Ang Bibliya Makabag-o sa Kinabuhi

Unsay nakapabag-o sa usa ka babaye nga nawad-ag pagsalig sa relihiyon kaniadto, apan karon naggugol na ug daghang oras sa pagtabang sa uban nga makakat-on bahin sa Diyos? Unsay nakapausab sa usa ka lalaking mahiligon sa pintas nga mga esports nga mahimong mahigugmaon sa kalinaw? Unsay nakatabang sa usa ka lalaki nga adik, palahubog, ug hilig makig-away sa pag-usab sa iyang kinabuhi? Tagda kon unsay ilang gisulti bahin niini.

NGALAN: PENELOPE TOPLICESCU

EDAD: 40

NASOD: AUSTRALIA

KANIADTO: NAWAD-AG PAGSALIG SA RELIHIYON

KAAGI: Natawo ako sa Sydney, Australia, apan sa dihang ako dos anyos, ang among pamilya mibalhin sa New Guinea. Halos duha ka tuig kaming nagpuyo sa Rabaul ug walo ka tuig usab sa Bougainville. Niadtong panahona, walay TV sa New Guinea, busa ang kalingawan namo sa akong manghod nga lalaki mao ang paglangoylangoy, pag-snorkel, ug pagkamping.

Sa dihang ako hapit nang mag-diyes anyos, ako nainteres sa relihiyon. Ang akong mama maoy usa ka Katoliko, busa iya kong gipaapil sa klase sa pagtuon sa Bibliya nga gidumala sa usa ka madre sa among dapit. Akong gidawat ang pagtulon-an sa Katolisismo ug gibunyagan sa edad nga diyes anyos.

Apan, pagbalik namo sa Australia sa dihang ako tin-edyer na, ako misugod sa pagduhaduha sa akong relihiyon. Sa dihang ako naghayskul, ako nagtuon bahin sa kasaysayan sa karaang panahon, ug kami sa akong amahan kanunayng mag-estorya bahin sa sinugdanan sa relihiyon ug sa mga sugilanon sa Bibliya nga among gituohang sugilambong. Sa ngadtongadto, ako mibiya sa pagka-Katoliko.

Ang akong ginikanan nagbulag sa dihang ako 16 anyos. Si Mama nalisdan gayod sa iyang kahimtang mao nga ako miipon sa akong amahan ug sa iyang puyopuyo. Ang akong manghod nagpabilin sa poder ni Mama, ug sila mibalhin sa laing lugar. Grabe ang akong kaguol sa maong mga panahon. Duha ka tuig nga wala nako tinggi ang akong inahan. Ako nag-inom-inom, nagdroga, ug nag-adtog mga parti. Miundang ako sa pag-eskuyla, nanarbaho, ug nagkinabuhing imoral pag-edad nakog kapin sa 20 anyos.

Sa dihang ako nag-edad ug 25, mibalik ang akong interes sa Bibliya. Ako nakakitag laing trabaho ug akong nakaila si Liene, usa ka buotan nga  babaye nga matinahoron sa iyang amo bisan pag dili maayo ang tinagdan kaniya. Sa dihang ako siyang gipangutana kon nganong nakaantos siya niana, siya mitubag nga siya nagtuon ug Bibliya uban sa mga Saksi ni Jehova ug naningkamot sa pagpadapat sa iyang mga nakat-onan. Gitanyagan ko ni Liene nga magtuon usab sa Bibliya. Apan tungod kay wala ako makasabot sa iyang gisulti, nagtuo ko nga akong makat-onan ang tanan niyang nahibaloan sa Bibliya sulod lang sa usa ka oras. Nianang gabhiona, si Liene migugol ug tulo ka oras sa pagtubag sa tanan nakong pangutana. Nakadayeg kaayo ko kay ang iyang mga tubag gipasukad sa Bibliya.

Nahinumdom ko nga nianang gabhiona samtang nagdrayb ko pauli human sa among panag-estoryahanay ni Liene, ako mibatig kalagot sa Diyos kay iyang gipalabay ang taas nga panahon una ko nakakat-on sa kamatuoran. Nahibalo ko nga ang mga Saksi hinlo sa moral, ug sa akong hunahuna ulahi na para magbag-o ko. Naghunahuna usab ko nga dili ko makahimo sa pagsangyaw sa balaybalay sama sa gihimo sa mga Saksi. Bisan pa niana, mipadayon ako sa pagtuon uban kanila. Ang akong motibo mao ang pagpangitag sayop sa ilang mga pagtulon-an aron dili ko makonsensiya nga mohunong sa pagtuon uban kanila. Apan wala gayod ako makakitag sayop sa ilang pagtulon-an.

KON SA UNSANG PAAGI GIBAG-O SA BIBLIYA ANG AKONG KINABUHI: Samtang nagkadaghan ang akong nakat-onan sa Bibliya bahin sa mga prinsipyo sa moral, misamot kahasol ang akong konsensiya. Aron mamenosan ang kahasol sa akong konsensiya, ako mihunong sa paggamit ug droga. Apan sa dihang mibalhin ako sa laing nasod, ako misugod na usab sa pag-adto sa mga parti ug mibalik sa pag-inom-inom. Daw sa matag higayon nga ako maningkamot sa pagsunod sa mga prinsipyo sa Bibliya, ako mobalik sa akong kanhing mga kalihokan. Uban sa kaulaw, ako moampo kang Jehova, apan ako maguol gihapon.

Migaan ang akong pagbati sa dihang akong nakat-onan diha sa Bibliya nga gipasaylo ni Jehova ang pagpanapaw ni Haring David uban ni Batseba. Sa dihang gitambagan si David, siya miangkon sa iyang sala ug wala magpakamatarong sa iyang kaugalingon. Mapainubsanon usab niyang gidawat ang disiplina. (2 Samuel 12:1-13) Sa matag higayon nga masipyat ko, akong palandongon ang maong asoy ug nahimong mas dali kanako ang pagpangayog pasaylo kang Jehova. Dayon akong gihimong tumong nga mag-ampo kang Jehova sa dili pa ako matental imbes nga human makasala, ug kana dakog natabang kanako.

MGA KAAYOHAN NGA AKONG NABATONAN: Kaniadto, dali ra kaayo kong masuko. Apan ang Efeso 4:29-31 nakatabang kanako sa pagkaamgo nga kinahanglan nakong likayan ang “kayugot ug kasuko ug kapungot.” Sa dihang nakakat-on ako sa pagpugong sa akong kasuko, nakakat-on usab ako sa paglikay sa dili maayong sinultihan. Dugang pa, ang tambag ni Jesus nga ‘himoa ang inyong pulong nga Oo magkahulogan ug Oo’ nakatabang kanako nga mahimong mas determinado sa pagbuhat kon unsay husto.—Mateo 5:37.

Ang akong inahan, kinsa sa sinugdan misupak sa akong pagpakig-uban sa mga Saksi, miingon sa ulahi nga siya mapasigarbohon kanako. Miingon pa gani siya nga, “Nahibalo ko nga nahimo kang buotan dili tungod sa akong paagi sa pagpadako kanimo, kondili tungod sa imong mga nakat-onan bahin kang Jehova.” Nalipay kaayo ko sa iyang gisulti.

Karon ang akong kinabuhi aduna nay katuyoan ug kahulogan. Sa milabayng siyam ka tuig, kami sa akong bana nag-alagad ingong bug-os panahong mga magtutudlo sa Bibliya. Oo, ako nagasangyaw sa balay ug balay, ug ako nahibalo nga kini mao ang labing magantihong buluhaton nga akong nahimo.

NGALAN: DENIS BUSIGIN

EDAD: 30

NASOD: RUSYA

KANIADTO: KARATISTA

 KAAGI: Ako natawo sa siyudad sa Perm’ ug nagdako sa Furmanov, nga usa ka siyudad sa rehiyon sa Ivanovo, Rusya nga may mga 40,000 ka molupyo. Ang matahom nga siyudad sa Furmanov adunay daghang nindot nga mga kahoy nga ang mga dahon niini mahimong dalag ug pula panahon sa tinghunlak. Sa katuigan sa 1980 ug sa 1990, midagsang ang krimen sa siyudad. Pobre ang among pamilya. Kami sa akong ginikanan ug manghod nga lalaki nagpuyo sa usa ka apartment nga may usa lang ka kuwarto, busa medyo naghuot kami didto.

Sa edad nga siyete, ako nagtuon ug karate. Gusto kaayo nako ang maong esports, ug gani diha nasentro ang akong kinabuhi. Ang tanan nakong ekstrang panahon akong gigugol diha sa gym, busa ang tanan nakong mga higala mahiligon sa esports. Sa edad nga 15, ako nahimong red belter, ug usa ka tuig sa ulahi, nahimong brown belter. Nahimo kong membro sa tem sa karate nga miapil sa dagkong mga sangka sa Rusya, Uropa ug Asia. Ang akong kaugmaon daw masanagon, apan pag-edad nakog 17, ang akong kinabuhi nausab.

Ako ug ang pipila sa akong mga higala nakahimog krimen mao nga kami gidakop. Ako gisentensiyahan ug duha ka tuig nga pagkabilanggo. Lisod kaayo ang kinabuhi sa prisohan. Apan, didto ako unang nakakita ug Bibliya. Akong gibasa ang Genesis, Salmo, ug ang Bag-ong Tugon. Ako pa ganing gisag-ulo ang pag-ampo nga Amahan Namo ug gibalikbalik kini paglitok matag gabii sa dili pa ako matulog kay naghunahuna ko nga makatabang kini kanako.

Ako nakagawas sa prisohan niadtong 2000, apan wala ko mahibalo kon unsay akong buhaton sa akong kinabuhi. Misugod ako sa paggamit ug droga. Sa maong panahon ang akong inahan namatay. Gimahal ko siya pag-ayo, ug naglisod gayod ako sa pagsagubang sa akong kaguol. Bisan pa niana, nahunong nako ang paggamit ug droga ug mibalik ako sa pag-gym. Mibalhin ako sa siyudad sa Ivanovo. Didto nakasulod akog trabaho sa usa ka grocery. Ang manedyer sa maong tindahan maoy usa ka Saksi ni Jehova. Iyang gipatin-aw kanako ang pipila ka pagtulon-an sa Bibliya ug siya nakigsabot ug laing Saksi nga modumala kanakog pagtuon sa Bibliya nga regular.

KON SA UNSANG PAAGI GIBAG-O SA BIBLIYA ANG AKONG KINABUHI: Sa akong pagtuon sa Bibliya, natandog gayod ako sa dihang akong nakat-onan ang katuyoan sa Diyos nga himoon niyang paraiso ang yuta, ug nagtinguha ako nga makuwalipikado sa pagpuyo diha niana. Akong nakat-onan nga si Jehova nga Diyos adunay taas nga mga sukdanan sa moral, ug gusto niyang sundon kana sa mga tawo. Kaniadto, kaugalingon ra nako ang akong gihunahuna. Apan akong nahibaloan nga gusto ni Jehova nga magmahunahunaon usab ako sa uban ug mag-ugmad sa mga hiyas nga wala pa nako mabatoni, sama sa pagkamaluluy-on ug pagkamahigugmaon sa kalinaw.

Sa dihang akong gipalandong ang tanang kaayo ni Jehova kanako—sama sa pagtagana sa iyang Anak ingong halad alang sa akong mga sala—akong napabilhan ang iyang gugma nga maoy nagpalihok kanako sa paghimog mga kausaban sa akong kinabuhi. Pananglitan, akong nabasa diha sa Salmo 11:5 nga gidumtan ni Jehova ang kapintasan. Busa mihunong ako sa pagtan-aw ug mga salida sa TV nga nagpasiugdag  kapintasan ug pagdumot. Mihunong usab ako sa pag-apil sa mapintas nga esports bisag lisod kadto para kanako. Ang prinsipyo sa 1 Corinto 15:33 nagpaamgo kanako nga ang mga tawo nga akong pakig-ubanan dakog impluwensiya kanako. Ang akong pagkapriso kaniadto maoy pamatuod nianang prinsipyoha. Busa mihunong ako sa pagpakig-uban sa mga tawo nga mahiligon sa mapintas nga esports.

MGA KAAYOHAN NGA AKONG NABATONAN: Ang akong pagpakig-uban sa mga Saksi ni Jehova ug pagtuon sa Bibliya nakatabang kanako nga magmatinud-anon. Pananglitan, akong nakat-onan sa Hebreohanon 13:5 nga kinahanglang magmakontento ug likayan ang gugma sa salapi. Pinaagi sa pagpadapat niining tambaga nalikayan nako ang pagpamakak ug pagpangawat.

Para kanako, hinungdanon ang panaghigalaay. Sa akong nasinati, may mga panaghigalaay nga nabungkag tungod sa kahakog o kahadlok sa ubang tawo. Ang mga Saksi ni Jehova dili hingpit, apan akong nakita nga sila may pagtahod sa mga sukdanan sa Diyos ug naningkamot gayod sa pagpadapat sa iyang tambag bahin sa pagpakiglabot sa uban. Taliwala kanila, ako nakabaton ug tinuod nga mga higala.

Naghunahuna ko kon unsa kahay nahitabo sa akong kinabuhi kon wala ako makakat-on sa pagsubay sa mga prinsipyo sa Bibliya. Tingali napriso na usab ako o kaha nagpasakit o nagpaantos sa ubang tawo. Apan karon, kauban nako ang akong maanyag nga asawa ug duha ka anak nga lalaki, ug ingong pamilya, malipayon kaayo kaming nagtabang sa uban nga makakat-on sa kamatuoran bahin sa Diyos.

NGALAN: JOSÉ CARLOS PEREIRA DA SILVA

EDAD: 31

NASOD: BRAZIL

KANIADTO: KANUNAYNG MALANGKIT SA AWAY

KAAGI: Ako nagdako diha sa hugaw kaayong eskuwater sa Americana, São Paulo. Wala kamiy hinlong tubig nga mainom ug walay maayong sanitasyon. Ang among lugar punog kapintasan ug krimen.

Midako ako nga bangis ug agresibo. Kanunay akong malangkit sa mga away diha sa kalye, mao nga gikahadlokan ako sa among mga silingan. Ang akong sininaan, hitsura, ug pamatasan nagpakita gayod nga ako barumbado. Palahubog kaayo ko, ug kasagaran mawad-an kog panimuot tungod sa sobrang kahubog. Nagdroga usab ako sama sa akong mga magulang nga lalaki. Gani, usa kanila ang namatay tungod sa sobrang paggamit ug droga.

KON SA UNSANG PAAGI GIBAG-O SA BIBLIYA ANG AKONG KINABUHI: Sa dihang nakahimamat ako ug mga Saksi ni Jehova, ilang gibasa kanako ang saad sa Bibliya nga himoon sa Diyos ang tibuok yuta nga paraiso. (Lucas 23:42, 43; Pinadayag 21:3, 4) Nasayran usab nako nga ang mga patay walay nahibaloan nga bisan unsa ug ang Diyos dili magsilot sa mga daotan diha sa nagkalayo nga impiyerno. (Ecclesiastes 9:5, 6) Nahupayan gayod ako sa pagkahibalo niana. Ang akong nakat-onan bahin sa Diyos nagpalihok kanako sa pagbag-o sa akong kinabuhi. Apan dili sayon biyaan ang pagdroga, paghubog-hubog, pagkahilig sa away, ug ang pagpamalikas.

 Bisan pa niana, ako nadasig sa giingon ni apostol Pablo sa 1 Corinto 6:9-11. Kini naghisgot bahin sa unang siglong mga tawo nga dunay daotang mga batasan nga sama kanako sa wala pa mahimong Kristohanon. Apan kining tekstoha nagpadayon sa pag-ingon: “Ingon niana ang pipila kaninyo kaniadto. Apan kamo nahugasan na, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo ug sa espiritu sa atong Diyos.” Ang maong mga pulong nakapalig-on kanako nga ako mahimong molampos sa pagbag-o sa akong kinabuhi aron mapahimut-an ang Diyos.

Sa dihang misugod ako sa pagpakig-uban sa mga Saksi ni Jehova, ako nakombinsir nga sila nagkinabuhi ingong tinuod nga mga Kristohanon. Sila nahibalo nga ako bangis ug agresibo, apan sila mainiton ug mahigugmaong nag-abiabi kanako.

MGA KAAYOHAN NGA AKONG NABATONAN: Kon wala pa ako magtuon ug Bibliya ug wala mag-usab sa akong kinabuhi, basin patay na ako karon. Hinunoa, ako nalipay sa pagtabang sa usa nako ka igsoong lalaki nga makakat-on sa Bibliya ug makalingkawas sa pagkaadik sa droga. Nadasig usab nako ang uban nakong mga paryente sa pagtuon sa Bibliya. Mapasalamaton kaayo ko nga akong napahinungod ang akong kinabuhi sa pag-alagad sa mahigugmaon kaayo nga Diyos!

[Blurb sa panid 24]

“Akong gihimong tumong nga mag-ampo kang Jehova sa dili pa ako matental imbes nga human makasala, ug kana dakog natabang kanako”