Kon sa Unsang Paagi Imong Masabtan ang Bibliya

3. Dawata ang Tabang sa Uban

Sa dihang ang eksplorador nga si Edward John Eyre mibiyahe latas sa awaaw nga Kapatagan sa Nullarbor. Siya gitudloan sa mga Aborigine kon unsaon pagkuhag tubig sa mga bungdo sa balas diha sa desyerto ug sa kahoyng eucalyptus. Tungod kay iyang gidawat ang tabang sa mga tawo nga suheto sa maong lugar, naluwas ang iyang kinabuhi.

KINI nga kasinatian nagpakita nga kinahanglan natong dawaton ang tabang sa mas eksperyensiyadong tawo aron mahimo ang usa ka malisod nga buluhaton. Ingon usab niana ang kahimtang kon bahin sa pagbasag Bibliya.

Si Jesus nahibalo nga ang iyang mga tinun-an nagkinahanglag tabang aron masabtan ang Bibliya. Sa usa ka higayon, “gibuksan niya sa bug-os ang ilang mga kaisipan aron masabtan ang kahulogan sa mga Kasulatan.” (Lucas 24:45) Nahibalo si Jesus nga ang mga magbabasa sa Bibliya nagkinahanglag tabang aron ilang masabtan ang mga pagtulon-an niini.

Kinsa ang Motabang?

Si Jesus nagsugo sa iyang mga tinun-an sa paghatag niini nga tabang. Sa wala pa mosaka si Jesus sa langit, siya naghatag ug sugo: “Panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa  pagtuman sa tanang butang nga akong gisugo kaninyo.” (Mateo 28:19, 20) Ang pagtudlo mao ang pangunang buluhaton sa mga Kristohanon. Lakip niana ang pagsaysay kon sa unsang paagi mapadapat ang mga prinsipyo sa Bibliya diha sa adlaw-adlawng pagkinabuhi. Ang tinuod nga mga Kristohanon motabang sa uban nga masabtan ang Bibliya.

Wala madugay human sa paghatag ni Jesus sa maong sugo, dihay usa ka talagsaong hitabo. Ang Bibliya nag-asoy bahin sa usa ka hataas nga opisyal gikan sa Etiopia nga nagbasa sa usa ka bahin sa tagna ni Isaias. Sa iyang pagbasa, dihay mga butang nga wala niya masabti. Siya nalibog niining tekstoha: “Ingon sa usa ka karnero siya gidala aron ihawon, ug ingon sa usa ka nating karnero nga walay timik atubangan sa tigtupi niini, maingon man siya wala magbuka sa iyang baba. Panahon sa iyang pagkapinaubos gikuha ang paghukom gikan kaniya. Kinsa man ang mosaysay sa mga detalye sa iyang kaliwatan? Tungod kay ang iyang kinabuhi gikuha man gikan sa yuta.”—Buhat 8:32, 33; Isaias 53:7, 8.

Ang opisyal nangutana kang Felipe, nga usa ka Kristohanon nga sinati kaayo sa Bibliya: “Bahin kang kinsa nagsulti ang manalagna niini? Bahin  ba sa iyang kaugalingon o bahin sa lain pang tawo?” (Buhat 8:34) Ang sinserong Etiopianhon gikan nang misimba sa Jerusalem, ug lagmit siya nag-ampo alang sa giya. Tataw nga matinguhaon kaayo siya nga makasabot sa iyang gibasa. Bisan pa niana, wala niya kana masabti. Sa kamapaubsanon, siya nangayog tabang kang Felipe. Nalipay kaayo siya sa pagsaysay ni Felipe mao nga siya midesisyon nga mahimong Kristohanon.—Buhat 8:35-39.

Gipadayon sa mga Saksi ni Jehova ang sama sa gihimo ni Felipe ug sa unang mga Kristohanon. Sa kapin sa 235 ka kayutaan, ang mga Saksi kinabubut-ong nagtabang sa uban nga makasabot sa kon unsa gayoy gitudlo sa Bibliya. Ilang gibuhat kini pinaagi sa pagtudlo sa mga pagtulon-an sa Bibliya nga tema por tema. Kining progresibong paagi sa pagtuon sa Bibliya naglakip sa pagsusi sa kon unsay gisulti sa Bibliya bahin sa usa ka ulohan. a—Tan-awa ang kahon nga  “Makapatagbaw nga mga Tubag sa mga Pangutana Bahin sa Bibliya.”

“Natubag ang Tanan Nakong Pangutana”

Si Steven, Valvanera, ug Jo-Anne, nga gihisgotan sa unang artikulo, misugod sa pagtuon sa Bibliya uban sa mga Saksi ni Jehova. “Nahingangha ko tungod kay pinaagi lamang sa pagsusi sa pipila ka prinsipyo o mga asoy diha sa Bibliya, imo na dayong makaplagan ang tubag,” matod ni Steven. “Sa wala pa ko magtuon sa Bibliya uban sa mga Saksi, walay nakatudlo kanako kon unsaon kana pagbuhat. Nalipay ko sa pagkahibalo nga ang Bibliya naghatag ug tin-awng mga tubag ug kini wala magkasumpaki.”

Ingon usab niana ang komento ni Valvanera. “Ang tanan nakong nakat-onan tin-aw ug may pasikaranan gayod,” matod niya. “Akong nakat-onan nga dili diay angayng motuo sa mga butang tungod lang kay kini gitudlo sa ‘Simbahan,’ kondili tungod kay kini adunay lig-ong basehanan.” Si Jo-Anne miingon: “Kay natubag ang tanan nakong pangutana gikan mismo sa Bibliya, ako mibatig lawom nga pagtahod sa Diyos tungod kay Siya nagtaganag makapatagbawng tubag sa mga pangutana sa tawo.”

Duna ka bay nailhan nga Saksi ni Jehova? Nganong dili nimo siya hangyoon nga dumalahan kag pagtuon sa Bibliya? Kon wala kay kaila nga mga Saksi ni Jehova, palihog pagsulat sa usa sa mga adres nga nalista sa panid 4 niining magasina. Pinaagi sa tabang sa balaang espiritu sa Diyos, bukas nga hunahuna, tabang sa usa ka kuwalipikadong magtutudlo sa Bibliya, dili ka malisdan sa pagtuon sa Pulong sa Diyos. Mahimo nimong masabtan ang Bibliya!

[Footnote]

[Kahon/Hulagway sa panid 8]

 Makapatagbaw nga mga Tubag sa mga Pangutana Bahin sa Bibliya

Pipila sa mga pangutana nga nalakip sa programa sa pagtuon sa Bibliya sa mga Saksi ni Jehova:

• Unsa ang katuyoan sa Diyos alang sa yuta?

• Asa ang mga patay?

• Kita ba nagkinabuhi na sa “kataposang mga adlaw”?

• Nganong gitugotan sa Diyos ang pag-antos?

• Sa unsang paagi magmalipayon ang among pamilya?

[Mga hulagway sa panid 7]

Aron imong masabtan ang Bibliya . . . pag-ampo alang sa espiritu sa Diyos, buksi ang imong hunahuna, ug dawata ang tabang sa uban