Ang Tanan Bang Maayong Tawo Moadto sa Langit?

HUMAN sa kataposang panihapon ni Jesus uban sa iyang mga apostoles sa gabii una pa siya mamatay, siya misaad nga tagan-an silag dapit sa langit. Siya miingon: “Sa balay sa akong Amahan adunay daghang puloy-anan. Kon dili pa, giingnan ko unta kamo, tungod kay ako moadto aron sa pag-andam ug dapit alang kaninyo.” (Juan 14:2) Nganong andaman sila ni Jesus ug dapit didto sa langit? Unsay ilang buhaton didto?

Anaa sa hunahuna ni Jesus ang usa ka linaing asaynment alang sa iyang mga tinun-an. Nianang samang gabii, siya miingon: “Kamo mao ang nagpabilin kanako diha sa akong mga pagsulay; ug nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian.” (Lucas 22:28, 29) Ang Diyos misaad kang Jesus nga siya ang mahimong Hari nga maoy motagana sa usa sa kinadak-ang panginahanglan sa katawhan—maayong gobyerno. Si Jesus magaluwas sa katawhan gikan sa kasakit ug magalaglag niadtong nagdaogdaog kanila. Bisan tuod ang iyang mga sakop molukop “hangtod sa mga kinatumyan sa yuta,” ang iyang trono atua sa langit.—Salmo 72:4, 8; Daniel 7:13, 14.

Apan si Jesus dili magmando nga mag-inusara. Busa, siya nagsaad nga andaman niya ang iyang mga apostoles ug dapit didto sa langit. Sila ang unang gipili aron “magamando ingong mga hari ibabaw sa yuta.”—Pinadayag 5:10.

Pila may moadto sa langit? Sama sa tawhanong mga gobyerno, ang mga magmamando sa langitnong Gingharian sa Diyos diyutay ra kon itandi sa ilang mga sakop. Giingnan ni Jesus kadtong magmando uban kaniya: “Ayaw kahadlok, gamayng panon, tungod kay giuyonan sa inyong Amahan ang paghatag kaninyo sa gingharian.” (Lucas 12:32) Sa ngadtongadto, kanang “gamayng panon” moabot ug 144,000. (Pinadayag 14:1) Kana nga gidaghanon gamay ra kon itandi sa minilyon nga makatagamtam sa kinabuhing walay kataposan dinhi sa yuta ingong maunongong mga sakop sa Gingharian.—Pinadayag 21:4.

Busa, dili ang tanang maayong tawo moadto sa langit. Bahin sa maayong hari nga si David, si apostol Pedro miingon: “Si David wala mosaka ngadto sa mga langit.” (Buhat 2:34) Si Juan nga Bawtista maoy maayong tawo. Bisan pa niana, si Jesus miingon nga si Juan dili magmando ingong hari didto sa langit. “Taliwala niadtong natawo gikan sa mga babaye,” matod pa ni Jesus, “wala pay gibangon nga labaw kay kang Juan nga Bawtista; apan ang usa nga ubos sa gingharian sa mga langit labaw pa kay kaniya.”—Mateo 11:11.

Gusto ba Nimong Madawat ang Ganti Alang sa Maayong mga Tawo?

Unsay buhaton sa usa ka tawo aron madawat ang ganti nga mabuhing walay kataposan sa yuta? Si Jesus miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Matikdi nga tungod sa gugma sa Diyos alang sa kalibotan, iyang gitanyag ang kinabuhing walay kataposan alang sa tanan, apan kadto lamang “magpasundayag ug pagtuo” ang makadawat niana nga ganti.

Ang maong pagtuo kinahanglang ipasukad sa tukmang kahibalo. (Juan 17:3) Imong ikapakita nga ikaw usa ka maayong tawo pinaagi sa pagkat-on ug dugang bahin sa katuyoan ni Jehova alang sa tawo. Dayon tugoti nga ang imong pagtuo magpalihok kanimo sa pagpadapat sa imong mga nakat-onan. Ug laomi nga imong maangkon ang kahigayonan nga mabuhing walay kataposan.

 [Kahon sa panid 7]

Unsay Gitudlo sa Bibliya?

Pangutana:

Unsay mahitabo sa maayong mga tawo sa dihang sila mamatay?

Tubag:

“Bahin sa mga patay, sila walay nahibaloan nga bisan unsa.”—ECCLESIASTES 9:5.

Pangutana:

Unsay paglaom sa maayong mga tawo nga namatay?

Tubag:

‘Ang takna nagsingabot nga ang tanan nga anaa sa handomanang mga lubnganan makadungog sa tingog ni Jesus ug manggula.’—JUAN 5:28, 29.

Pangutana:

Asa mopuyo ang kadaghanan sa maayong mga tawo?

Tubag:

“Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—SALMO 37:29.