Sundoga ang Ilang Pagtuo

Siya Nagmaunongon Bisan pa sa mga Pagsulay

SI Pedro mabalak-on nga nagsud-ong sa mga nawong sa mamiminaw ni Jesus samtang didto sila sa sinagoga sa Capernaum. Kadto ang lungsod mismo ni Pedro; anaa didto ang iyang negosyo sa pangisda, sa baybayon sa Dagat sa Galilea; didto nagpuyo ang kadaghanan sa iyang mga higala, paryente, ug mga kasosyo sa negosyo. Interesado kaayo si Pedro nga ang iyang mga katagilungsod makaila kang Jesus sama sa iyang pagkaila kaniya, ug sila usab mobatig kalipay sa pagkat-on bahin sa Gingharian sa Diyos gikan sa labing dakong magtutudlo. Apan kadto daw dili mahitabo sa adlaw nga miduaw si Jesus sa Capernaum.

Daghan ang wala na maminaw. Ang uban nagbagulbol pa kay wala makaangay sa gisulti ni Jesus. Apan ang labawng nakapatugaw kang Pedro mao ang reaksiyon sa pipila ka tinun-an ni Jesus. Wala na mabanaag sa ilang mga nawong ang kalipay tungod sa hinungdanong mga butang nga ilang nakat-onan bahin sa kamatuoran. Nadayag sa ilang mga dagway niadtong higayona ang kapikal ug kayugot. Prangka pang miingon ang pipila nga ang mga pulong ni Jesus makapakugang. Kay dili na nila gustong maminaw, sila nanggawas sa sinagoga—ug mihunong na sa pagsunod kang Jesus.

Kadto maoy lisod nga panahon alang kang Pedro ug sa iyang kaubang mga apostoles. Si Pedro wala makasabot sa bug-os sa giingon ni Jesus niadtong adlawa. Dayag nga bisan siya mibati nga makapakurat ang mga pulong ni Jesus kon dili ipatin-aw ang kahulogan niini. Apan unsay himoon ni Pedro? Dili kadto ang una ni ang kataposang higayon nga nasulayan ang iyang pagkamaunongon ngadto sa iyang Agalon. Atong tan-awon kon sa unsang paagi ang pagtuo ni Pedro nakatabang kaniya sa pag-atubang sa maong mga hagit ug sa pagpabiling maunongon.

Nagmaunongon Bisag ang Uban Wala

Daghang higayon nga si Pedro nakurat sa gihimo ug gipanulti ni Jesus. Ang iyang Agalon balikbalik nga nagbuhat ug nagsultig sukwahi sa gidahom sa katawhan Kaniya. Sa miaging adlaw lamang, si Jesus milagrosong nagpakaon ug linibong katawhan mao nga ilang gitinguha nga himoon siyang hari. Apan nakurat ang daghan kay siya mipalayo ug gisugo ang iyang mga tinun-an sa pagsakay sa sakayan aron molawig paingon sa Capernaum. Samtang naglawig sila sa kagabhion, nakurat na usab sila kang Jesus kay milakaw siya sa balorong Dagat sa Galilea, ug naghatag kang Pedro ug hinungdanong leksiyon bahin sa pagtuo. a

Pagkabuntag, ilang nasayran nga ang panon sa katawhan misakay diay ug mga sakayan ug misunod kanila. Apan dayag nga ang katawhan gusto na usab nga makakita kang Jesus nga milagrosong magpatunghag pagkaon, dili tungod kay gusto nilang mahibalo sa kamatuoran. Gibadlong sila ni Jesus tungod sa ilang pagkamateryalistiko. Ang maong panaghisgot nagpadayon sa sinagoga sa Capernaum, diin si Jesus nagtudlog hinungdanon apan lisod-hisabtang kamatuoran sa paagi nga wala damha sa mga tawo.

 Buot ni Jesus nga kadtong mga tawhana makasabot nga siya dili lang tinubdan sa literal nga pagkaon kondili siya maoy espirituwal nga tagana sa Diyos ug pinaagi sa iyang kinabuhi ug kamatayon ingong tawo, ang uban makabatog kinabuhing dayon. Busa miasoy siyag usa ka ilustrasyon diin gitandi niya ang iyang kaugalingon sa mana, ang tinapay gikan sa langit sa panahon ni Moises. Sa dihang ang pipila misupak, migamit siyag tatawng ilustrasyon, nga nagsaysay nga ang iyang unod pagakan-on ug ang iyang dugo pagaimnon aron mabuhi. Sa pagsulti niya niana, misamot ang ilang pagsupak. Ang pipila miingon: “Kining mga pulonga makapakugang; kinsa ang makapatalinghog niini?” Daghan sa mga tinun-an ni Jesus ang mihukom nga dili na mosunod kaniya. b—Juan 6:48-60, 66.

Unsay himoon ni Pedro? Segurado nga nalibog usab siya sa mga pulong ni Jesus. Wala pa siya makasabot niadto nga si Jesus kinahanglang mamatay aron iyang matuman ang kabubut-on sa Diyos. Apan mitungha ba sa hunahuna ni Pedro nga biyaan si Jesus sama sa gihimo sa ubang mga tinun-an niadtong adlawa? Wala; may usa ka hinungdanong butang nga nakapalahi kang Pedro gikan kanila. Unsa kana?

Si Jesus miingon sa iyang mga apostoles: “Buot ba usab ninyong mobiya?” (Juan 6:67) Ang 12 mao ang iyang gipakigsultihan, apan si Pedro lang ang mitingog, nga maoy sagad nga mahitabo. Tingali si Pedro ang kinamagulangan kanila. Bisag unsay kahimtang, siya gayod ang labing prangka sa grupo; daw dili magpanuko si Pedro sa pagpahayag kon unsay anaa sa iyang hunahuna. Nianang higayona, diha sa iyang hunahuna kining nindot ug halandomong mga pulong: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan.”—Juan 6:68.

Dili ba matandog ang imong kasingkasing nianang mga pulonga? Ang pagtuo ni Pedro kang Jesus nakatabang kaniya sa pag-ugmad ug talagsaong hiyas—ang pagkamaunongon. Tin-awng nasabtan ni Pedro nga wala nay laing Manluluwas gawas kang Jesus ug nga si Jesus nagluwas pinaagi sa iyang mga pulong—ang iyang gipanudlo mahitungod sa Gingharian sa Diyos. Nasayod si Pedro nga bisan pag may pipila ka butang nga nakapalibog kaniya, walay laing kaadtoan kon buot niya ang pag-uyon sa Diyos ug ang panalangin nga kinabuhing walay kataposan.

Mao ba usab kanay imong gibati? Ikasubo nga daghan sa kalibotan karon ang nag-angkon nga sila nahigugma kang Jesus apan wala magmaunongon sa dihang nasulayan ang ilang pagtuo. Ang tinuod nga pagkamaunongon kang Kristo nagkahulogan nga atong batonan ang tinamdan ni Pedro maylabot sa mga pagtulon-an ni Jesus. Kita kinahanglang makakat-on ug makasabot sa kahulogan niana ug magkinabuhi uyon niana—bisan pag kana tingali sukwahi sa atong gidahom o sa atong gusto. Pinaagi lamang sa atong pagkamaunongon nga atong mabatonan ang kinabuhing walay kataposan nga gitinguha ni Jesus alang kanato.

Nagmaunongon sa Dihang Gitul-id

Wala madugay human niadtong puliki nga panahon, gidala ni Jesus ang iyang mga apostoles ug pipila ka tinun-an sa taas nga panaw paamihanan. Ang naputos-ug-yelong taluktok sa Bukid sa Hermon, sa kinatumyan nga amihanang bahin sa Yutang Saad, makita usahay gikan sa asul nga katubigan sa Dagat sa Galilea. Daw nagkahabog ang maong bukid samtang sila nagtungas ug  nagsingabot sa mga balangay duol sa Cesarea Filipos. c Nianang nindot nga dapit diin makita ang dakong bahin sa Yutang Saad habig sa habagatan, si Jesus nangutana sa iyang mga sumusunod ug usa ka hinungdanong pangutana.

“Kinsa ako sumala sa sulti sa mga panon sa katawhan?” buot siyang masayod. Mahanduraw nato ang pagtutok ni Pedro sa mga mata ni Jesus, ug iyang nabatyagan na usab ang kalulot ug lantip nga pangisip sa iyang Agalon. Interesado si Jesus sa hunahuna sa iyang mga mamiminaw pinasukad sa ilang nakita ug nadungog. Gitubag sa mga tinun-an ni Jesus ang pangutana, nga naghisgot sa pipila ka sayop nga ideya sa mga tawo kon kinsa si Jesus. Apan may buot pang masayran si Jesus. Sayop ba usab kaha ang hunahuna sa iyang kinasuorang mga sumusunod bahin kaniya? Busa siya nangutana: “Apan kamo, sumala ninyo kinsa ba ako?”—Lucas 9:18-22.

Sa makausa pa, si Pedro ang daling mitubag. Iyang gipahayag sa tatawng mga pulong kon unsay anaa sa hunahuna sa daghan nga atua didto. “Ikaw mao ang Kristo, ang Anak sa Diyos nga buhi,” siya miingon. Mahanduraw nato nga si Jesus mipahiyom ug nagyangoyango kang Pedro samtang sinserong nagdayeg kaniya. Si Jesus nagpahinumdom kang Pedro nga si Jehova nga Diyos, dili tawo, ang nagpadayag nianang hinungdanon kaayong kamatuoran ngadto sa mga tawong may tinuod nga pagtuo. Busa nasabtan ni Pedro ang usa sa labing talagsaong mga kamatuoran nga gipadayag ni Jehova—kon kinsa ang dugay nang gisaad nga Mesiyas o Kristo!—Mateo 16:16, 17.

Kini nga Kristo mao ang gitawag sa karaang tagna nga usa ka bato nga gisalikway sa mga magtutukod. (Salmo 118:22; Lucas 20:17) Pinasukad sa maong mga tagna, gipadayag ni Jesus nga si Jehova magtukod ug usa ka kongregasyon ibabaw sa mismong bato, o dakong-bato, nga bag-o pang gipaila ni Pedro. d Unya iyang gitugyanan si Pedro ug pipila ka hinungdanon kaayong pribilehiyo sa maong kongregasyon. Wala niya hatagi si Pedro ug kinatas-ang posisyon ibabaw sa ubang mga apostoles, sumala sa gituohan sa pipila, apan iyang gihatagan siyag mga responsabilidad. Iyang gihatag kang Pedro “ang mga yawi sa gingharian.” (Mateo 16:19) Katungdanan ni Pedro ang pagbukas sa paglaom sa pagsulod sa Gingharian sa Diyos ngadto sa tulo ka lainlaing katawhan—una ngadto sa mga Hudiyo, unya ngadto sa mga Samarianhon, ug sa kataposan ngadto sa mga Hentil, o mga dili-Hudiyo.

Hinuon, si Jesus sa ulahi miingon nga kadtong gihatagan ug daghan, daghan usab ang pangayoon kaniya, ug gipamatud-an sa kahimtang ni Pedro nga tinuod kanang mga pulonga. (Lucas 12:48) Si Jesus nagpadayon sa pagpadayag ug hinungdanon kaayong mga kamatuoran bahin sa Mesiyas, lakip ang pagkatino sa iyang umaabot nga pag-antos ug pagkamatay sa Jerusalem. Wala moangay si Pedro sa pagkadungog niadto. Siya nagpinig kang Jesus ug nagbadlong kaniya, nga nag-ingon: “Magmaluloton ka sa imong kaugalingon, Ginoo; dili gayod mahitabo kanimo kini nga dulnganan.”—Mateo 16:21, 22.

Maayog tuyo si Pedro, busa lagmit wala gayod niya damha ang tubag ni Jesus. Mitalikod siya kang  Pedro, mitan-aw sa ubang mga tinun-an—nga lagmit samag hunahuna kang Pedro—ug miingon: “Magpalikod ka kanako, Satanas! Ikaw maoy kapandolan kanako, tungod kay ikaw naghunahuna, dili sa mga hunahuna sa Diyos, kondili nianang sa mga tawo.” (Mateo 16:23; Marcos 8:32, 33) Ang mga pulong ni Jesus adunay mapuslanong tambag kanatong tanan. Sayon kaayo nga molabi ang tawhanong panghunahuna kay sa diyosnong panghunahuna. Kon itugot nato kana, bisan pag ang atong tuyo mao ang pagtabang, kita dili-tinuyong mahimo nga mga tigduso sa katuyoan ni Satanas kay sa iya sa Diyos. Apan, unsay sanong ni Pedro?

Nasayod gayod siya nga si Jesus wala magtawag kaniyang Satanas nga Yawa sa literal nga diwa. Ngani, si Jesus wala man makigsulti kang Pedro sama sa iyang pagpakigsulti kang Satanas. Si Jesus miingon kang Satanas: “Pahilayo”; kang Pedro siya miingon: “Magpalikod ka kanako.” (Mateo 4:10) Si Pedro wala isalikway ni Jesus, kinsa nakakitag daghang maayong hiyas diha kaniya, apan gitul-id lamang ni Jesus ang sayop nga panghunahuna ni Pedro bahin sa maong butang. Atong masabtan nga dili angayng ibutang ni Pedro ang iyang kaugalingon sa atubangan sa iyang Agalon ingong kapandolan kondili angay siyang magpalikod kaniya ingong maunongong tigpaluyo.

Nakiglalis ba si Pedro, nasuko, o nagmug-ot? Wala; mapainubsanon niyang gidawat ang pagtul-id. Sa ingon nagpakita na usab siyag pagkamaunongon. Ang tanang sumusunod ni Kristo usahay kinahanglang tul-iron. Pinaagi lamang sa mapainubsanong pagdawat sa disiplina ug pagkat-on gikan niana nga mahimo kitang mas suod kang Jesu-Kristo ug sa iyang Amahan, si Jehova nga Diyos.—Proverbio 4:13.

Gigantihan ang Iyang Pagkamaunongon

Wala madugay may laing makapahinganghang butang nga gipahayag si Jesus: “Sa pagkatinuod ako magaingon kaninyo nga adunay pipila niadtong nagabarog dinhi nga dili gayod makatilaw ug kamatayon hangtod nga makita una nila ang Anak sa tawo nga moabot diha sa iyang gingharian.” (Mateo 16:28) Seguradong naikag kaayo si Pedro niining mga pulonga. Unsa kahay gipasabot ni Jesus? Basin nabalaka si Pedro nga dili niya madawat kining espesyal nga mga pribilehiyo tungod kay bag-o lang siyang gibadlong.

Apan mga usa ka semana sa ulahi, si Jesus nagdala kang Santiago, Juan, ug Pedro ngadto sa “usa ka hataas nga bukid”—tingali ang Bukid sa Hermon nga pipila ra ka kilometros ang gilay-on. Lagmit gabii kadto kay katulogon kaayo ang tulo ka lalaki. Apan samtang si Jesus nag-ampo, may usa ka panghitabo nga nakawagtang sa ilang pagduka.—Mateo 17:1; Lucas 9:28, 29, 32.

Ilang nakita nga si Jesus nausab. Ang iyang nawong nagmasilakon hangtod nga ang kasanag nahisama sa adlaw. Ang iyang sapot migilakgilak usab sa kaputi. Unya dihay mitungha nga duha ka lalaki kauban ni Jesus, ang usa naghawas kang Moises ug ang lain kang Elias. Sila nakigsulti kaniya bahin sa “iyang pagbiya nga gitakdang pagatumanon niya sa Jerusalem”—dayag nga nagtumong sa iyang pagkamatay ug pagkabanhaw. Dayag nga sayop kaayo si Pedro nga dili siya motuo nga si Jesus makaagom nianang sakit nga kasinatian sa umaabot.—Lucas 9:30, 31.

Gibati ni Pedro nga kinahanglan siyang mosalmot sa maong talagsaon kaayong panan-awon. Daw hapit nang mobiya si Moises ug Elias kang Jesus. Busa si Pedro miingon: “Magtutudlo, maayo nga ania kami dinhi, busa magpatindog kami ug tulo ka tolda, usa alang kanimo ug usa alang kang Moises ug usa alang kang Elias.” Siyempre, wala magkinahanglag mga tolda kadtong dugay nang patayng mga alagad ni Jehova nga gihawasan lang diha sa panan-awon. Wala gayoy kalibotan si Pedro sa iyang  gipanulti. Bisan pa niana, dili ka ba makadayeg kaniya tungod sa iyang gipakitang kadasig ug kaayo?—Lucas 9:33.

Siya ug si Santiago ug si Juan nakadawat ug laing ganti niadtong gabhiona. Dihay napormang panganod nga milandong kanila didto sa bukid. Gikan niana may nadungog nga tingog—ang tingog ni Jehova nga Diyos! Siya miingon: “Kini mao ang akong Anak, ang usa nga pinili. Patalinghog kamo kaniya.” Dayon natapos ang panan-awon, ug sila na lay kauban ni Jesus didto sa bukid.—Lucas 9:34-36.

Pagkatalagsaong gasa kadto nga panan-awon alang kang Pedro—ug alang usab kanato! Mga dekada sa ulahi siya misulat bahin sa iyang pribilehiyo niadtong gabhiona sa pagkahimong usa sa “mga saksing-nakakita sa iyang kahalangdon,” nga sa pagkatinuod maoy pasiunang talan-awon kang Jesus ingong mahimayaon nga langitnong Hari. Kadto nga panan-awon nagpamatuod sa daghang tagna sa Pulong sa Diyos ug naglig-on sa pagtuo ni Pedro bahin sa mga pagsulay nga iya pang sagubangon. (2 Pedro 1:16-19) Makapalig-on usab kana kanato kon, sama kang Pedro, kita magpabiling maunongon sa usa nga gitudlo ni Jehova ingong atong Agalon, mokat-on gikan kaniya, modawat sa iyang disiplina ug pagtul-id, ug mapainubsanong mosunod kaniya sa adlaw-adlaw.

[Mga footnote]

[Kahon/Hulagway sa panid 28]

 Kinsa ang Dakong-Bato?

“Ako magaingon kanimo, Ikaw si Pedro, ug sa ibabaw niining dakong-bato pagatukoron ko ang akong kongregasyon.” (Mateo 16:18) Kanang mga pulonga, nga gisulti ni Jesus kang apostol Pedro, kasagarang gisabot nga si Pedro mao ang mahimong patukoranan sa Kristohanong kongregasyon. Ang Simbahang Katoliko nagtudlo nga si Jesus naghatag kang Pedro ug mas taas nga katungdanan kay sa ubang mga apostoles, nga naghimo kaniyang unang Santo Papa. Busa, sa Saint Peter’s Basilica sa Roma, ang mga pulong ni Jesus gisulat sa pinulongang Latin sa sulod nga bahin sa linging atop, diha sa mga letrang taas pa sa tawo.

Gipasabot ba ni Jesus nga si Pedro mao ang dakong-bato nga sa ibabaw niana pagatukoron ni Jesus ang iyang kongregasyon? Wala. Palandonga ang tulo ka katarongan kon nganong makatino kita niana. Una, ang ubang mga apostoles presente niadtong higayona, ug wala nila sabta nga kadto ang kahulogan sa mga pulong ni Jesus. Kon si Pedro ang gihatagan ni Jesus ug kinatas-ang katungdanan kanilang tanan, nganong balikbalik man silang naglalis sa ulahi kon kinsa kanila ang kinalabwan? (Marcos 9:33-35; Lucas 22:24-26) Ikaduha, gipakita sa ulahi ni apostol Pablo nga ang dakong-bato mao si Jesu-Kristo, dili si Pedro. (1 Corinto 3:11; 10:4) Ikatulo, gipakita mismo ni Pedro sa ulahing mga dekada nga wala siya maghunahuna nga siya mao ang dakong-bato. Hinunoa, siya misulat nga si Jesus mao ang dugay nang gitagna nga “patukoranang bato nga pamag-ang” nga gipili sa Diyos mismo.—1 Pedro 2:4-8.

Bisan pa niana, ang pipila moinsistir nga gipaila ni Jesus si Pedro ingong ang dakong-bato tungod kay ang iyang ngalan nagkahulogang “Bato.” Apan ang tinuod mao nga ang ngalan ni Pedro dili susamag kahulogan sa “dakong-bato” nga gigamit sa samang bersikulo. Ang ngalan ni Pedro nagpasabot nga “Usa ka Pirasong Bato,” ug kini maoy usa ka nombreng panglalaki o masculine noun; ang pulong nga gihubad ug “dakong-bato” maoy nombreng pangbabaye o feminine noun. Nan, unsaon pagsabot ang mga pulong ni Jesus? Samag siya nag-ingon kang Pedro: “Ikaw, nga akong ginganlag Pedro, o Bato, nakaila kon kinsa ang tinuod nga ‘dakong-bato,’ ang Kristo, nga mahimong patukoranan sa Kristohanong kongregasyon.” Pagkatalagsaon sa pribilehiyong nabatonan ni Pedro kay siya nakatabang sa pagpadayag sa maong hinungdanong kamatuoran!

[Hulagway sa panid 24, 25]

Si Pedro nagmaunongon bisan sa dihang siya gitul-id

[Hulagway sa panid 26]

Ang pagkamaunongon ni Pedro gigantihan ug talagsaong panan-awon