Pakigsuod sa Diyos

Ang Usa nga Nagtuman sa Iyang mga Saad

Josue 23:14

NALISDAN ka ba sa pagsalig sa uban? Ikasubo, kita nagkinabuhi sa usa ka kalibotan diin ang pagsalig kanunayng gipakyas. Kon ikaw gipakyas sa usa nga imong gisaligan—lagmit tungod sa bakak nga mga pulong o sa mga saad nga wala tumana—tingali nawad-an ka nag pagsalig. Apan, adunay usa nga imong kasaligan nga dili gayod mopakyas kanimo. Ang Proverbio 3:5 nag-agda kanato: “Salig kang Jehova sa bug-os mong kasingkasing.” Nganong makasalig kita kang Jehova? Sa pagtubag niana, atong susihon ang gipamulong ni Josue—usa ka tawo nga bug-os misalig kang Jehova—nga girekord sa Josue 23:14.

Hunahunaa ang kahimtang. Si Josue nga maoy mipuli kang Moises ingong lider sa Israel hapit nang mag-110 anyos. Sa tibuok niyang kinabuhi, iyang nasaksihan ang daghang gamhanang mga buhat ni Jehova alang sa Israel, lakip na ang milagrosong pagluwas kanila latas sa Pulang Dagat mga 60 ka tuig na ang milabay. Karon, samtang namalandong sa iyang mga kaagi, gipatawag ni Josue ang “mga ansiyano [sa Israel] ug ang mga pangulo niini ug ang mga maghuhukom niini ug ang mga opisyal niini.” (Josue 23:2) Ang iyang gipamulong nianang higayona nagpadayag dili lang sa kaalam tungod sa taas nga pangedaron kondili sa usa ka kasingkasing nga puno sa pagtuo tungod sa pagpamalandong.

“Mopanaw ako karong adlawa sa dalan sa tanan nga yutan-on,” matod pa ni Josue. Ang prase nga “dalan sa tanan nga yutan-on” maoy usa ka panultihon nga nagtumong sa kamatayon. Ang gipasabot ni Josue mao, “Dili na ko magdugay.” Kay nahibalo nga hapit na siyang mamatay, si Josue migugol ug daghang oras sa pagpamalandong sa iyang kinabuhi. Unsay iyang gipanamilit sa iyang mga isigkamagsisimba?

Si Josue mipadayon: “Walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo. Walay usa ka pulong kanila nga napakyas.” Kini mao ang mga pulong sa usa ka tawo nga dunay bug-os nga pagsalig sa Diyos. Nganong bug-os ang iyang pagsalig? Sa pagpalandong sa tanan niyang nasaksihan, si Josue kombinsido nga si Jehova kanunayng nagtuman sa Iyang mga saad. a Dayag kaayo kon nganong gisulti niya ang maong mga pulong: Buot ni Josue nga ang iyang mga isigka-Israelitas magbaton ug bug-os nga pagtuo nga ang tanang saad ni Jehova bahin sa ilang umaabot matuman gayod.

Bahin sa Josue 23:14, ang usa ka reperensiya sa Bibliya nagkomento: “Hisgoti ang tanang saad diha sa Bibliya; dayon susiha ang kasaysayan sa kalibotan; susiha usab ang tanang linalang sa yuta, aron masuta kon aduna bay bisan usa sa mga saad sa Diyos nga iyang gipakyas o gikalimtan.” Kon posible lang unta ang maong pagsusi, kita makahinapos sama kang Josue—ang mga saad ni Jehova natuman gayod.—1 Hari 8:56; Isaias 55:10, 11.

Narekord sa Bibliya ang daghang saad sa Diyos nga nangatuman, lakip ang pipila nga nangatuman sa atong panahon. Narekord usab niini ang kahibulongang mga saad ni Jehova bahin sa atong umaabot. b Nganong dili nimo susihon ang maong rekord? Ang pagtuon sa Bibliya magkombinsir kanimo nga ang Diyos—ang usa nga nagtuman sa iyang mga saad—takos gayod sa atong pagsalig.

[Mga footnote]