Tagay Pa!

SI Allen nagsugod sa paghuboghubog sa dihang siya 11 anyos. a Siya ug ang iyang mga higala magdula sa kakahoyan, nga magsundog sa mga karakter nga ilang nakita sa pelikula. Dili tinuod ang mga karakter nga ilang gisundog, apan ang ilang giinom nga alkoholikong ilimnon tinuod.

Si Tony 40 anyos sa dihang inanay niyang gidugangan ang iyang giinom gikan sa usa o duha ka tagay matag gabii ngadto sa lima o unom. Sa ngadtongadto, dili na niya maihap ang iyang mainom sa usa ka adlaw.

Si Allen nangayog tabang maylabot sa iyang problema sa pag-inom. Si Tony wala modawat sa tabang sa iyang mahigugmaong pamilya ug mga higala. Si Allen buhi karon sa pag-asoy sa iyang kaagi, samtang si Tony namatay pipila ka tuig kanhi sa usa ka aksidente sa sakyanan tungod sa sobrang pag-inom.

Bisan kon ang usa ka tawo moinom nga mag-inusara, ang iyang sobrang pag-inom makaapektar sa ubang mga tawo, nga sagad may daotang sangpotanan. Ang pag-abuso sa alkoholikong ilimnon maoy sagad nga hinungdan sa sakit nga sinultihan, pagpanagmal, pagkaagresibo, pagpatay, mga aksidente sa sakyanan ug sa trabahoan, ug sa daghang problema sa panglawas. Dako kaayog gigasto ang mga tawo matag tuig tungod niini, gawas pa sa personal ug emosyonal nga kadaot nga ipahinabo niini sa mga indibiduwal, pamilya, ug sa mga anak.

Bisan pa niana, “dili ang tanang kanunayng moinom adunay problema sa pag-inom,” miingon ang U.S. National Institutes of Health, “ug dili tanan nga may problema sa pag-inom moinom kada adlaw.” Daghang tawo ang wala makaamgo nga sila inanay nang nagiyan sa alkoholikong ilimnon. Ang uban talagsa rang moinom, apan sila makahurot ug kapin sa lima ka tagay sa dihang moinom.

Kon ikaw moinom, unsaon nimo pag-ila kon kini sobra na? Unsaon nimo pagkahibalo nga dili na angayng “moinom ug usa pa”? (Proverbio 23:29, 30, Contemporary English Version) Hisgotan sa mosunod nga mga artikulo ang makatabang nga mga impormasyon bahin niini.

[Mga footnote]