Masabtan ba ang Bibliya?

“Kada Dominggo, ang among pamilya magbasag Bibliya. Wala kaayo ko ganahi niana. Ako nagtuo nga ang Bibliya Pulong sa Diyos, apan kadaghanan sa akong nabasa lisod kaayong sabton.”—Steven, Britanya.

“Sa nag-edad kog 17, akong gisulayan pagbasa ang Bibliya. Naglisod ko sa pagsabot niini mao nga miundang ko.”—Valvanera, Espanya.

“Akong gibasa ang Bibliya tungod kay naghunahuna ko nga isip usa ka Katoliko, kinahanglan nakong basahon kana. Nahuman nako kanag basa sulod sa tulo ka tuig! Apan wala kaayo koy nasabtan.”—Jo-Anne, Australia.

SA ATONG panahon, ang Bibliya mao gihapon ang labing popular nga basahon sa kalibotan. Kini ang labing halinon nga basahon, nga mabatonan sa mas daghang tawo ug sa mas daghang pinulongan kay sukad masukad. Dugang pa, kini mabatonan na karon sa tape, CD, DVD, ug uban pa. Apan, daghang tawo nga nakabaton ug Bibliya nalisdan sa pagsabot niini. Nalisdan ka ba usab sa pagsabot sa Bibliya?

Gusto ba sa Diyos nga Atong Masabtan ang Iyang Pulong?

Ang Bibliya nag-ingon: “Ang tibuok Kasulatan inspirado sa Diyos.” (2 Timoteo 3:16) Oo, ang mensahe sa Bibliya naggikan kang Jehova nga Diyos. Gusto ba niya nga atong masabtan ang iyang Pulong? O gituyo niya nga pipila ray makasabot niini, sama sa mga pari ug mga eskolar sa Bibliya?

Tagda ang mosunod nga mga teksto sa Bibliya:

“Kining sugo nga akong gisugo kanimo niining adlawa dili hilabihan ka lisod alang kanimo, ni halayo kini.”—Deuteronomio 30:11.

“Ang pagbutyag sa imong mga pulong magahatag ug kahayag, nga nagapasabot sa mga walay kasinatian.”—Salmo 119:130.

“Nianang taknaa mismo [si Jesus] nalipay sa hilabihan diha sa balaang espiritu ug miingon: ‘Ako nagadayeg kanimo sa dayag, Amahan, Ginoo sa langit ug yuta, tungod kay gitagoan mo nga maampingon kining mga butanga gikan sa mga maalamon ug sa mga makinaadmanon, ug nagbutyag niini ngadto sa mga bata.’”—Lucas 10:21.

Sumala sa maong mga teksto, gusto gayod sa Diyos nga imong masabtan ang iyang Pulong! Bisan pa niana, daghan ang nalisdan sa pagsabot sa Bibliya. Busa, unsay makatabang kanimo? Ang mosunod nga mga artikulo naghisgot ug tulo ka sugyot nga makatabang kanimo sa pagsabot sa Bibliya.