Sulat Gikan sa Bolivia

Malipayon ug Positibo Bisan pa sa Kakabos

INGONG misyonaryo sa usa ka kabos nga nasod, ako maguol nga magtan-aw sa mga tawo nga kabos ug walay paglaom. Gusto unta kog dihadihang kahupayan sa ilang mga pag-antos. Apan nahibalo ko nga ang makasulbad sa ilang mga problema mao lamang ang Gingharian sa Diyos. Bisan pa niana, akong napamatud-an sa daghang higayon nga kadtong nagsunod sa Pulong sa Diyos malipayon bisan pa sa mga kalisdanan. Si Sabina maoy usa kanila.

Pipila ka tuig kanhi, si Sabina nagkugos sa iyang duha ka anak nga babaye samtang nagtan-aw sa iyang bana nga misakay sa usa ka karaang bus aron mangitag mas maayong trabaho sa laing nasod. Milabay ang pipila ka bulan, hangtod nga gidangtan nag pipila ka tuig, apan ang iyang bana wala na mobalik. Sukad sa pagbiya sa iyang bana, si Sabina naningkamot pag-ayo sa pagtrabaho adlaw-adlaw aron matagan-an ang mga panginahanglan niya ug sa iyang mga anak nga sila si Milena ug Ghelian.

Una nakong nahimamat si Sabina, usa ka hapon niana, samtang siya puliki kaayo sa pag-atiman sa apuradong mga kustomer diha sa tindahan sa iyang magulang nga babaye. Akong nakita diha sa iyang mga mata ang kakapoy tungod sa tibuok adlaw nga pagtrabaho. Ako siyang gitanyagan ug pagtuon sa Bibliya uban sa iyang mga anak. “Gusto unta ko,” siya mitubag, “pero puliki man kaayo ko. Ang akong mga anak na lay tun-i.” Ako miuyon. Samtang nag-uswag ang pagtuon sa iyang mga anak, mas nailhan nako si Sabina ug mas nasabtan nako ang iyang lisod nga kahimtang.

Alas kuwatro pa lang sa kaadlawon, si Sabina mobangon na. Samtang ang iyang mga anak tulog pa, iya nang itak-ang ang dakong kaldero nga gamit na kaayo. Iyang lutoon ang karne nga ipalaman sa empanada nga iyang ibaligya aron isuportar sa iyang pamilya. Sa gabii pa lang, masahon na ni Sabina ang harina.

Dayon, ikarga ni Sabina sa hinulam nga kariton ang tanan niyang gamit—dakong payong, stove, tangke sa propane gas, usa ka lamesa, mga lingkoranan, mga kaldero, mantika, palaman nga karne, minasa nga harina, ug pipila ka galon sa tinimpla nga juice.

Sa alas sayis sa buntag, si Sabina ug ang iyang duha ka anak andam nang mogikan. Pagbiya nila, iyang trangkahan ang ilang balay. Samtang sila naglakaw, sila walay estorya-estorya o ngisi-ngisi. Ilang gitagana ang ilang kusog sa ilang mga buluhaton. Halos kada buntag, akong makita gikan sa among bentana ang mga eksena nga sama niana. Oo, si Sabina maoy usa lamang sa daghang mga babaye nga mogikan ug sayo aron mamaligyag pagkaon ug mainom diha sa kadalanan sa Bolivia.

Sa alas sayis imedya sa buntag, sa dihang mogimaw na ang adlaw diha sa kabukiran, si Sabina ug  ang iyang mga anak anaa na sa ilang puwesto. Ila dayong idiskarga ug ipahiluna ang ilang mga gamit. Ang mga empanada iyang ilunod diha sa init kaayong mantika, ug kini magpiti-piti samtang giprito. Ang kahumot sa iyang giluto dad-on sa bugnawng hangin nga makadani sa gipanggutom nga mga tawo.

“Pilay imo?” Si Sabina nangutana sa iyang unang kustomer. Ang lalaki nga katulgon pa igo lang mipataas sa iyang duha ka tudlo, ug siya gihatagan ni Sabina ug duha ka init pa kaayong empanada. Dayon gidawat ni Sabina ang gamayng kantidad ingong bayad. Ginatos ka tawo ang iyang silbihan sa tibuok adlaw. Kon mahurot na ang ilang baligyang empanada, manghipos na sila sa ilang mga gamit ug manguli. Bisag nanghawoy na ang mga bitiis ni Sabina sa tibuok buntag nga pagpaninda, siya motrabaho pa gyod sa tindahan sa iyang igsoong babaye.

Sa dihang miabot ako sa tindahan aron dumalahan ang iyang duha ka anak sa ilang unang pagtuon sa Bibliya, andam na ang duha ka tag-as nga bangko nga among lingkoran. Sukad pa sa sinugdan, si Milena ug Ghelian, nga nag-edad kaniadtog 9 ug 7 anyos, mahinamon ug kanunayng mangandam sa among pagtuon. Sa ngadto-ngadto, kining maulawon nga mga bata nahimo nang estoryador ug sila nasuod kanako. Kini nakapatandog sa kasingkasing ni Sabina. Wala madugay, siya nakadesisyon nga magtuon usab sa Bibliya uban kanako bisag siya puliki kaayo.

Samtang miuswag ang kahibalo ni Sabina, milawom usab ang iyang gugma kang Jehova nga Diyos. Tungod niana, siya mibatig kalipay nga wala pa niya masinati sukad! Dili na makita diha sa iyang nawong ang kakapoy ug kaguol. Maayo na ang iyang barog ug sanag na ang iyang panagway. “Mapahiyomon na kaayo si Sabina,” miingon ang iyang igsoong babaye. “Kaniadto dili siya ingon niana.” Nakita usab sa uban ang dakong kausaban ni Sabina ug sa iyang mga anak. Natuman na gayod ang iyang pangandoy nga matagan-an ang iyang espirituwal nga panginahanglan.

Si Sabina nalipay pag-ayo sa iyang pagtuon, apan tungod sa iyang kapuliki dili siya makatambong sa Kristohanong mga tigom. Sa kataposan, iyang gidawat ang akong pagdapit kaniya nga motambong sa Kingdom Hall. Sukad niadto, wala na siya mopalta sa mga tigom. Sa kongregasyon, si Sabina nakakaplag ug tinuod nga mga higala. Nasinati usab niya nga si Jehova nagtagana gayod sa panginahanglan sa mga tawo nga nahigugma kaniya ug nagsakripisyo sa pag-alagad kaniya.—Lucas 12:22-24; 1 Timoteo 6:8.

Gipabilhan ni Sabina ang iyang nakat-onan ug gusto niya nga ipaambit kana ngadto sa uban. Apan siya miingon, “Sa dihang maghunahuna ko bahin sa pagsangyaw sa publiko, mobati kog kahadlok.” Para niya, siya dili makahimo sa pagtudlo sa uban tungod kay siya maulawon ug dili edukado. Bisan pa niana, tungod sa kaayo nga gipakita sa mga Saksi kaniya ug sa iyang talagsaong pag-uswag, siya nakabaton ug kaisog sa pagsangyaw. Naamgohan usab niya nga ang iyang mga anak naglantaw kaniya ingong ehemplo. Busa misugod siya sa pagpaambit sa maayong balita ngadto sa uban. Ang iyang mga anak madasigong miduyog kaniya.

Karon, si Sabina dili na sama sa ubang kabos nga mga babaye nga dili malipayon sa ilang hagong mga buluhaton sa adlaw-adlaw. Ang iyang kahimtang sa pinansiyal wala ra kaayo mausab, apan ang iyang panglantaw sa kinabuhi nausab na. Karon, siya usa na ka bawtismadong Kristohanon nga nagpaambit sa uban sa maayong balita sa Gingharian sa Diyos—ang bugtong solusyon sa kakabos ug sa mga suliran sa mga tawo sa tibuok kalibotan.—Mateo 6:10.

Alas singko na usab sa buntag, ug si Sabina andam na nga mobiya sa ilang balay. Apan niining buntaga dili siya mamaligyag empanada. Siya mokuyog sa iyang kaubang mga Kristohanon aron mosangyaw diha sa kadalanan. Ang paggahin ug panahon matag semana sa pagtabang sa uban naghatag kaniyag dugang kalipay. Siya nanirado sa ilang balay ug mapahiyomon samtang nagbaktas. Inay magtulod ug kariton, siya nagdalag bag. Sa sulod niini, anaa ang iyang Bibliya ug mga basahon nga binase sa Bibliya nga iyang gamiton sa pagpaambit sa mensahe sa paglaom ngadto sa uban. Si Sabina aduna nay pagsalig sa kaugalingon, ug siya miingon, “Wala gyod ko magdahom nga makahimo ko sa pagpaambit sa uban sa mensahe sa Bibliya.” Siya midugang, “Gimahal ko kini pag-ayo!”