Kon sa Unsang Paagi Ka Makabaton ug Kalinaw Niining Gubot nga Kalibotan

MALINAWON ba ang imong pagpuyo? Ang tubag sa kadaghanan maoy dili. Daghan ang mga tawong nagpuyo sa mga lugar diin kaylap ang gubat, kagubot sa politika, kapintasan, o terorismo. Bisag wala ka makasinati sa maong mga kahimtang, lagmit ang imong kalinaw natugaw tungod sa krimen, pagpanghasi, ug panag-away tali sa mga kasosyo sa negosyo o sa mga silingan. Bisan diha sa pamilya mas subsob ang panaglalis kay sa pakigdait.

Daghang tawo ang gustong makabaton ug kalinaw sa hunahuna. Naningkamot sila sa pagpangita niini diha sa relihiyon, mga seminar bahin sa pagpamalandong, o pinaagig yoga. Ang uban naglaom nga makabatog kalinaw pinaagig pagbakasyon sa lainlaing lugar, pagsaka sa mga bungtod, pagbaktas diha sa kalasangan, o pagkaligo diha sa init nga mga tubod. Bisan kon ilang mabatonan ang kalinaw sa hunahuna, apan kana temporaryo lamang ug dili gayod makapatagbaw.

Busa asa ka makakaplag ug tinuod nga kalinaw? Ang tuboran sa kalinaw mao ang atong Maglalalang, si Jehova nga Diyos. Ngano? Siya mao ang “Diyos nga nagahatag ug kalinaw.” (Roma 15:33) Ilalom sa pagmando sa iyang Gingharian, nga haduol na kaayo, aduna unyay “kadagaya sa pakigdait.” (Salmo 72:7; Mateo 6:9, 10) Kini labaw pa sa hinimo sa tawong mga kasabotan sa kalinaw. Ang maong mga kasabotan kasagarang moresulta lamang ug temporaryong kalinaw. Apan ang kalinaw nga gikan sa Diyos magwagtang sa tanang hinungdan sa gubat ug panagbangi. Sa pagkatinuod, wala na unyay makakat-on pa ug gubat. (Salmo 46:8, 9) Makatagamtam na unya kita ug tinuod nga kalinaw!

 Sama sa maong maanindot nga paglaom, tingali buot mo usab nga matagamtam ang kalinaw karon. Aduna bay mga paagi aron mabatonan ang kalinaw sa hunahuna nga makatabang kanato niining gubot nga panahon? Ikalipay, ang Bibliya nagsaysay kon sa unsang paagi ato kanang mabatonan. Tagda ang pipila ka giya nga makita sa kapitulo 4 sa sulat ni apostol Pablo ngadto sa mga taga-Filipos. Palihog basaha ang Filipos 4:4-13 diha sa imong Bibliya.

“Ang Kalinaw sa Diyos”

Sa bersikulo 7 atong mabasa: “Ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” Kini nga kalinaw mabatonan dili lamang pinaagig pagpamalandong o pinaagig pagpauswag sa imong personalidad. Kondili, kini naggikan sa Diyos. Ang maong kalinaw gamhanan kaayo ug “labaw sa tanang panghunahuna.” Dag-on niini ang atong mga kabalaka, limitadong kahibalo, ug sayop nga mga pangatarongan. Tingali naghunahuna kita nga walay solusyon ang atong mga problema, apan ang kalinaw sa Diyos motabang kanato nga mopatigbabaw diha sa atong hunahuna ang paglaom nga sa umaabot wad-on na ang tanang kalisdanan.

Posible ba kana? Kon sa tawo imposible gayod; apan ang “tanang butang posible sa Diyos.” (Marcos 10:27) Ang pagtuo ug pagsalig sa Diyos motabang kanato nga dili kaayo mabalaka. Handurawa ang usa ka bata nga nawala sa usa ka mall. Siya nahibalo nga kinahanglan niyang pangitaon ang iyang inahan aron mawala ang iyang kahadlok. Sa dihang sila magkita na, siya gakson sa iyang inahan ug hupayon. Sa susama, kita usab makasalig nga ang Diyos mohupay kanato. Siya magwagtang sa tanan natong mga kabalaka.

Daghang magsisimba ni Jehova ang nakasinati sa kalinaw sa Diyos bisan pag sila nag-antos sa grabeng mga pagsulay. Tagda pananglitan si Nadine, kinsa nakuhaan sa iyang gisabak. Siya miasoy: “Nalisdan ako sa pagpakigsulti sa uban bahin sa akong gibati, ug ako nagpakaaron-ingnon nga okey ra. Apan ang tinuod, grabe kaayo ang akong kaguol. Halos kada adlaw akong nag-ampo kang Jehova aron isulti kaniya ang akong gibati ug naghangyo sa iyang tabang. Nasinati gyod nako ang gahom sa pag-ampo, kay sa dihang grabe kaayo ang akong kaguol ug naghunahuna nga, ‘dili na makaagwanta,’ ako nakabaton ug kalinaw sa hunahuna. Mibati kog kasegurohan.”

Proteksiyon sa Imong Kasingkasing ug Hunahuna

Hisgotan nato pag-usab ang Filipos 4:7. Kini nag-ingon nga ang kalinaw sa Diyos magbantay sa atong mga kasingkasing ug sa atong mga gahom sa pangisip. Sama nga ang usa ka sundalo magbantay sa dapit nga giasayn kaniya, ang kalinaw sa Diyos magbantay usab sa atong kasingkasing aron kita dili malit-agan sa materyal nga mga butang, sobrang kabalaka, ug dili diyosnong mga panggawi. Tagda ang usa ka pananglitan.

Niining gubot nga kalibotan, daghang tawo ang nagtuo nga sila makabatog kalipay ug kasegurohan kon sila daghag salapi ug kabtangan. Sila tambagan sa mga eksperto nga mamuhonan sa usa ka negosyo. Mobati ba sila ug tinuod nga kalinaw kon ila kanang buhaton? Dili sa tanang higayon. Matag adlaw lagmit mabalaka sila nga basin ug maalkansi sa ilang negosyo ug kanunayng maghunahuna kon angay ba silang mamaligya, mamalit o kaha mamuhonan. Sa dihang mounlod ang ilang negosyo, sila matarantar. Wala idili sa Bibliya ang pagnegosyo, apan kini adunay maalamong tambag: “Ang mahigugmaon lamang sa salapi dili matagbaw sa salapi, ni sa kinitaan si bisan kinsa nga mahigugmaon sa bahandi. Kini usab kakawangan. Matam-is ang pagkatulog sa usa nga nagaalagad, walay sapayan kon diyutay o daghan ang iyang gikaon; apan ang kadagaya sa dato dili magpakatulog kaniya.”—Ecclesiastes 5:10, 12.

Ang Filipos 4:7 mihinapos sa pag-ingon nga ang kalinaw sa Diyos magbantay sa atong mga kasingkasing ug sa atong mga gahom sa pangisip “pinaagi kang Kristo Jesus.” Unsay kalangkitan tali kang Kristo Jesus ug sa kalinaw sa Diyos? Si Jesus dunay hinungdanong bahin sa pagtuman sa katuyoan sa Diyos. Iyang gihatag ang iyang kinabuhi aron kita mapahigawas gikan sa sala ug kamatayon. (Juan 3:16) Siya usab ang gientronong Hari sa Gingharian sa Diyos. Ang pagkahibalo sa hinungdanong papel ni Jesus makaamot ug dako sa kalinaw sa atong hunahuna ug kasingkasing. Sa unsang paagi?

Kon kita sinserong maghinulsol sa atong mga sala ug mangayog pasaylo pinasukad sa halad  lukat ni Jesus, ang Diyos magpasaylo kanato, ug atong mabatonan ang kalinaw sa hunahuna ug kasingkasing. (Buhat 3:19) Kay kita nahibalo nga dili gayod kita bug-os nga magmalipayon hangtod nga dili pa moabot ang Gingharian sa Diyos, kita dili maghunahuna nga daw wala nay paglaom sa umaabot. (1 Timoteo 6:19) Siyempre, dili nato malikayan ang tanang kalisdanan karon, apan makakaplag kitag kahupayan sa tinuod nga paglaom nga haduol na kaayo.

Kon sa Unsang Paagi Imong Mabatonan ang Kalinaw sa Diyos

Sa unsang paagi imong mabatonan ang kalinaw sa Diyos? Ang Filipos 4:4, 5 nag-ingon: “Pagmaya kanunay diha sa Ginoo. Sa makausa pa ako magaingon, Pagmaya! Ipaila ang inyong pagkamakataronganon sa tanang tawo. Haduol na ang Ginoo.” Samtang gisulat ni Pablo kanang mga pulonga, siya anaa sa bilanggoan sa Roma. (Filipos 1:13) Imbes magreklamo sa dili-makataronganong pagbilanggo ug pagtratar kaniya, iyang gidasig ang iyang mga isigkamagsisimba nga kanunayng magmaya diha sa Ginoo. Ang iyang kalipay wala magdepende sa kon unsay iyang kahimtang, apan diha sa iyang relasyon sa Diyos. Kita usab angayng magmaya sa pag-alagad sa Diyos bisan unsa pay atong kahimtang. Kon kita nakaila pag-ayo kang Jehova ug makugihong nagbuhat sa iyang kabubut-on, mas malipay kita sa pag-alagad kaniya. Ug kana maghatag kanatog katagbawan ug kalinaw sa hunahuna.

Dugang pa, kita giawhag nga magmakataronganon. Kon kita makataronganon, kita dili magdahom ug labaw pa kay sa atong maarangan. Kita nahibalo nga kita dili hingpit, ug dili usab kita maayo sa tanang butang. Busa dili kita angayng mabalaka kon unsaon nga mahimong kinamaayohan, o kaha mahimong labaw kay sa uban. Dili usab kita magdahom ug kahingpitan sa uban. Busa, angayng magmakalmado kita kon ang uban makasala kanato. Ang orihinal nga Gregong pulong nga gihubad ug “pagkamakataronganon” mahimong hubaron usab ug “pagkamapahiuyonon.” Kon kita mapahiuyonon ug dili mapugsanon sa atong gusto, mahimong malikayan ang walay pulos nga panaglalis, nga magwala sa kalinaw sa usag usa ug sa kalinaw mismo sa atong hunahuna.

Ang kataposang bahin sa Filipos 4:5 nag-ingon nga “haduol na ang Ginoo.” Daw kasukwahi kini sa konteksto, apan kini nagpasabot nga haduol nang taposon sa Diyos kining daang sistema ug pulihan sa usa ka bag-ong kalibotan ilalom sa iyang Gingharian. Apan bisan karon ang Diyos haduol niadtong bisan kinsang moduol kaniya. (Buhat 17:27; Santiago 4:8) Ang pagkahibalo niana makapalipay kanato, makatabang kanato nga magmakataronganon ug dili mabalisa sa mga problema karon o sa umaabot, sama sa gipasiugda sa bersikulo 6.

Ang bersikulo 6 ug 7 naghisgot nga pinaagi sa pag-ampo kita makabaton ug kalinaw sa Diyos. Ang uban nagtuo nga ang pag-ampo maoy usa ka paagi sa pagpamalandong, nga naghunahunang ang pag-ampo makapakalma kanila. Apan ang Bibliya naghisgot bahin sa suod nga pagpakigsulti kang Jehova, nga sama kasuod sa pagpakigsulti sa usa ka anak ngadto sa iyang mahigugmaong ginikanan bahin sa iyang mga kalipay ug kagul-anan. Makapahupay gayod ang pagkahibalo nga kita makaampo sa Diyos bahin “sa tanang butang.” Bisan unsa nga anaa sa atong hunahuna o sa atong mga kasingkasing, mahimo natong isugid sa atong langitnong Amahan.

Ang bersikulo 8 nagdasig kanato sa pagpamalandong sa positibong mga butang. Apan dili igo ang pagpamalandong lang bahin niana. Sumala sa bersikulo 9, angay usab natong ipadapat ang tambag sa Bibliya. Ang pagbuhat niana motabang kanato sa pagbaton ug hinlong konsensiya. Tinuod gayod ang gisulti sa usa ka panultihon: Lami ang katulog sa tawong hinlo ug konsensiya!

Oo, mahimo nimong mabatonan ang kalinaw sa hunahuna. Kana naggikan kang Jehova nga Diyos, ug iya kanang ihatag niadtong gustong makigsuod kaniya ug gustong mosunod sa iyang giya. Pinaagi sa pagsusi sa iyang Pulong nga mao ang Bibliya, imong mahibaloan ang iyang kabubut-on. Ang pagpadapat sa iyang mga tambag dili kanunayng sayon. Apan kini takos gayod sa paningkamot tungod kay “ang Diyos sa kalinaw magauban kaninyo.”—Filipos 4:9.

[Blurb sa panid 10]

“Ang kalinaw sa Diyos . . . magbantay sa inyong mga kasingkasing.”—FILIPOS 4:7

[Blurb sa panid 12]

Makapahupay gayod ang pagkahibalo nga kita makaampo sa Diyos bahin “sa tanang butang”