Sulat Gikan sa Papua New Guinea

Katakotan Diha sa Kapanganoran

ALAS singko kadto sa buntag sa igang nga adlawng Martes didto sa Lae, Papua New Guinea (PNG). Kami sa akong asawa nangandam sa pag-adto sa Lengbati, sa Mount Rawlinson sa Probinsiya sa Morobe, aron duawon ang usa ka grupo sa mga Saksi ni Jehova didto.

Ang among biyahe mokabat lag 30 minutos sakay sa usa ka gamayng ayroplano nga masakyan lang ug upat ka pasahero. Sagad molingkod ko tupad sa piloto, ug bisag banha ang makina, mag-estoryahay mi gamit ang headset intercom. Iyang gitudlo ang mga instrumento diha sa among atubangan ug gipatin-aw ang katuyoan niini. Siya mipasiaw pa gani nga kon dunay mahitabo kaniya, ako na ang magpalupad sa ayroplano. Dihadiha, nahinumdom ko sa estorya sa laing nagaduawng ministro sa mga Saksi ni Jehova dinhi sa PNG. Sa dihang ang piloto nawad-ag panimuot panahon sa biyahe, sila nagtuyok-tuyok sa kahanginan nga naka-autopilot hangtod nga nahibalik ang panimuot sa piloto ug napatugpa ang ayroplano. Nalipay mi nga wala ray kakulian ang among biyahe.

Ang among ayroplano naglupad ubay sa kabukiran sa dihang kalit kaming miliko taliwala sa mga panganod ug milatas sa tumoy sa usa ka bukid, sa gihabogon lang nga mga 100 metros. Among nakita sa ubos ang baryo sa Lengbati, usa ka pundok sa giatpag-kogon nga mga balay nga gama sa kahoy. Gilabyan sa piloto ang tugpahanan aron susihon kini ug iyang gipaneguro nga walay mga bata nga nagdulag soccer. Gisusi usab niya kon wala ba kiniy mga bangag nga giungad sa baboy sukad sa kataposan niyang pag-anhi. Sa paglibot sa ayroplano, ang piloto miingon, “Way problema; testingan natog tugpa.” Kami mitugpa sa mubong tugpahanan, nga gihimo sa mga tawo sa baryo diha sa kilid sa bukid nga niining bag-o pa ilang gitambakan ug dinugmok nga anapog gikan sa duol nga bukid.

Sa miaging mga pagduaw namo dinhi, akong nakita kining tipak-tipak nga anapog ug nakapangutana kon unsa na kaha kadugay kining mga bukira. Handurawa kon unsa ka dako ang puwersa nga nagsaka sa ginatos ka kilometro nga katakotan sa dagat aron mahimong dagkong bukid nga mga upat ka kilometro ang gihabogon! Sa pagkanaog namo sa ayroplano, kami nagbarog sa dapit nga akong gitawag nga katakotan diha sa kapanganoran.

Sa matag higayon nga makadungog silag andar sa talitugpa nga ayroplano, ang mga taga-baryo modugok dayon. Sa dihang gipalong sa piloto ang makina, akong nakita ang usa ka lalaki nga mipaingon sa ayroplano. Siya mao si Zung. Usa siya sa gitudlo sa maong dapit aron moatiman sa senemanang programa sa pagpanudlo nga gihimo sa mga Saksi ni Jehova sa tibuok kalibotan. Ilado siya sa ilang lugar nga maayog  moral, matinud-anon, ug kasaligan. Siya miingon nga tungod kini sa iyang pagpadapat sa mga prinsipyo sa Bibliya nga iyang nakat-onan. Human magkomostahay, milugsong mig diyutay uban ni Zung ug sa lain pang mga Saksi. Gisundan mi sa mga bata, nga nag-ilogay sa pagdala sa among mga backpack.

Nakaabot mi sa usa ka gamayng balay nga gama sa kahoy nga gihimo sa mga Saksi didto aron puy-an sa nagaduawng ministro nga moduaw matag unom ka bulan. Bisan tuod ang nasod sa PNG init ug klima, bugnaw kaayo dinhi sa bukid tungod sa kahabog niini. Sa dihang pasigaon namo sa magabii ang mga sugang de-gas, ang gabon, nga inanayng mosaka gikan sa walog panahon sa kahaponon, sagad nakong makita nga mosulod sa balay agi sa giwang sa tabla nga salog. Daw kataw-anan nga mosul-ob mig baga nga dyaket ug maong nga pantalon aron mainitan, nga kon hunahunaon kami nag-antos sa kaigang didto sa daplin sa baybayon pipila lang ka oras ang milabay.

Sa tungatunga sa katuigang 1980, ang usa ka lalaki gikan dinhi nagtuon sa Bibliya uban sa mga Saksi ni Jehova sa Lae. Sa iyang pagbalik dinhi sa ilang baryo, siya ug ang pipila niya ka kauban nagtukod ug usa ka gamayng tigomanan nga nakapalipay gayod kanila. Apan ang pastor sa Lutherano nga simbahan uban sa iyang mga tigpaluyo nagsunog niini. Sila mapasigarbohong miingon nga kining lugara para lang sa mga Lutherano. Bisan pa sa padayong pagsupak, ang mga Saksi nakatukod ug laing tigomanan, ug padayon silang midaghan nga miabot ug mga 50 ka aktibong magmamantala sa maayong balita. Ang pipila nga kanhi misupak sa buluhaton sa mga Saksi masiboton na karong nagkigbahin niini.

Sa pagkakaron, daghang tawo dinhi ang maminaw na kon sangyawan sila sa mga Saksi ni Jehova, kinsa nagtudlo kanila sa Bibliya. Bisan tuod pipila lang sa mga taga-baryo ang makabasa, kadaghanan sa mga Saksi mikat-on sa pagbasa aron ilang ikapaambit sa uban ang mensahe sa Bibliya. Matag semana, moabot ug mga 200 ka tawo ang motambong sa mga tigom diha sa ilang Kingdom Hall.

Walay koryente dinhi. Sa magabii, magtapok mi palibot sa kalayo diha sa balay-lutoanan. Didto mi mangaon, mag-estoryahay, ug magkataw-anay. Ang kalipay sa pag-alagad kang Jehova dayag kaayo sa mapahiyomong nawong sa among mga higala, nga makita tungod sa dan-ag sa kalayo. Sa magkalawom na ang kagabhion, ang uban magdagkot ug bombom, o sulo nga langkay, nga maoy ilang pang-iwag samtang magdali sila paglakaw diha sa kalibonan pauli sa ilang mga balay.

Samtang kami namauli, among namatikdan kon unsa ka mingaw dinhi. Tingog ra sa kinaiyahan ang among madungog sa palibot. Sa wala pa mangatulog, gitan-aw namo sa kataposang higayon ang kalangitan ug nahingangha sa kadaghan sa mga bituon nga makita gikan niining habog nga dapit.

Dali ra kaayong milabay ang usa ka semana, ug nagpaabot kami sa pagbalik sa ayroplano pagkaugma. Makapalabay pa kamig usa ka bugnaw nga gabii dinhi sa Lengbati, ug dayon mamalik na kami sa kainit ug kaalimuot sa dapit nga duol sa baybayon.