Kon Unsay Atong Makat-onan Kang Jesus

Bahin sa Matuod nga Pagsimba

Giuyonan ba sa Diyos ang tanang matang sa pagsimba?

▪ Si Jesus naluoy sa mga tawo nga nalimbongan sa bakak nga relihiyon. Siya nagpasidaan bahin sa “mini nga mga manalagna nga manganha . . . nga nagsapot sa pagkakarnero, apan sa sulod sila maoy mga lobo nga manunukob.” (Mateo 7:15) Imo bang namatikdan nga ang ubang tawo naggamit sa relihiyon sa pagbuhat ug daotan?

Si Jesus miampo sa Diyos: “Ang imong pulong maoy kamatuoran.” (Juan 17:17) Gipakita niini nga wala uyoni sa Diyos ang pagsimba nga sukwahi sa kamatuoran sa Bibliya. Busa gipadapat ni Jesus ngadto sa pipila ka relihiyosong mga salingkapaw ang mga pulong sa Diyos nga nag-ingon: “Kawang lamang nga sila nagpadayon sa pagsimba kanako, tungod kay sila nagtudlo sa mga sugo sa mga tawo ingon nga mga doktrina.”—Mateo 15:9.

Aduna bay matuod nga relihiyon?

▪ Sa dihang nahibalag ni Jesus ang usa ka babayeng Samarianhon nga nalimbongan sa bakak nga relihiyon, siya miingon sa babaye: “Kamo nagasimba sa wala ninyo mailhi . . . Ang matuod nga mga magsisimba magasimba sa Amahan uban sa espiritu ug sa kamatuoran, kay, sa pagkatinuod, ang Amahan nagapangita sa mga ingon kanila aron magasimba kaniya.” (Juan 4:22, 23) Dayag nga mahimong makaplagan ang matuod nga pagsimba.

Si Jesus miingon: “Ako walay ginahimo sa akong kaugalingong pagbuot; apan sumala sa gitudlo kanako sa Amahan gisulti ko kining mga butanga.” Tin-aw nga si Jesus nahibalo nga ang relihiyon nga iyang gitudlo mao lamang ang matuod. (Juan 8:28) Busa siya miingon: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.” (Juan 14:6) Sanglit ang matuod nga mga magsisimba nagkahiusa sa pagduol sa Amahan, sila angayng nagkahiusa sa usa ka matuod nga relihiyon.

 Unsaon nimo pag-ila ang matuod nga mga magsisimba?

▪ Ang usa ka Kristohanon mao kadtong nagsunod kang Jesu-Kristo. Tagda ang upat ka paagi diin ang pagsundog sa panig-ingnan ni Jesus tin-awng magpaila sa iyang mga sumusunod.

1. Si Jesu-Kristo miampo kang Jehova: “Gipaila ko ang imong ngalan.” (Juan 17:26) Ang matuod nga mga Kristohanon naggamit usab nianang ngalana.

2. Si Jesus nagsangyaw bahin sa Gingharian ni Jehova ug nagpadala sa iyang mga tinun-an ngadto sa balay ug balay aron usab sa pagsangyaw. Siya miingon: “Sa bisan unsang siyudad o balangay nga kamo mosulod, pangitaa kon kinsa didto ang takos.” Sa ulahi, iyang giingnan ang iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran.” (Mateo 10:7, 11; 28:19) Dali ra nimong mailhan ang matuod nga mga Kristohanon karon tungod kay sila nagbuhat usab sa maong buluhaton.

3. Si Jesus wala mag-apil-apil sa politika. Busa, siya miingon labot sa iyang mga sumusunod: “Sila dili bahin sa kalibotan, ingon nga ako dili bahin sa kalibotan.” (Juan 17:14) Ang matuod nga mga magsisimba angayng mailhan sa ilang pagkaneyutral sa politika.

4. Si Jesus nagsakripisyo sa kaugalingon sa iyang pagpakitag gugma sa uban. Siya miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Ang matuod nga mga Kristohanon nagpakitag gugma sa usag usa ug sila wala makigbahin sa gubat.

Sa unsang paagi ang matuod nga pagsimba makahatag ug kaayohan kanimo?

▪ Aron mahimong bahin sa matuod nga pagsimba, kinahanglan una nga ikaw makaila pag-ayo kang Jehova. Ang kahibalo bahin sa Diyos makatabang kanimo sa pagsubay sa labing maayong dalan sa kinabuhi ug sa pag-ugmad ug gugma sa Diyos. Si Jehova nagsaad ug kinabuhing walay kataposan sa mga nahigugma kaniya. Busa si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos.”—Juan 17:3.

Alang sa dugang impormasyon, tan-awa ang kapitulo 15 niining libroha, Unsay Tinuod nga Gitudlo sa Bibliya? nga gipatik sa mga Saksi ni Jehova.

[Hulagway sa panid 16]

“Pagbantay sa mini nga mga manalagna nga manganha kaninyo nga nagsapot sa pagkakarnero, apan sa sulod sila maoy mga lobo nga manunukob.”—Mateo 7:15