Ang Diyos Nagtagad Gayod—Kon Giunsa Nato Pagkahibalo

KON ang Diyos nahigugma kanato, nganong kaylap kaayo ang pag-antos? Sukad sa karaang kapanahonan, kini nga pangutana gisukna na sa mga tawo. Tingali mouyon ka nga kon imong gihigugma ang usa ka tawo, dili ka gayod buot nga siya mag-antos, ug kon siya makasinatig kalisdanan, ikaw motabang gayod kaniya. Tungod niana daghan ang nagtuo nga ang Diyos walay pagtagad kanato tungod kay kaylap kaayo ang pag-antos niining kalibotana. Busa hinungdanon nga ato unang hisgotan ang mga pamatuod nga ang Diyos nahigugma ug nagtagad gayod kanato.

Ang Kalalangan Nagpamatuod sa Gugma sa Diyos

Si Jehova nga Diyos mao “ang Usa nga naghimo sa langit ug sa yuta ug sa dagat ug sa tanang butang diha niana.” (Buhat 4:24) Kon atong pamalandongon ang mga linalang sa Diyos, kita makaingon gayod nga siya nagtagad kanato. Pananglitan, hunahunaa ang mga butang nga makapalipay kanimo. Ganahan ka bag lamiang pagkaon? Si Jehova puwede ra untang magtagana ug usa ka matang sa pagkaon aron kita mabuhi. Hinunoa, siya  nagtaganag lainlaing matang sa lamiang pagkaon. Sa susama, gidayandayanan ni Jehova ang yuta ug kakahoyan, kabulakan, ug nindot nga mga talan-awon aron magmalipayon ang atong kinabuhi.

Tagda usab ang atong pagkagama. Ang atong katakos sa pagpakatawa, pag-enjoy ug musika, ug pag-apresyar sa katahom wala kinahanglana aron kita mabuhi. Apan kini gitagana sa Diyos ingong gasa aron kita magmalipayon. Ug tagda usab ang imong pagpakiglabot sa uban. Kinsay dili malipay sa pagpakig-uban sa maayong mga higala o sa halog sa usa ka minahal? Sa pagkatinuod, ang atong katakos sa paghigugma maoy gasa sa usa ka mahigugmaong Diyos. Sanglit gibutang sa Diyos diha sa tawo ang katakos sa paghigugma, tino nga kanang hiyasa maoy bahin sa personalidad sa Diyos.

Ang Bibliya Nagpasalig Kanato sa Gugma sa Diyos

Ang Bibliya nag-ingon nga ang Diyos gugma. (1 Juan 4:8) Ang iyang gugma makita dili lamang diha sa iyang kalalangan kondili diha usab sa iyang Pulong, ang Bibliya. Pananglitan, ang Bibliya nagtaganag mga giya nga makatabang kanato sa pagbatog maayong panglawas, nagdasig kanato nga magmakasaranganon sa tanang butang, ug nagpasidaan batok sa paghuboghubog ug pagkaulitan.—1 Corinto 6:9, 10.

Ang Bibliya naghatag usab kanato ug maalamong tambag kon unsaon pagpakiglabot sa uban, nagdasig kanato sa paghigugma sa usag usa ug sa pagtratar sa uban nga may pagtahod, dignidad, ug kalulot. (Mateo 7:12) Kini nagsaway sa mga buhat ug mga tinamdan nga mosangpot sa pag-antos sama sa kahakog, pagtabitabi, kasina, panapaw, ug pagpatay. Kon sundon sa tanan ang maalamong tambag sa Kasulatan, makunhoran gayod ang pag-antos sa mga tawo sa tibuok kalibotan.

Apan ang kinalabwang kapahayagan sa gugma sa Diyos mao ang paghatag niya sa iyang Anak nga si Jesus ingong lukat alang sa katawhan. Ang Juan 3:16 nag-ingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” Busa si Jehova naghimo nag kahikayan aron taposon ang kamatayon ug ang tanang matang sa pag-antos.—1 Juan 3:8.

Dayag nga adunay daghang pamatuod nga si Jehova nahigugma kanato. Nagpasabot kana nga dili gayod siya gusto nga kita mag-antos. Siya molihok aron taposon ang pag-antos. Dili na kita angayng managhap bahin niana tungod kay ang Bibliya tin-awng nagtug-an kanato kon sa unsang paagi hanawon sa Diyos ang pag-antos.

[Hulagway sa panid 4]

Ang atong katakos sa paghigugma maoy gasa sa usa ka mahigugmaong Diyos