Ang Diyos ba Nagsaad Kanimog mga Bahandi?

‘Gusto sa Diyos nga madato ka—makabatog mga sakyanan ug malamboong negosyo. Salig lang kaniya, ablihi ang imong pitaka, ug ihatag ang tanan nimong maarangan.’

MAO kana ang ginatudlo sa pipila ka grupo sa relihiyon sa Brazil, sumala pa sa usa ka mantalaan didto. Ug kana gituohan sa kadaghanan. Gisurbi ang mga tawo nga nag-angkong Kristohanon sa Amerika, ug bahin niana ang magasing Time nag-ingon: “Ang 61% nagtuo nga gusto sa Diyos nga moharuhay ang kinabuhi sa mga tawo. Ug ang 31% . . . nagtuo nga kon imong ihatag ang imong kuwarta ngadto sa Diyos, ang Diyos magpanalangin kanimo ug mas daghang kuwarta.”

Ang pagtulon-an nga sama niini, nga sagad gitawag ug teolohiya sa kauswagan, mikaylap ilabina sa mga nasod sa Latin Amerika, sama sa Brazil, ug daghang tawo ang nanghugop sa mga simbahan nga nagsaad ug materyal nga mga panalangin gikan sa Diyos. Apan tinuod ba nga ang Diyos nagsaad nga madato ang mga tawo nga mag-alagad kaniya? Bahandianon ba ang tanang alagad sa Diyos sa karaang panahon?

Tinuod, atong mabasa diha sa Hebreohanong Kasulatan nga sa dihang magpanalangin ang Diyos, sagad magpasabot kana ug materyal nga kadagaya. Pananglitan, sa Deuteronomio 8:18, atong mabasa: “Hinumdoman mo si Jehova nga imong Diyos, tungod kay siya ang maghahatag ug gahom kanimo aron sa pagbaton ug bahandi.” Kini nagpasalig sa mga Israelitas nga kon sila magmatinumanon sa Diyos, siya maghimo sa ilang nasod nga malamboon.

Komosta ang indibiduwal nga mga alagad sa Diyos? Ang matinumanong alagad nga si Job dato kaayo, ug human ipahinabo ni Satanas nga mahimong kabos si Job, gipasig-uli ni Jehova ang tanan niyang kabtangan nga “doble pa.” (Job 1:3; 42:10) Si Abraham dato usab nga tawo. Ang Genesis 13:2 nag-ingon nga siya “daghan kaayog panon sa mga hayop ug plata ug bulawan.” Sa dihang gibihag ang iyang pag-umangkon nga si Lot sa kasundalohan sa upat ka hari sa Sidlakan, iyang ‘gitigom ang iyang binansay nga mga tawo, tulo ka gatos ug napulog-walo ka ulipon nga natawo sa iyang panimalay.’ (Genesis 14:14) Tungod kay si Abraham adunay 318 ka “binansay nga mga tawo” sa pagpakiggubat, makaingon kita nga daghan kaayo ang sakop sa iyang panimalay. Ug kay siya nakasuportar ug ingon niana ka daghan nga mga tawo, kana nagpaila nga siya dato kaayo ug nakabaton ug dakong panon sa kahayopan.

Oo, daghan sa matinumanong mga alagad sa Diyos sa karaang panahon sama nila ni Abraham, Isaac, Jacob, David, Solomon, ug uban pa maoy dato nga mga tawo. Apan, kini ba nagpasabot nga madato ang tanang tawo nga moalagad sa Diyos? Sa laing bahin, nagpasabot ba usab kini nga wala panalangini sa Diyos ang kabos nga mga tawo? Ang sunod nga artikulo magtubag niini nga mga pangutana.