Pagsusi sa Kamatuoran Bahin sa Langit

PAGKANINDOT sa paglaom nga makaadto sa langit! Ang paglaom nga adunay kinabuhi human sa kamatayon gituohan sa mga Muslim, Hindu, Budhista, mga membro sa relihiyon nga nag-angkong Kristiyano, ug bisan gani niadtong walay interes sa relihiyon. Daghan ang naghunahuna nga ang langit maoy usa ka dapit sa katahom ug kalipay diin ang mga tawo wala nay pag-antos ug ila nang makauban pag-usab ang ilang “mipanaw nga mga minahal.” Bisan pa niana, alang sa kadaghanang tawo, tinuod kining karaang panultihon: Ang tanan gustong moadto sa langit, apan walay gustong mamatay aron makaadto didto. Nganong ingon man niana?

Kon kita gidisenyo nga mamatay ug moadto sa langit, dili ba kini angayng pangandoyon sa mas daghang tawo sama sa pagpangandoy sa usa ka bata nga siya modako na o sa pagpangandoy sa usa ka batan-on nga siya maminyo na? Apan ang kadaghanang tawo dili gustong mamatay.

Bisan pa niana, ang mga magwawali moingon nga human sa atong mubong pag-estar sa yuta, ang langit mao gayod ang atong puy-an. Pananglitan, si Theodore Edgar Kardinal McCarrick, usa ka retiradong arsobispo sa Washington, D.C., gikutlo nga nag-ingon: “Kita wala lalanga aron magkinabuhi sa yuta. Kita gilalang aron magkinabuhi sa langit.” Sa susama, ang kanhing presidente sa U.S. National Association of Evangelicals miingon: “Ang katuyoan sa kinabuhi mao ang paghimaya sa Diyos ug pag-adto sa langit . . . kay ang langit mao ang atong pinuy-anan.”

Kadtong nagtuo nga sila mabuhi sa langit human sa kamatayon sagad kulang ug impormasyon. Si George Barna, nga presidente sa usa ka kompaniya nga nanukiduki sa relihiyosong mga opinyon, nakakaplag nga ang ideya sa daghang tawo bahin sa kinabuhi ug sa kinabuhi human sa kamatayon gipasukad sa lainlaing tinubdan, sama sa mga pelikula, musika, ug nobela. Ang usa ka pastor sa Episcopal didto sa Florida gikutlo nga nag-ingon: “Wala kitay laing nahibaloan bahin sa langit gawas nga kini mao ang pinuy-anan sa Diyos.”

Apan ang langit maoy usa ka hinungdanong ulohan nga gihisgotan sa Bibliya. Giunsa paghubit sa Pulong sa Diyos ang langit? Ang tawo ba gilalang aron mopuyo sa langit? Kon mao, unsay ilang buhaton didto?

[Blurb sa panid 3]

Nganong daghan ang gustong moadto sa langit apan pipila lang ang gustong mamatay aron makaadto didto?