Mausab ba ang Hunahuna sa Diyos?

KON bahin sa Diyos, ang Bibliya nag-ingon: “Kaniya walay pagkausab sa pagbalhin sa landong.” Ug ang Diyos mismo nagpasalig: “Ako si Jehova; ako dili mausab.” (Santiago 1:17; Malaquias 3:6) Si Jehova nga Diyos dili sama sa uban nga dili kasaligan ug lisod pahimut-an tungod kay mag-usab-usab ang ilang hunahuna!

Ang ubang mga magbabasa sa Bibliya nakapangutana kon diha bay higayon nga nausab ang hunahuna sa Diyos. Pananglitan, dihay higayon nga gihatagan ni Jehova ang mga Kristohanon ug gahom sa paghimog mga milagro, apan karon wala na. Sa karaang panahon, gipalabay sa Diyos ang poligamiya o pagpangasawag daghan, apan karon wala na. Sa Moisesnong Balaod, gibaod ni Jehova ang pagsunod sa Igpapahulay, apan karon wala na. Dili ba nagpakita kini nga nausab ang hunahuna sa Diyos?

Una sa tanan, makasalig gayod kita nga dili usbon sa Diyos ang iyang mga sukdanan sa gugma ug hustisya. Dugang pa, ang iyang “walay kataposang katuyoan” nga panalanginan ang tanang katawhan pinaagi sa iyang Gingharian wala gayod mausab. (Efeso 3:11) Apan, sama ra nga mausab ang imong tinamdan sa usa ka tawo kansang kinaiya kanunayng magpalagot kanimo, ang pagsanong ni Jehova mausab depende sa kahimtang.

Usbon usab sa Diyos ang iyang mga instruksiyon ngadto sa iyang katawhan depende sa ilang situwasyon ug panginahanglan. Dili kita angayng matingala niini. Hunahunaa kon unsay buhaton sa usa ka maayong tour guide kon makamatikod siya nga dunay peligro sa unahan. Iyang sultihan ang iyang grupo nga moagi sa laing agianan aron mahilayo sa peligro. Apan wala kana magpasabot nga nausab na ang iyang  hunahuna, ug dad-on na niya sila sa laing destinasyon, dili ba? Nan, atong susihon ang tulo ka pananglitan nga gikalibgan sa ubang mga tawo nga gihisgotan sa ibabaw.

Nganong Wala nay mga Milagro Karon?

Nganong gihatagan sa Diyos ang mga Kristohanon sa unang siglo ug gahom sa paghimog mga milagro? Lagmit nahibalo ka nga sa dihang ang Israel mao pay piniling nasod, sagad nga ipasundayag sa Diyos ang iyang pagpaluyo kanila pinaagig mga milagro. Pinaagi kang Moises, gipakita sa Diyos ang iyang kahibulongang gahom sa dihang iyang giluwas ang mga Israelitas gikan sa Ehipto ug gigiyahan sila sa kamingawan paingon sa Yutang Saad. Ikasubo, ang mga Israelitas wala magpakitag pagtuo. Sa dihang gisalikway ni Jehova ang Israel ug gitukod ang Kristohanong kongregasyon, siya naghatag ug gahom sa mga apostoles ug sa uban pa. Pananglitan, giayo nila apostol Pedro ug Juan ang usa ka lalaki nga natawong bakol, ug gibanhaw ni Pablo ang usa ka tawo nga namatay. (Buhat 3:2-8; 20:9-11) Ang maong mga milagro nakatabang aron ang mga tawo sa daghang kayutaan motuo sa Kristohanong pagtulon-an. Kon mao, nganong gihunong man ang mga milagro?

Si apostol Pablo nagtubag niana pinaagig usa ka ilustrasyon: “Sa dihang ako bata pa, ako nagasulti ingon sa usa ka bata, naghunahuna ingon sa usa ka bata, nangatarongan ingon sa usa ka bata; apan karon nga ako hingkod na, ako nang giwagtang ang mga kinaiya sa usa ka bata.” (1 Corinto 13:11) Sama ra nga ang mga ginikanan dili parehas ug pagtratar sa ilang gamay pa nga anak ug sa ilang hingkod na nga anak, ang paagi sa pagpakiglabot ni Jehova sa Kristohanong kongregasyon nausab sa dihang kini dili na “bata.” Si apostol Pablo miingon nga ang mga gasa sa pagbuhat ug milagro sama sa pagsultig lainlaing pinulongan o pagpanagna “wagtangon ra.”—1 Corinto 13:8.

Nganong Gipalabay sa Diyos ang Poligamiya?

Gipakita ni Jesus nga ang Diyos nagtakda ug sukdanan sa kaminyoon sa dihang Iyang giingnan ang unang magtiayon: “Ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod.” (Mateo 19:5) Ang kaminyoon maoy tibuok kinabuhi nga panag-ubanay sa duha ka tawo. Apan sa panahon nga gihatag ang Balaod ngadto sa mga Israelitas, ang poligamiya nabatasan na. Busa, bisag dili ang Diyos ang nagpasiugda sa poligamiya, siya naghatag ug mga balaod aron makontrolar kini. Sa dihang natukod ang Kristohanong kongregasyon, ang Pulong sa Diyos tin-awng nagdili sa poligamiya.—1 Timoteo 3:2.

Palabyon ni Jehova ang pipila ka butang hangtod sa panahon nga iya kining tul-iron. (Roma 9:22-24) Gipakita ni Jesus nga gipalabay una ni Jehova ang sayop nga kostumbre sa kaminyoon tungod sa “katig-a sa kasingkasing” sa nasod sa Israel.—Mateo 19:8; Proverbio 4:18.

Nganong Temporaryo ra ang Pagsunod sa Igpapahulay?

Ang Diyos nagsugo nga kinahanglang sundon ang senemanang Igpapahulay human niya luwasa ang mga Israelitas gikan sa Ehipto. Sa ulahi  iya kanang gilakip sa Balaod sa nasod. (Exodo 16:22-30; 20:8-10) Si apostol Pablo nagsaysay nga si Jesus nagtanyag sa iyang kaugalingon ingong halad ug iyang “gihanaw . . . ang Balaod sa mga sugo nga naglangkob ug mga mando” ug “gipapas ang sinulat-sa-kamot nga dokumento.” (Efeso 2:15; Colosas 2:14) Ang butang nga “gihanaw” ug “gipapas” naglakip sa balaod sa Igpapahulay, tungod kay ang Bibliya nag-ingon: “Busa ayaw tugoti nga adunay maghukom kaninyo bahin sa pagkaon ug sa pag-inom o bahin sa usa ka pangilin o sa pagsaulog sa bag-ong bulan o sa usa ka igpapahulay.” (Colosas 2:16) Apan nganong ang Diyos naghatag pa man sa Balaod, nga naglakip sa Igpapahulay?

Si apostol Pablo misulat: “Ang Balaod nahimong atong magtutudlo nga nagatultol ngadto kang Kristo.” Dayon siya midugang: “Karon nga miabot na ang pagtuo, kita dili na ilalom sa usa ka magtutudlo.” (Galacia 3:24, 25) Wala usba sa Diyos ang iyang hunahuna, hinunoa iyang gigamit ang Igpapahulay ingong temporaryong kahikayan sa pagtudlo sa mga tawo nga sila kinahanglang maggahin kanunay ug panahon alang sa espirituwal nga mga butang. Bisag temporaryo ra ang balaod sa Igpapahulay, kini naglandong sa panahon sa dihang ang mga tawo bug-os nang mopahulay gikan sa mga problema sa pisikal ug espirituwal.—Hebreohanon 4:10; Pinadayag 21:1-4.

Kasaligan ug Mahigugmaon nga Diyos

Ang mga pananglitan sa Bibliya nga gihisgotan sa ibabaw nagpakita nga si Jehova nga Diyos naghatag ug lainlaing sugo ug mga instruksiyon sa lainlaing panahon. Apan wala kana magpasabot nga nausab ang iyang hunahuna. Hinunoa, siya milihok sumala sa panginahanglan sa iyang katawhan ubos sa lainlaing kahimtang, ug iyang gibuhat kana alang sa ilang kaayohan. Ingon gihapon niana si Jehova karon.

Tungod kay si Jehova wala mag-usab sa iyang mga sukdanan, kita makahibalo gayod kon unsay atong buhaton aron mapahimut-an siya. Dugang pa, kita makaseguro nga ang tanang gisaad sa Diyos matuman gayod. Si Jehova nag-ingon: “Ang tanang butang nga akong gikahimut-an akong pagabuhaton . . . Akong giumol kini, akong pagabuhaton usab kini.”—Isaias 46:10, 11.

[Blurb sa panid 21]

Dili usbon sa Diyos ang iyang mga sukdanan sa gugma ug hustisya

[Blurb sa panid 22]

Si apostol Pablo nagsaysay nga ang milagrosong mga gasa “wagtangon ra”

[Blurb sa panid 23]

Ang kaminyoon maoy tibuok kinabuhi nga panag-ubanay sa duha ka tawo