Ang Yuta ba Matapos?

“ANG kataposan sa kalibotan maoy ulohan nga gikaikagan kaayo, ilabina diha sa pelikula.” Kanay gipamulong sa kolumnistang si John Scalzi. Nganong ang mga tumatan-aw madani sa mga pelikula mahitungod sa kataposan sa kalibotan? “Kay ang gipakita niini mao ang atong mga gikahadlokan,” matod pa ni Scalzi. Mouyon ka ba niana? Duna ba kitay lig-ong mga basehan nga mahadlok kon sa unsang paagi ug kon kanus-a matapos ang yuta ug ang tanang kinabuhi nga anaa niini?

Halos kada adlaw kitang makadungog nga gilampornas sa kinaiyanhong mga katalagman ang lainlaing bahin sa yuta. Ang makapalisang nga video sa maong grabeng kadaot balikbalik nga ipakita diha sa TV ug Internet. Kon kita kanunayng makakitag tinuod nga mga hulagway sa mga tawong nangamatay ug sa mga dapit nga nangapayhag, dali natong mahunahuna nga ang kataposan sa kalibotan maoy tinuod nga hulga ug dili lang estorya sa pelikula.

Ang maong kahadlok misamot tungod sa teoriya sa mga siyentipiko kon sa unsang paagi matapos ang yuta. Gitagna pa gani sa pipila kon kanus-a ang kataposan sa yuta o ang gitawag nila nga expiration date niini. Niadtong Marso 2008, ang Monthly Notices of the Royal Astronomical Society mitaho nga duha ka astronomo ang nagtagna nga sa mga 7.59 bilyong katuigan, ang atong planeta lamyon sa adlaw ug magunaw.

Matapos ba gayod ang yuta sa umaabot?

Ang Ato Bang Planeta Adunay “Expiration Date”?

Ang Bibliya nagpasalig kanato: “Ang mga kaliwatan moagi ug ang mga kaliwatan moabot, apan ang yuta magpabilin sa walay kataposan.” (Ecclesiastes 1:4, New International Version) Lig-ong “gitukod [ni Jehova nga Diyos] ang yuta ibabaw sa pihong mga dapit niini” ug gidisenyo kining molungtad “sa panahong walay tino, o hangtod sa kahangtoran.” (Salmo 104:5) Imposible ba ang maong inspiradong mga pulong sa Diyos? Nganong angay kitang motuo nga ang atong yuta dili matapos, bisag ang pipila ka siyentipiko nag-ingon nga kini matapos?

Buweno, palandonga kadiyot ang mga produktong anaa sa estante sa usa ka tindahan. Ang pipila niini adunay expiration date. Kinsay nagtino sa maong petsa? Kana ba gitaghap lang sa manedyer sa tindahan? Siyempre wala! Ang tiggama maoy nagtino sa expiration date. Mosalig kita sa maong petsa kay ang tiggama mas nasayod sa iyang mga produkto kay ni bisan kinsa. Labi pa gayong mosalig kita sa Magbubuhat sa atong planeta! Ang iyang Pulong tin-awng nag-ingon nga iyang ‘lig-ong gipahimutang ang yuta’ aron molungtad sa walay kataposan. Kini wala gayoy expiration date!—Salmo 119:90.

Apan, posible kahang madaot sa iresponsableng mga tawo ang planeta sa punto nga dili na kini maulian? Dili gayod! Si Jehova lahi sa mga tawo nga tiggama kay siya “makahimo sa tanang butang.” (Job 42:2) Kanay hinungdan nga siya makapasalig: ‘Ang akong pulong nga mogula gikan sa akong baba tinong molampos.’ (Isaias 55:11) Kita makatino nga dili itugot sa “atong Magbubuhat” nga may makapugong kaniya sa pagtuman sa iyang katuyoan alang sa yuta. (Salmo 95:6) Unsa ang maong katuyoan, ug sa unsang paagi tumanon kini sa Diyos?

Ang Gingharian sa Diyos Maoy Magpalampos sa Iyang Katuyoan

Dugang pa sa pagpasalig nga ang yuta dili gayod matapos, ang Pulong sa Diyos nagsulti usab kanato nga siya “nag-umol niini aron pagapuy-an.” (Isaias 45:18) Bisan pag ang atong yuta gipuy-an na sa libolibo ka katuigan, wala pa gihapon matuman ang katuyoan sa Diyos.

Si Jehova maoy “malipayong Diyos” ug “mahigugmaon sa hustisya.” (1 Timoteo 1:11; Salmo 37:28) Katuyoan niya nga ang tanang tawo magkinabuhing  malipayon ug dili makaagom ug inhustisya. Aron matuman ang iyang katuyoan, ang Diyos nagtagna nga siya magtukod ug usa ka Gingharian sa langit nga magmando sa tibuok yuta. (Daniel 2:44) Sa dinhi pa sa yuta, si Jesus kanunayng naghisgot bahin sa Gingharian sa Diyos ingong usa ka gobyerno. Gidasig niya ang iyang mga tinun-an sa pag-ampo alang niini kay nahibalo siya sa tanang panalangin nga itagana sa Gingharian sa dihang magmando na kini dinhi sa yuta. (Mateo 6:9, 10; 24:14) Unsa ang pipila sa maong mga panalangin?

▪ Adunay kalinaw ug kasegurohan kay ang Diyos nagsaad sa pagtapos sa tanang gubat.—Salmo 46:9.

▪ Aduna unyay daghang pagkaon alang sa tanan.—Salmo 72:16.

▪ Dili na problema ang pag-atiman sa panglawas kay “walay pumoluyo ang moingon: ‘Ako masakiton.’”—Isaias 33:24.

▪ Wala nay pagbangotan, kay “ang kamatayon mawala na.”—Pinadayag 21:4.

▪ Ang Diyos nagsaad nga ang iyang katawhan magtukod sa ilang kaugalingong mga balay, magpuyo sa kasegurohan, ug ‘magmalipayon hangtod sa kahangtoran.’—Isaias 65:17-24.

Seguradong nangandoy ka sa mga kahimtang nga gihisgotan sa itaas. Si Jehova nagtinguha gayod sa pagtuman sa tanan niyang gitagna. (Isaias 9:6, 7) Apan makahunahuna ka tingali: ‘Linibo ka katuigan na ang milabay sukad mahisulat ang mga saad sa Diyos diha sa Bibliya. Nganong wala pa man kana matuman?’

Ang Pailob sa Diyos Moresulta sa Atong Kaluwasan

Salig gayod nga “si Jehova dili langaylangayan mahitungod sa iyang saad.” Ang Bibliya nagpatin-aw nga ang Diyos mahigugmaon mao nga siya mapailobon kanato. Busa, gidasig kita nga ‘isipon ang pailob sa atong Ginoo ingong kaluwasan.’ (2 Pedro 3:9, 15) Apan nganong gikinahanglan ang pailob sa Diyos alang sa kaluwasan?

Una sa tanan, ang Diyos nasayod nga sa dili pa siya makatagana sa mga tawong matarong ug usa ka puy-anan nga adunay kasegurohan ug kadagaya, kinahanglan una niyang ‘laglagon kadtong nagadaot sa yuta.’ (Pinadayag 11:18) Apan kay si Jehova nahigugma sa mga tawo, siya “wala magtinguha nga adunay malaglag.” Busa ang atong langitnong Amahan mapailobong ‘nagpasidaan sa daotan gikan sa iyang daotang dalan.’ Sa maong katuyoan, gipasangyaw ni Jehova ang mensahe sa iyang Gingharian sa tibuok yuta. a (Ezequiel 3:17, 18) Ang tanang mosanong sa pasidaan sa Diyos ug magpahiuyon sa ilang kinabuhi sa iyang matarong nga mga prinsipyo pagaluwason ug magtagamtam ug kinabuhing walay kataposan sa usa ka paraisong yuta.

Dangop sa Diyos ug Maluwas

Seguradong ang Bibliya adunay “maayong balita” alang kanato. (Mateo 24:14) Nagpasalig kini nga ang atong yuta dili gayod matapos! Dugang pa, sumala sa mga tagna sa Bibliya, makasalig kita nga hapit nang mahanaw ang mga daotan. Sa dili madugay, kadtong matarong sa panan-aw sa Diyos mao lamang ang “magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:9-11, 29; Mateo 5:5; Pinadayag 21:3, 4) Sa dili pa moabot ang maong panahon, ang Diyos sa kamapailobon mopadayon sa pag-awhag: “Dangop kamo kanako ug maluwas, kamong tanan diha sa mga kinatumyan sa yuta.” (Isaias 45:22) Mosanong ka ba?

Nganong dili nimo himoong determinasyon ang pagdangop sa Diyos? Ang Salmo 37:34 nag-awhag kanato: “Laom kang Jehova ug bantayi ang iyang dalan, ug siya magabayaw kanimo aron sa pagpanag-iya sa yuta.” Ang mga Saksi ni Jehova malipay sa pagtabang kanimo aron mas makakat-on ka bahin sa dumalayong katuyoan sa Diyos alang sa yuta ug kon unsaon nimo pagkinabuhi aron makita ang katumanan sa maong katuyoan.

[Footnote]

[Picture Credit Line sa panid 22]

NASA photo