Tibuok-Kalibotang Problema, Tibuok-Kalibotang Solusyon

ANG pag-antos kaylap kaayo, ug daghang tawo ang mahingawaong nagtabang sa mga nag-antos. Ang mga kawani sa ospital nagtrabaho sulod sa daghang oras aron matabangan ang mga masakiton o mga nangaangol. Ang mga bombero, polis, magbabalaod, ug mga tig-rescue naningkamot pag-ayo aron maalibyohan o kaha malikayan nga mag-antos ang uban. Ang maong mga paningkamot nakatabang sa mga indibiduwal, apan wala gayoy tawo o organisasyon nga bug-os makawagtang sa pag-antos sa tibuok kalibotan. Diyos ray makataganag tibuok-kalibotang solusyon.

Kita gipasaligan sa kataposang basahon sa Bibliya: “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 21:4) Hunahunaa kon unsa ka daghang tawo ang makapahimulos niining saara. Kini naglatid sa katuyoan sa Diyos nga taposon ang tanang pag-antos. Iyang buhaton kana  pinaagi sa pagwagtang sa gubat, gutom, sakit, ug inhustisya, lakip na sa tanang daotang tawo. Walay tawo nga makahimo niana.

Kon Unsay Buhaton sa Gingharian sa Diyos

Tumanon sa Diyos ang iyang mga saad pinaagi sa nabanhawng si Jesu-Kristo, ang ikaduha nga labing gamhanang persona sa uniberso. Hapit na ang panahon nga si Jesus bug-os nang magmando ingong Hari sa tibuok yuta. Ang mga tawo dili na mandoan sa tawhanong mga hari, presidente, o mga politiko. Hinunoa, usa na lang unya ang Hari ug usa na lang ang gobyerno—ang Gingharian sa Diyos.

Hanawon sa Gingharian sa Diyos ang tanang gobyerno sa tawo. Ang Bibliya dugay nang nagtagna: “Ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.” (Daniel 2:44) Ang katawhan sa tibuok yuta magkahiusa na unya ubos sa usa ka matarong nga gobyerno—ang Gingharian sa Diyos.

Sa dinhi pa si Jesus sa yuta, kadaghan siya naghisgot bahin sa Gingharian. Iya kining gihisgotan diha sa modelong pag-ampo, nga nagsugo sa iyang mga tinun-an sa pag-ampo niining paagiha: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Matikdi nga gipaila ni Jesus nga ang Gingharian adunay papel sa pagtuman sa kabubut-on sa Diyos dinhi sa yuta, ug maoy kabubut-on sa Diyos nga hanawon ang pag-antos sa tibuok yuta.

Ang matarong nga gobyerno sa Diyos magdalag mga panalangin nga dili arang mahimo sa gobyerno sa tawo. Hinumdomi nga gihatag ni Jehova ang iyang Anak ingong lukat aron ang mga tawo makabaton ug kinabuhing walay kataposan. Ubos sa matarong nga pagmando sa Gingharian, ang mga tawo mahimong hingpit. Unsay resulta? “Lamyon gayod [ni Jehova] ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.”—Isaias 25:8.

Lagmit ang uban mangutana: ‘Nganong wala siya molihok kaniadto pa? Unsa pa may iyang gipaabot?’ Mahimo na untang hanawon ni Jehova o pugngan ang tanang pag-antos kaniadto pa. Apan iyang gitugotan nga magpadayon kini, dili tungod sa hakog nga mga katarongan, kondili alang sa walay-kataposang kaayohan sa iyang mga anak dinhi sa yuta. Ang mahigugmaong ginikanan motugot nga ang ilang anak makasinatig pag-antos kon nahibalo sila nga kini maghatag kaniyag dumalayong kaayohan. Sa susama, si Jehova adunay maayong mga katarongan sa pagtugot nga ang mga tawo temporaryong mag-antos, ug kini nga mga katarongan gipatin-aw sa Bibliya. Lakip niini mao ang kagawasan sa pagpili, sala, ug ang isyu bahin sa pagkamatarong sa pagmando ni Jehova. Gipatin-aw usab sa Bibliya nga ang usa ka daotang manulonda gitugotan sa pagmando sa kalibotan sulod sa usa ka gitakdang panahon. a

Bisag dili nato bug-os nga ikapatin-aw dinhi ang maong mga katarongan, adunay duha ka kamatuoran nga makahatag kanatog paglaom ug kadasig. Ang una mao: Si Jehova maghatag kanatog dagayang panalangin nga labaw pa kaayo kay sa mga pag-antos nga atong nasinatian. Dugang pa, ang Diyos nagpasalig kanato: “Ang unang mga butang dili na pagahinumdoman, ni kini sila motungha pa sa kasingkasing.” (Isaias 65:17) Bug-os nga wagtangon sa Diyos ang tanang kasakit ug pag-antos nga miresulta tungod sa temporaryong pagtugot sa pagkadaotan.

Ang ikaduha mao: Ang Diyos nagtakdag tinong panahon sa pagtapos sa pag-antos. Hinumdomi nga ang propetang si Habacuc nangutana kon hangtod kanus-a tugotan ni Jehova ang kapintasan ug panagbangi. Si Jehova mitubag: “Ang panan-awon alang pa sa tinudlong panahon . . . Kini dili maulahi.” (Habacuc 2:3) Ingon sa makita sa mosunod nga artikulo, kanang “tinudlong panahon” haduol na.

[Footnote]

 [Kahon sa panid 7]

Mga Teksto sa Bibliya nga Naghisgot sa Malipayong Kaugmaon

WALA NAY GUBAT:

“Dali kamo, tan-awa ang mga kalihokan ni Jehova, kon giunsa niya pagpahinabo ang makapahinganghang mga hitabo sa ibabaw sa yuta. Gipahunong niya ang mga gubat hangtod sa kinatumyan sa yuta.”—Salmo 46:8, 9.

MABUHI ANG NAMATAYNG MGA MINAHAL:

“Aduna unyay pagkabanhaw sa mga matarong ug sa mga dili-matarong.”—Buhat 24:15.

PAGKAON ALANG SA TANAN:

“Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”—Salmo 72:16.

WALA NAY SAKIT:

“Walay pumoluyo nga moingon: ‘Ako masakiton.’”—Isaias 33:24.

ANG MGA DAOTAN HANAWON:

“Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”—Proverbio 2:22.

MOHARI ANG HUSTISYA:

“Tan-awa! Usa ka hari [si Jesu-Kristo] magahari alang sa pagkamatarong; ug mahitungod sa mga prinsipe, sila magmando ingong mga prinsipe alang sa hustisya.”—Isaias 32:1.

[Mga hulagway sa panid 7]

Ang Gingharian sa Diyos magwagtang sa tanang pag-antos nga atong nasinatian