Ang Diyos Maghukom Sumala sa Kon Unsay Husto
Pakigsuod sa Diyos
Ang Diyos Maghukom Sumala sa Kon Unsay Husto
ANG tawhanong mga maghuhukom may tendensiya nga magpakanaog ug dili makataronganong hukom, apan dili ingon niana si Jehova—ang Diyos nga “mahigugmaon sa hustisya.” (Salmo 37:28) Siya mapailobon, apan dili matinugoton. Siya lig-ong mobarog sa kon unsay matarong. Tagda kon unsay iyang gibuhat sa dihang mitungha ang panaglalis ug rebelyon, nga narekord sa Numeros kapitulo 20.
Sa dihang hapit nang matapos ang panaw sa mga Israelitas sa kamingawan, sila nahutdag mainom nga tubig. a Ang mga tawo nakiglalis kang Moises ug Aaron, nga nag-ingon: “Nganong gidala ninyo ang kongregasyon ni Jehova niining kamingawan aron kami ug ang among mga mananap nga luwanan mangamatay dinhi?” (Bersikulo 4) Sila nagreklamo nga ang kamingawan maoy usa ka “daotan nga dapit” nga walay ‘mga igos ug mga paras ug mga granada’—mga prutas nga gidala sa mga espiyang Israelitas gikan sa Yutang Saad mga katuigan kanhi. Sila nagreklamo usab tungod kay sila walay ‘mainom nga tubig.’ (Bersikulo 5; Numeros 13:23) Ilang gibasol si Moises ug Aaron tungod kay ang kamingawan dili sama sa mabungahong yuta nga gidumilian sa nag-unang henerasyon sa reklamador nga mga Israelitas.
Si Jehova wala magsalikway sa mga reklamador. Hinunoa, iyang gisugo si Moises sa pagbuhat sa tulo ka butang: kuhaon ang iyang sungkod, tigomon ang mga tawo, ug ‘sultihan ang dakong bato sa atubangan sa ilang mga mata aron kini maghatag sa tubig niini.’ (Bersikulo 8) Gisunod ni Moises ang unang duha ka sugo, apan wala niya sunda ang ikatulo. Inay mosulti ngadto sa bato uban ang pagtuo kang Jehova, siya misultig hait nga mga pulong ngadto sa mga tawo, nga nag-ingon: “Paminaw, karon, kamong mga masuklanon! Gikan ba niining dakong bato nga kami magpagula ug tubig alang kaninyo?” (Bersikulo 10; Salmo 106:32, 33) Human niana, gihapak ni Moises ang bato sa makaduha, “ug mibuhagay ang daghang tubig.”—Bersikulo 11.
Busa, si Moises, kauban si Aaron, nakahimog seryosong sala. Ang Diyos miingon kanila: “Kamo misukol batok sa akong sugo.” (Numeros 20:24) Tungod kay gisupak ni Moises ug Aaron ang sugo sa Diyos, sila nahimo usab nga mga rebelde sama sa mga tawong ilang gihukman. Ang hukom sa Diyos tin-aw: Si Moises ug Aaron dili na manguna sa mga Israelitas ngadto sa Yutang Saad. Bug-at ra ba kaayo ang maong hukom? Dili, tungod sa pipila ka katarongan.
Una, ang Diyos wala magsugo kang Moises nga makigsulti sa mga tawo, ug wala usab siya magsugo nga hukman sila. Ikaduha, wala pasidunggi ni Moises ug Aaron ang Diyos. ‘Kamo wala magbalaan kanako,’ ang Diyos miingon. (Bersikulo 12) Sa dihang si Moises ug Aaron miingon, “kami magpagula ug tubig,” ilang giangkon nga sila, dili ang Diyos, ang nagpatunghag tubig sa milagrosong paagi. Ikatulo, ang hukom sa Diyos kang Moises ug Aaron parehas sa iyang hukom sa mga rebelde kaniadto. Ang Diyos mihukom sa mga rebelde kaniadto nga sila dili makasulod sa Canaan, ug mao usab kanay Iyang hukom kang Moises ug Aaron. (Numeros 14:22, 23) Ikaupat, sila maoy mga lider sa Israel. Kadtong gitugyanan ug bug-at nga mga responsabilidad mas dakog tulubagon sa Diyos.—Lucas 12:48.
Si Jehova maghukom sumala sa kon unsay husto. Tungod kay siya mahigugmaon sa hustisya, siya dili gayod magpakanaog ug hukom nga dili makataronganon. Dayag, ang Diyos takos gayod sa atong pagsalig ug pagtahod.
[Footnote]
a Human makagawas sa Ehipto ang mga Israelitas, sila andam na sa pagsulod sa Canaan, ang yuta nga gisaad sa Diyos kang Abraham. Apan sa dihang ang napulo ka espiya nagdalag daotang taho, ang mga Israelitas mireklamo batok kang Moises. Busa, si Jehova mihukom nga sila mogugol ug 40 ka tuig diha sa kamingawan—igo-igong panahon nga mangamatay ang tanang rebelde.