Ang Bibliya Makabag-o sa Kinabuhi

UNSAY nakatukmod sa usa ka Rastafarian sa pagpaputol sa iyang sinalapid nga buhok ug sa pagbuntog sa iyang pagpihigpihig sa mga puti? Ug unsay nakapahimo sa usa ka bagis nga batan-ong lalaki, nga tigkolektag kuwarta alang sa mga tigpayuhot ug droga, sa pagbag-o sa iyang kinabuhi? Tagda kon unsay ilang giingon.

“Nabuntog pa Gani Nako ang Akong Pagkamapihigon.”—HAFENI NGHAMA

EDAD: 34

NASOD: ZAMBIA

KANIADTO: MEMBRO SA RASTAFARIAN NGA RELIHIYON

KAAGI: Ako natawo sa usa ka refugee camp sa Zambia. Ang akong inahan mikalagiw sa Namibia panahon sa gubat ug miapil sa South West Africa People’s Organization (SWAPO). Kini nga organisasyon nakigbatok sa pamunoan sa Habagatang Aprika nga maoy nagmando sa Namibia nianang panahona.

Ako nagbalhinbalhin ug puyo sa lainlaing refugee camp hangtod sa nag-edad kog 15. Ang mga batan-on diha sa mga kampo sa SWAPO gibansay sa pagpakaylap sa kawsa sa kagawasan. Kami gidoktrinahan sa mga ideolohiya sa politika ug gitudloan nga dumtan ang mga puti.

Sa dihang ako 11 anyos, gusto ko nga ilhon ingong Kristiyano ug moanib sa usa ka simbahan diha sa kampo nga gilangkoban sa mga Romano Katoliko, Lutherano, Anglikano, ug uban pa. Ang pastor nga akong gikaestorya wala magdasig kanako sa paghimo niini. Sukad niadto, ako wala nay pagtuo sa Diyos. Apan sa pag-edad nakog 15, nahilig ko sa reggae music ug ang akong tinguha nga sulbaron ang kawalay hustisya nga nasinati sa itom nga mga Aprikano nagtukmod kanako sa pag-apil sa kalihokan sa mga Rastafarian. Nagpataas ko sa akong buhok aron kini masalapid, nag-marijuana, dili na mokaon ug karne, ug misuportar alang sa kawsa sa kagawasan sa mga itom. Apan, wala nako bag-oha ang akong imoral nga pagkinabuhi o ang pagtan-aw sa mapintas nga mga salida. Ug bastos pod kog sinultihan.

KON SA UNSANG PAAGI GIBAG-O SA BIBLIYA ANG AKONG KINABUHI: Niadtong 1995, sa hapit na kong mag-20 anyos, namalandong kog maayo kon unsay buot nakong buhaton sa akong kinabuhi. Gitun-an nako ang tanang basahon sa mga Rastafarian nga akong makaplagan. Ang pipila niini naghisgot sa Bibliya, apan dili ako kombinsido sa mga pagpatin-aw niini. Busa midesisyon ko nga basahon mismo ang Bibliya.

Sa ulahi, ang usa ka higala nga Rastafarian mihatag kanakog libro alang sa pagtuon sa Bibliya nga gipatik sa mga Saksi ni Jehova. Gitun-an ko kini uban sa Bibliya. Sa ulahi, ako nakahibalag ug mga Saksi ni Jehova ug nagpadayon sa pagtuon sa Bibliya uban kanila.

Uban ang dakong paningkamot, nahunong ko ang pagpanigarilyo ug paghuboghubog. (2 Corinto  7:1) Gihapsay ko ang akong hitsura, gipaputol ang akong sinalapid nga buhok, gihunong ang pagtan-awg pornograpiya ug mapintas nga mga salida ug ingon man ang paggamit ug bastos nga sinultihan. (Efeso 5:3, 4) Sa ngadtongadto, nabuntog pa gani nako ang akong pagkamapihigon batok sa mga puti. (Buhat 10:34, 35) Aron mahimo kini nga mga kausaban, akong gilikayan ang mga musika nga nagdasig sa pagpihigpihig sa rasa ug wala na makig-uban sa akong kanhing mga higala, kinsa gustong moimpluwensiya kanako sa pagbalik sa akong kanhing pagkinabuhi.

Human mahimo ang maong mga kausaban, nangita kog Kingdom Hall sa mga Saksi ni Jehova ug mihangyo nga moanib sa ilang relihiyon. Sa dihang midesisyon ko nga magpabawtismo ingong usa ka Saksi ni Jehova, wala malipay ang akong pamilya. Ang akong inahan miingon kanako nga mahimo kong moanib sa bisan unsang “Kristiyano” nga relihiyon basta dili lang sa mga Saksi ni Jehova. Ang usa sa akong mga uyoan, nga usa ka iladong opisyal sa gobyerno, kanunayng nagsaway kanako tungod sa akong pagpakig-uban sa mga Saksi.

Apan, ang pagkakat-on kon sa unsang paagi si Jesus nakiglabot sa mga tawo ug ang pagpadapat sa iyang tambag nakatabang kanako sa pagsagubang sa pagsupak ug pagbiaybiay. Akong gitandi ang gitudlo sa mga Saksi ug ang giingon sa Bibliya, ug ako kombinsido nga nakaplagan ko ang matuod nga relihiyon. Pananglitan, ilang gituman ang sugo sa Bibliya nga magsangyaw sa uban. (Mateo 28:19, 20; Buhat 15:14) Ug wala sila mag-apil-apil sa politika.—Salmo 146:3, 4; Juan 15:17, 18.

MGA KAAYOHAN NGA AKONG NABATONAN: Ang pagkinabuhi sumala sa mga sukdanan sa Bibliya nakatabang kanako sa daghang paagi. Pananglitan, tungod kay wala na ko mogamit ug marijuana, wala na nako mausik ang ginatos ka dolyar matag bulan. Wala na ko makasinatig halusinasyon, ug ang akong panglawas miarang-arang na.

Ang akong kinabuhi karon aduna nay tumong ug katuyoan nga maoy akong gipangandoy sukad pa sa akong pagkabata. Ug labaw sa tanan, ako nasuod sa Diyos.—Santiago 4:8.

“Nakakat-on na Ko sa Pagpugong sa Akong Kasuko.”—MARTINO PEDRETTI

EDAD: 43

NASOD: AUSTRALIA

KANIADTO: TIGBALIGYAG DROGA

KAAGI: Sa bata pa ko, ang among pamilya nagsigeg balhin ug puyo. Nakapuyo ko sa gagmayng mga lungsod, dakong siyudad, ug nakapuyo pod ko kadiyot sa hilit nga komunidad sa mga Aborigine diin adunay gihimong misyon ang mga Protestante. Malingaw kaayo ko sa paghinumdom sa panahon nga ako nagpuyo uban sa akong mga ig-agaw ug mga uyoan diin kami mamasol, mangayam, maghimog boomerang, ug magkulit ug uban pang mga butang.

 Ang akong amahan boksidor ug sa bata pa ko iya na kong gitudloan sa pagpakig-away. Nagdako ko nga mapintason. Sa tin-edyer pa ko, pirme ko sa mga bar aron mag-inom-inom. Kami sa akong mga barkada mangitag away. Magdala mig mga kutsilyo ug mga bat sa besbol aron atakehon ang grupo sa 20 o kapin pang mga tawo.

Ako nakakuwarta pinaagi sa pagbaligyag droga ug kinawat nga mga butang gikan sa mga trabahante sa pantalan. Tigpaningil pod ko sa mga nakautang sa mga tigpayuhot ug droga ug hasion kadtong mga dili makabayad gamit ang shotgun ug pistola. Gusto kong mahimong hired killer. Ang akong prinsipyo mao, Mopatay o mapatay.

KON SA UNSANG PAAGI GIBAG-O SA BIBLIYA ANG AKONG KINABUHI: Sa bata pa ko, nakadungog na ko bahin sa mga Saksi ni Jehova. Pag-edad nakog 20 kapin, nahinumdom ko nga akong gipangutana si Mama kon nahibalo ba siya kon asa makaplagan ang mga Saksi. Paglabay sa duha ka adlaw, nanuktok sa balay ang usa ka Saksi nga ginganlag Dixon. Human sa among mubong panag-estorya, iya kong gidapit sa tigom sa mga Saksi ni Jehova. Mitambong ko sa tigom ug karon kapin na sa 20 ka tuig nga ako tigtambongan. Ang tanan nakong pangutana natubag sa mga Saksi gamit ang Bibliya.

Nalipay ko sa pagkasayod nga si Jehova interesado sa matag tawo, bisan kadtong dili-diyosnon. (2 Pedro 3:9) Akong nasayran nga siya usa ka mahigugmaong Amahan nga andam moatiman kanako, bisan pag isalikway ako sa uban. Nahupayan usab ako sa pagkahibalo nga siya mopasaylo kanako kon akong bag-ohon ang akong kinabuhi. Ang mga pulong sa Bibliya diha sa Efeso 4:22-24 dakog epekto kanako. Ang maong teksto nagdasig kanako nga “hukason ang daan nga pagkatawo” ug “magsul-ob sa bag-ong pagkatawo nga gilalang sumala sa kabubut-on sa Diyos.”

Gidangtag pipila ka panahon una ko nakahimog kausaban sa akong kinabuhi. Makaagwanta ko sa paglikay sa droga sulod sa pipila ka adlaw, apan sa hinapos sa semana, kon kauban nako ang akong mga barkada, ako ilang maagni. Kinahanglan kong mopalayo kanila kon gusto kong magbag-o, busa midesisyon ko nga mobalhin sa laing estado. Ang pipila ko ka higala miingon nga sila mokuyog, ug ako misugot. Panahon sa biyahe, sila misugod sa paghithit ug marijuana ug ila kong gitanyagan. Ako silang giingnan nga biyaan na nako ang maong bisyo, ug kami nagbulag pag-abot sa utlanan sa estado. Sa ulahi akong nahibaloan nga ang akong mga barkada nanulis ug bangko gamit ang shotgun.

MGA KAAYOHAN NGA AKONG NABATONAN: Sa nahunong na nako ang pagpakig-uban sa akong mga barkada, mas sayon na kanako ang pagbag-o sa akong kinabuhi. Niadtong 1989, ako nagpabawtismo ingong usa ka Saksi. Human nga ako nabawtismohan, ang akong igsoong babaye ug si Mama ug Papa miduyog kanako sa pag-alagad kang Jehova.

Minyo na ko karon sulod sa 17 ka tuig ug may tulo ka buotang mga anak. Nakakat-on na ko sa pagpugong sa akong kasuko, bisan pag ako anaa sa kalagot. Ug ako nakakat-on sa paghigugma sa mga tawo gikan sa tanang ‘tribo, rasa, ug pinulongan.’ (Pinadayag 7:9) Gibati ko nga mapadapat kanako ang mga pulong ni Jesus. Siya miingon: “Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.”—Juan 8:31, 32.

[Blurb sa panid 19]

Ang paghimog mga kausaban naglakip sa paglikay sa mga musika nga nagdasig sa pagpihigpihig sa rasa

[Blurb sa panid 20]

Kami sa akong mga barkada mangitag away. Magdala mig mga kutsilyo ug mga bat sa besbol aron atakehon ang grupo sa 20 o kapin pang mga tawo