Ang Kakabos ba Timaan sa Kawalay Pag-uyon sa Diyos?

GIINGNAN sa Diyos ang mga Israelitas sa karaang panahon: ‘Angay nga walay mahimong kabos sa inyong taliwala.’ Kini tungod kay diha sa Balaod nga iyang gihatag kanila, adunay mga sugo bahin sa pag-atiman sa mga kabos ug bisan sa pagpahigawas kanila sa ilang mga utang. (Deuteronomio 15:1-4, 7-10) Busa, wala gayod untay kabos taliwala sa mga Israelitas tungod kay si Jehova nagsaad nga siya magpanalangin kanila. Apan, ang maong panalangin nagdepende sa ilang pagsunod sa Balaod, ug ang mga Israelitas napakyas sa pagbuhat niana.

Bisan pa niana, ang pagkahimong kabos sa materyal wala magpasabot sa kawalay pag-uyon sa Diyos, sama ra nga ang pagkahimong bahandianon dili timaan sa iyang pag-uyon. Daghan sa matinumanong mga alagad sa Diyos maoy mga kabos. Ang propetang si Amos maoy usa ka kabos nga magbalantay sa karnero ug usa ka mamumuo. (Amos 1:1; 7:14) Sa dihang dihay hulaw sa Israel sa panahon ni propetang Elias, siya gitabangan sa usa ka kabos nga babayeng balo, kinsa adunay diyutayng harina ug lana nga sa milagrosong paagi wala mahurot panahon sa hulaw. Si Elias ug ang babayeng balo wala mahimong dato; igo lang gitagana ni Jehova kon unsay ilang gikinahanglan.—1 Hari 17:8-16.

Ang wala-damhang mga panghitabo mahimong hinungdan sa kalit nga pagkahugno sa pinansiyal. Ang aksidente o kaha sakit lagmit mahimong hinungdan nga ang usa ka tawo dili na makatrabaho. Ang kamatayon sa usa ka amahan mahimong magpahinabog kalisdanan sa nahibiling membro sa iyang pamilya. Ang maong malisod nga mga kahimtang wala magpasabot sa kawalay pag-uyon sa Diyos. Ang asoy bahin kang Noemi ug Ruth maoy usa ka makapadasig nga pananglitan sa mahigugmaong pag-atiman ni Jehova sa mga kabos. Bisag kabos kaayo si Noemi ug Ruth tungod sa pagkamatay sa ilang mga bana, si Jehova nga Diyos nagpanalangin kanila ug nagtagana sa ilang mga panginahanglan.—Ruth 1:1-6; 2:2-12; 4:13-17.

Dayag nga ang kakabos dili timaan sa kawalay pag-uyon sa Diyos. Kadtong matinumanon kang Jehova makasalig gayod sa mga pulong ni Haring David, nga nag-ingon: “Batan-on ako kaniadto, ako natigulang na usab, apan wala ako makakita ug matarong nga gibiyaan sa bug-os, ni sa iyang kaliwat nga nagapangita ug tinapay.”—Salmo 37:25.

[Hulagway sa panid 8]

Bisag kabos kaayo si Noemi ug Ruth, sila mahigugmaong giatiman ug gipanalanginan sa Diyos