Mga Bahandi sa Kinadak-ang Lanaw sa Sentral Amerika

ANG Nicaragua maoy usa ka gamayng nasod, apan anaa dinhi ang kinadak-ang lanaw sa Sentral Amerika—ang Lanaw sa Nicaragua. Makapahingangha kaayo kini nga lanaw tungod kay aduna dinhiy mga isda sa dagat sama sa iho, malasugi, ug tarpon. Ang mga siyentipiko nagtuo nga kini kaniadto maoy usa ka luok nga sumpay sa dagat Pasipiko apan tungod sa pagbuto sa bolkan kini nabulag gikan sa dagat. Sa ngadto-ngadto, ang tubig niini nahimo nang tab-ang, ug ang mga isda nakapasibo ra niini nga kahimtang.

Ang lanaw maoy mga 160 kilometros ang gitas-on ug 70 kilometros ang kinalaparang bahin niini, ug kini maoy mga 30 metros ang gihabogon gikan sa lebel sa dagat. Adunay kapin sa 400 ka isla sa Lanaw sa Nicaragua, ug ang mga 300 niini anaa palibot sa Asese Peninsula, nga duol sa lungsod sa Granada, sa amihanang bahin sa lanaw. Kini gitawag ug Gagmayng mga Isla sa Granada.

Ang kinadak-ang isla mao ang Ometepe nga nahimutang sa tunga-tunga sa lanaw. Ang gitas-on niini maoy mga 25 kilometros ug ang gilapdon maoy mga 13 kilometros. Ang maong isla adunay duha ka bolkan, ug sa taliwala niini adunay usa ka hiktin nga yuta nga maoy nagdugtong niining duha ka bolkan. Ang usa sa mga bolkan mao ang Concepción nga pormag apa, nga may gihabogong 1,610 metros. Kini nga bolkan maoy aktibo ug nahimutang sa amihanang bahin sa isla. Ang lain pa mao ang Madera nga may gihabogong 1,394 metros ug kini dili na aktibo. Ang Madera naputos sa bagang mga tanom ug adunay linaw sa baba niini.

Ang Lanaw sa Nicaragua maoy usa sa mga adtoanan sa mga turista. Sila gustong motan-aw sa natural nga katahom niini ug sa daghang antik nga mga butang nga kabilin sa karaang sibilisasyon. Apan aduna pay laing bahandi sa Lanaw sa Nicaragua nga angayng sayron.

Usa ka Komunidad Diha sa Tubig

Ang Gagmayng mga Isla sa Granada abunda sa tropikanhong mga tanom ug sa ihalas nga mga mananap. Kini nga mga isla, nga naporma sa pagbuto sa bolkan, naputos sa bagang kalasangan nga adunay nindot kaayong mga bulak. Diha sa mga tampi niini, anaa nagpuyo ang nindot kaayong mga langgam nga tig-ubog sa tubig sama sa gagmayng asul nga mga talabong, great egret, osprey, anhingas, ug mga cormorant. Sa ngilit nga bahin sa lasang, makita ang mga salag sa dagkong langgam nga may pagkabrawon ug kolor nga gitawag ug Montezuma oropendolas. Kini nga mga salag anaa sa mga sanga sa dagkong kahoy, nga gipalid-palid sa naghuros nga hangin gikan sa lanaw.

 Ang ubang mga isla gipuy-ag mga tawo. Anaa niining mga islaha ang mga balay sa mga mangingisda ug ang mga balay-bakasyonan sa mga adunahan. Aduna usay mga eskuylahan, sementeryo, restawran, ug mga bar. Kini nga mga isla nahisamag usa ka baryo—usa ka komunidad diha sa tubig.

Kada buntag, ang usa ka bangka nga kolor asul ug puti molibot sa mga isla aron pasakyon ang mga estudyante ug ihatod sa eskuylahan. Aduna usay mga bangka nga molibot sa mga isla aron mamaligyag mga prutas ug utanon. Sa matag adlaw, imong makita ang mga mangingisda nga nagladlad sa ilang mga pukot ug ang mga babaye nga nanglaba diha sa lanaw.

Ang mga Saksi ni Jehova puliki usab niining mga islaha. Sila mosakay sa mga bangka aron adtoon ang mga tawo ug sangyawan bahin sa maayong balita sa Gingharian sa Diyos. (Mateo 24:14) Tungod sa kahimtang sa ilang lugar, asa kaha sila magtigom aron magtuon sa Bibliya? Agig pagsunod sa giingon sa Bibliya nga ‘dili talikdan ang mga panagkatigom,’ ang mga Saksi nakahunahunag maayong solusyon—ang paghimo sa unang naglutawng Kingdom Hall sa Nicaragua!—Hebreohanon 10:25.

Naglutawng Kingdom Hall

Ang usa ka magtiayon nga bug-os-panahong ministro sa mga Saksi ni Jehova mibalhin sa isla sa Granada niadtong Nobyembre 2005. Human sa pipila ka bulan, ilang gidapit ang mga tawo sa pagtambong sa tinuig nga Memoryal sa kamatayon ni Kristo, ug sila nalipay tungod kay dihay 76 nga mitambong. Tungod niana, nakita sa magtiayon nga kinahanglan silang magpahigayon ug regular nga Kristohanong panagkatigom sa maong dapit. Lisod ang pagpangitag katigoman nga kombenyente alang sa tanan, mao nga sila nakahunahuna sa paghimog Kingdom Hall nga molutaw ug puwedeng ibalhin-balhin sa lainlaing dapit.

Bisag kining kugihan nga magtiayon wala pa makahimo sukad ug bisan unsang butang nga molutaw, ilang gisugdan ang maong proyekto. Sila ug ang unom pa ka tawo migugol ug usa ka bulan sa paghimo niana. Simple lang ang pagkahimo sa bag-ong tigomanan. Ang estruktura niini maoy giwelding nga puthawng mga tubo nga naghawid sa 12 ka dram. Ang mga dram gibutangag compressed air aron molutaw. Ang estruktura gisalogan ug plywood ug giatpan ug trapal. Sila nag-ampo sa matag gabii tungod kay sila dili segurado kon molutaw ba kini. Milutaw gayod kini!

Ang bag-ong Kingdom Hall unang gigamit alang sa panagkatigom niadtong Hunyo 10, 2006.  Pagkasunod adlaw, kini gibalhin ngadto sa laing isla aron magpahigayon usab ug tigom didto. Ang katibuk-ang nanambong sa duha ka tigom miabot ug 48, bisan kon ang uban kinahanglang mobaktas ug kapin sa tunga sa oras diha sa kalasangan. Ang tanan nalipay kay sila aduna nay Kingdom Hall nga katigoman!

Panahon sa tigom, samtang ang mamumulong nagpakigpulong, madunggan sa mga mamiminaw ang tubig nga naglapya-lapya diha sa mga bato o kaha ang tingog sa mga unggoy gikan sa layo. Human sa tigom, ang Kingdom Hall dad-on ngadto sa laing isla. Ang mga taga-isla naanad na nga makitang ibalhin-balhin kini, ug mokaway pa gani sila sa dihang guyoron na kini. Kada semana, kapin sa 20 ka tawo ang motambong sa Kingdom Hall alang sa Kristohanong panag-ubanay ug sa pagtuon sa Bibliya. Kining naglutaw nga Kingdom Hall bililhon kaayo—usa gayod ka bahandi!

Sa Isla sa Ometepe

Mga 50 kilometros sa habagatan sa Granada, nahimutang ang isla sa Ometepe. Nindot kaayong puy-an kining islaha tungod sa kinaiyanhong katahom ug tabunok nga yuta niini. Gani, sa Nicaragua, mopatim-aw nga ang unang pagpanguma gihimo niining dapita. Karon, ang populasyon sa Ometepe maoy mga 42,000, ug ang panginabuhi sa mga tawo maoy pagpangisda, ug pagpananom ug mais, saging, kape, ug uban pang mga salag-on. Makaplagan usab dinhi ang nindot kaayong ihalas nga mga mananap. Adunay panon sa sabaan kaayo nga mga piriko, dagkong langgam nga magpie-jay nga mopasundayag sa ilang asul ug puti nga balhibo samtang sila kalit nga molupad paingon sa lainlaing mga kahoy, ug ang putig-nawong nga mga unggoy nga gitawag ug capuchin, nga maoy paborito sa daghang tawo.

Ang mga molupyo sa Ometepe kanunayng sangyawan sa mga magwawali sa maayong balita sa Gingharian sa Diyos. Gikan sa 8 nga nabawtismohan niadtong 1966, ang gidaghanon sa mga Saksi sa Ometepe nahimong 183 nga naglangkob sa upat ka kongregasyon. Ang matag kongregasyon adunay kaugalingong Kingdom Hall nga ang lokasyon niini kombenyente sa mga tumatambong. Karon, ang proporsiyon sa gidaghanon sa mga Saksi ug sa mga tawo sa isla maoy 1 sa matag 230 ka tawo.

Ang mga Saksi ni Jehova sa Ometepe nakasinatig mga kalisdanan latas sa daghang katuigan. Pananglitan, niadtong 1980, gisunog sa mga magsusupak ang Kingdom Hall sa Mérida. Sila nagtukod ug bag-ong Kingdom Hall niadtong 1984. Kana gigamit hangtod nga natukod ang nindot nga Kingdom Hall niadtong 2003, nga nakapalipay pag-ayo sa 60 ka membro sa maong kongregasyon.

Sa Moyogalpa, adunay usa ka Kingdom Hall nga mahimong gamiton alang sa mas dagkong panagkatigom. Sa luyo niini nga Kingdom Hall adunay plataporma nga giatpan. Atubangan sa plataporma, adunay mga lingkoranan nga gipahimutang hangtod sa luyo nga bahin sa maong luna ug kini gibutangag atop-atop. Ang mga Saksi ni Jehova nga nagpuyo sa mga isla sa Lanaw sa Nicaragua uban sa ilang mga higala magtigom dinhi sa dihang ipahigayon ang dagkong mga asembliya. Sa maong mga panagkatigom, ang lanaw maoy haom nga lugar alang sa pagbawtismo sa bag-ong mga disipulo ni Jesu-Kristo.—Mateo 28:19.

Mapreserbar Kaha ang Maong mga Bahandi?

Ang mga tawo nagtuo nga dili ra madaot ang Lanaw sa Nicaragua, lagmit tungod sa kadako niini. Apan karon, kini kinahanglan nang panalipdan. Kini nameligro tungod sa mga hugaw gikan sa mga pabrika ug sa agrikultura. Ang lain pang hinungdan sa problema mao ang pagpuril sa kalasangan, nga tungod niana mabanlas ang yuta ngadto sa lanaw.

Dili pa segurado kon molampos ba ang paningkamot sa mga tawo ug sa gobyerno sa pagpanalipod sa lanaw. Bisan pa niana, paneguroon gayod sa Maglalalang nga ang mga bahandi sa yuta—lakip na ang nindot kaayong mga lanaw, matahom nga mga isla, ug makapahinganghang ihalas nga mga mananap—mapanunod sa mga tawo nga matinumanon sa Diyos. Ang Bibliya nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:29.

[Hulagway sa panid 26]

Ang naglutaw nga Kingdom Hall nga gigamit ingong tigomanan sa pagtuon ug Bibliya