ampo,” mag-isip niana nga daw naggikan mismo sa atoa.—Salmo 65:2.

Ang paglaom sa pagkabanhaw maoy lain pang pamatuod nga ang Diyos nagmahal gayod kanato. Si Jesu-Kristo miingon: “Ang takna nagsingabot nga ang tanan nga anaa sa handomanang mga lubnganan makadungog sa iyang [Jesus] tingog ug manggula.” (Juan 5:28, 29) Ang Gregong pulong nga gigamit dinhi tukmang gihubad nga “handomanang mga lubnganan,” dili kay “lubnganan” lang. Kini nagpasabot nga ang Diyos dili gayod malimot kon unsang matang sa pagkatawo ang usa sa dihang siya buhi pa.

Hunahunaa lang, aron mabanhaw sa Diyos ang usa nga namatay, kinahanglang mahibalo siya sa tanan bahin kaniya, lakip na sa iyang panagway, mga hiyas, ug sa iyang panumdoman! (Marcos 10:27) Ang Diyos dili gayod malimot niana bisag linibo na ka katuigan ang nanglabay. (Job 14:13-15; Lucas 20:38) Busa, nahibalo gayod si Jehova sa bug-os nga detalye sa binilyong nangamatay nga nagpamatuod nga si Jehova nagtagad gayod kanato!

Si Jehova ang Tigganti

Unsay angay natong himoon aron madawat ang mahigugmaong pag-atiman sa Diyos? Una sa tanan, angay natong ipakita nga kita may pagtuo ug pagsalig kaniya, ug nga andam kitang mosunod kaniya. Gipasiugda ni apostol Pablo ang kahinungdanon sa pagtuo aron matagamtam ang pag-atiman sa Diyos. Siya misulat: “Kon walay pagtuo imposible ang pagpahimuot kaniya, kay siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.”—Hebreohanon 11:6.

Matikdi nga ang matang sa pagtuo nga makapahimuot sa Diyos adunay duha ka bahin. Una, angay kitang “motuo nga siya mao,” buot ingnon, angay kitang motuo nga ang Diyos naglungtad ug siya ang atong Supremong Magmamando nga angayng sundon ug simbahon. Ikaduha, angay kitang motuo nga siya maoy “tigganti sa mga matinuorong nagapangita kaniya.” Ang pagbaton ug tinuod nga pagtuo nagpasabot nga ang usa kombinsido gayod nga ang Diyos interesado sa kaayohan sa tanang naningkamot sa pagbuhat sa iyang kabubut-on ug nga siya magganti kanila. Pinaagi sa pagtuon sa Bibliya ug sa pagpakig-uban sa mga tawong nagsimba kaniya, ikaw makabaton ug matang sa pagtuo nga moresultag mga panalangin gikan sa Diyos.

Daghan karon ang nagtuo nga ang Diyos walay pagpakabana sa mga tawo. Apan, sumala sa ato nang nakat-onan, ang Bibliya tin-awng nagpakita nga ang Diyos nagtagad gayod sa mga tawong adunay tinuod nga pagtuo kaniya. Bisan kon ang atong kinabuhi karon punog kagul-anan, kabalaka, kapakyasan, ug kasakit, dili kita angayng mawad-ag paglaom kay si Jehova nagmahal gayod kanato. Gani, siya mahigugmaong nagdapit kanato nga moduol kaniya alang sa tabang. “Itugyan ang imong palas-anon kang Jehova, ug siya magasapnay kanimo,” miingon ang salmista. “Dili gayod niya itugot nga matarog ang matarong.”—Salmo 55:22.

[Footnote]

[Kahon/Hulagway sa panid 29]

Mga Teksto nga Makapalig-on sa Imong Pagtuo nga ang Diyos Mahigugmaong Nagtagad Kanimo

“Kon mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.”—2 CRONICAS 16:9

“Isulod ang akong mga luha sa imong botelya nga panit. Dili ba anaa man sila sa imong basahon?”—SALMO 56:8

“Si Jehova mao ang akong Magbalantay. Walay makulang kanako.”—SALMO 23:1

“Oh Tigpatalinghog sa pag-ampo, nganha kanimo moduol ang tanang matang sa katawhan.”—SALMO 65:2

“Ikaw motawag, ug ako motubag kanimo. Kay ikaw mangandoy sa buhat sa imong mga kamot.”—JOB 14:15

“Siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.”—HEBREOHANON 11:6

“Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.”—SALMO 55:22