Among mga Magbabasa Nangutana . . .

Ang Yuta ba Kanunayng may Igong Pagkaon ug Kahinguhaan sa Pagpatunhay sa Kinabuhi?

▪ Ang atong matahom nga planetang Yuta adunay dakong kapasidad sa pagpatunhay sa kinabuhi. Apan, tungod sa pagdaghan sa populasyon ug sa paspas nga pagkahurot sa dagayang kahinguhaan sa yuta, ikaw tingali makapangutana: ‘Mahitabo kaha ang atong gikahadlokan? Kanunay kahang mabatonan ang igong pagkaon ug kahinguhaan?’

Maylabot niini nga pangutana, kita makasalig sa gisaad sa Diyos ngadto sa tawhanong banay kapin na sa 4,000 ka tuig kanhi: “Kay sa tanang adlaw nga ang yuta magpadayon, ang pagpugas ug binhi ug ang pag-ani, ug ang katugnaw ug ang kainit, ug ang ting-init ug ang tingtugnaw, ug ang adlaw ug ang gabii, dili gayod mohunong.” (Genesis 8:22) Busa, sama ka segurado nga ang adlaw mosilang matag buntag, kita makasalig nga ang yuta padayon gayong magpatungha sa mga butang nga gikinahanglan sa pagpatunhay sa kinabuhi.

Sa usa ka report niadtong 2004 nga nag-ulohang “Makatagana bag Igong Pagkaon ang Planeta?” si Alex Kirby, nga usa ka koresponsal sa kalikopan, miingon: “Ang kalibotan makapatunghag igong pagkaon alang sa tanan. Apan sagad nga ang pagkaon wala makaabot sa mga lugar nga nagkinahanglan niini, o sobra ka mahal, o dali rang madaot. Busa ang pagtino nga ang tanan dunay igong makaon mas nagdepende sa pagdumala sa mga lider sa gobyerno kay sa siyensiya.” Kon maayo ang pagdumala sa yuta ug sa mga kahinguhaan niini, walay rason nga mabalaka nga magkulang ang suplay. Pananglitan, sa mga adlaw sa karaang Israel, ang Diyos naghatag ug tin-aw nga sugo bahin sa hustong paggamit sa yuta. Sumala sa Levitico 25:4, giingnan sa Diyos ang mga Israelitas: “Sa ikapito ka tuig kinahanglan nga adunay igpapahulay sa bug-os nga pagpahulay alang sa yuta . . . Ang imong uma dili nimo pagapugsan ug binhi.” Bisan tuod dili nila tikaron ang yuta sa matag ikapitong tuig, ang Diyos nagsaad nga iyang tinoon nga ang katawhan magsadya tungod sa kadagaya sa maayong mga butang ug dili sila angayng mabalaka nga basin kini magkulang.—Levitico 26:3-5.

Bisan tuod adunay dakong paningkamot karon nga masolusyonan ang kadaot sa yuta ug sa mga kahinguhaan niini, daghan ang nabalaka nga ang maong mga paningkamot dili igo ug ulahi na kaayo. Ang bugtong tinuod nga solusyon makaplagan sa Pinadayag 11:18. Dinhi ang Bibliya nag-ingon nga ‘laglagon ni Jehova ang mga nagalaglag sa yuta.’ Dili lang wagtangon ni Jehova ang sayop nga pagdumala sa yuta ug sa mga kahinguhaan niini kondili paneguroon niya nga ang yuta magpatunghag dagayang abot alang sa tanan. Ang tanang kalihokan nga supak sa katuyoan sa Diyos ug ang tanang pag-abuso sa yuta tungod sa hakog nga tinguha wad-on na unya. Sa laing bahin, kadtong kinabubut-ong mopaluyo sa pagmando ni Jehova makasinati sa katumanan sa mga pulong nga narekord sa Salmo 72:16: “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”

Tungod sa dakong gugma ug kaalam ni Jehova, iyang katuyoan nga ang tanang tawo magpuyo ug mag-atiman sa ilang pinuy-anan nga usa ka paraisong yuta. (Genesis 1:28) Ubos sa iyang pagmando, ang masinugtanong mga tawo makakat-on sa paggamit sa mga kahinguhaan sa yuta sa maalamong paagi, nga dili na maabusohan ang kaabunda niini. Mapasalamaton gayod kita sa atong mahigugmaong Magtatagana kinsa magtagbaw sa tinguha sa tanang buhing linalang!—Salmo 145:16.

[Blurb sa panid 22]

“Ang pagtino nga ang tanan dunay igong makaon mas nagdepende sa pagdumala sa mga lider sa gobyerno kay sa siyensiya”