“Siya Nagatan-aw sa Kasingkasing”
Pakigsuod sa Diyos
“Siya Nagatan-aw sa Kasingkasing”
ANG panagway malimbongon. Dili kanunayng mabanaag sa hitsura sa usa ka tawo ang iyang personalidad, kon unsa gayoy anaa sa iyang kasingkasing. Ang mga tawo sagad motan-aw sa panggawas nga panagway. Apan si Jehova nagatan-aw dili sa panagway kondili sa kasingkasing sa usa ka tawo. Kini tin-awng gipadayag diha sa 1 Samuel 16:1-12.
Handurawa ang situwasyon. Si Jehova hapit nang magdihog ug bag-ong hari sa nasod sa Israel. Giingnan sa Diyos si propetang Samuel: “Paadtoon ko ikaw kang Jese nga taga-Betlehem, tungod kay nagtagana ako taliwala sa iyang mga anak ug usa ka hari alang sa akong kaugalingon.” (Bersikulo 1) Wala hisgoti ni Jehova ang ngalan apan miingon lang nga ang iyang pinili maoy usa sa mga anak ni Jese. Sa pagpaingon ni Samuel sa Betlehem, lagmit siya naghunahuna, ‘Unsaon nako pagkahibalo kon kinsa sa mga anak ni Jese ang gipili ni Jehova?’
Pag-abot ni Samuel sa Betlehem, siya nag-andam ug usa ka halad nga pagaambitan ni Jese ug sa iyang mga anak nga lalaki. Sa dihang misulod ang kinamagulangan nga si Eliab, namatikdan dayon ni Samuel ang iyang talagsaong pagkaambongan. Gihunahuna ni Samuel nga angayan gayod si Eliab nga mahimong hari tungod sa iyang pamarog, ug siya nakaingon: “Tinong ang iyang dinihogan anaa na sa atubangan ni Jehova.”—Bersikulo 6.
Apan lahi ang panglantaw ni Jehova. Siya miingon kang Samuel: “Ayaw pagtan-aw sa iyang panagway ug sa gitas-on sa iyang barog, kay gisalikway ko siya.” (Bersikulo 7) Si Jehova wala magtan-aw sa katas-on ug kaambongan ni Eliab. Makita sa mga mata ni Jehova ang tanan ug siya nagtan-aw sa pangsulod nga pagkatawo diin makita ang tinuod nga katahom.
Si Jehova mipatin-aw kang Samuel: “Kay ang pagtan-aw sa tawo dili sama sa pagtan-aw sa Diyos, tungod kay ang tawo nagatan-aw sa makita sa iyang mga mata; apan alang kang Jehova, siya nagatan-aw sa kasingkasing.” (Bersikulo 7) Oo, ang kasingkasing—ang pangsulod nga pagkatawo, nga maoy tinubdan sa hunahuna, tinamdan, ug pagbati sa usa—mao ang hinungdanon kang Jehova. “Ang tig-usisa sa mga kasingkasing” nagsalikway kang Eliab—ingon man sa unom pa ka anak nga lalaki ni Jese kinsa gidala sa atubangan ni Samuel.—Proverbio 17:3.
Si Jese aduna pay usa ka anak nga lalaki, ang kinamanghoran nga si David, kinsa “nagpasibsib sa mga karnero.” (Bersikulo 11) Busa gipakuha si David gikan sa kapatagan ug gidala sa atubangan ni Samuel. Dayon giingnan ni Jehova si Samuel: “Barog, dihogi siya, kay mao kini siya!” (Bersikulo 12) Tinuod, si David maoy “usa ka batan-ong lalaki nga nindot ug mga mata ug ambongan ang panagway.” Apan ang iyang kasingkasing maoy nagpahimo kaniya nga inuyonan sa Diyos.—1 Samuel 13:14.
Ang kalibotan naghatag ug labawng pagtagad sa panggawas nga katahom, apan makapahupay ang pagkahibalo nga si Jehova wala magtan-aw sa panggawas nga panagway. Dili hinungdanon kaniya kon unsa ka taas ang imong pamarog o kon ang uban nag-isip ba kanimo nga guwapo o guwapa. Ang hinungdanon kang Jehova mao ang imong pangsulod nga pagkatawo, kon unsay anaa sa imong kasingkasing. Dili ba kini magtukmod kanimo sa pag-ugmad sa mga hiyas nga makapahimo kanimong matahom sa mga mata sa Diyos?