“Ang Imong Gingharian Mahimong Malig-on”
Pakigsuod sa Diyos
“Ang Imong Gingharian Mahimong Malig-on”
SA TIBUOK kasaysayan, daghang magmamando ang gipakanaog sa ilang puwesto. Ang uban wala na pilia pag-usab, samtang ang uban gipugos sa pagpapahawa. Komosta man sa bahin ni Jesu-Kristo, ang Hari sa langitnong Gingharian sa Diyos? Aduna bay makapugong kaniya sa pagmando ingong tinudlong Hari sa Diyos? Ang tubag makaplagan diha sa mga pulong ni Jehova ngadto kang Haring David sa karaang Israel, nga narekord sa 2 Samuel kapitulo 7.
Sa unang mga bersikulo niini, atong makat-onan nga si David mibatig grabeng kaulaw kay siya, nga usa lang ka tawhanong hari, nagpuyo sa nindot nga palasyo samtang ang arka sa Diyos anaa sa usa ka ordinaryong tolda. a Si David mipahayag sa iyang tinguha nga magtukod ug usa ka nindot nga balay, o templo, alang kang Jehova. (Bersikulo 2) Apan dili si David ang magtukod niana. Pinaagi kang propetang Natan, giingnan ni Jehova si David nga ang iyang anak maoy magtukod sa templo.—Bersikulo 4, 5, 12, 13.
Si Jehova natandog sa kinasingkasing nga tinguha ni David. Agig sanong sa debosyon ni David ug sumala sa Iyang katuyoan, ang Diyos nakigsaad kaniya nga Siya magpatunghag hari gikan sa kaliwat ni David nga magmando sa walay kataposan. Gipahayag ni Natan ang sinserong panaad sa Diyos kang David: “Ang imong balay ug ang imong gingharian mahimong malig-on hangtod sa panahong walay tino sa imong atubangan; ang imong trono matukod nga malig-on hangtod sa panahong walay tino.” (Bersikulo 16) Kinsa ang permanenteng Manununod niini nga pakigsaad—ang Usa nga magmando sa walay kataposan?—Salmo 89:20, 29, 34-36.
Si Jesus nga taga-Nasaret maoy kaliwat ni David. Sa pagpahibalo sa pagkatawo ni Jesus, ang usa ka manulonda miingon: “Ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Lucas 1:32, 33) Oo, ang pakigsaad sa Diyos uban kang David natuman kang Jesu-Kristo. Busa, siya magmando, dili pinaagi sa pagpili sa mga tawo kondili pinaagi sa sinserong panaad sa Diyos nga naghatag kaniyag katungod sa pagmando sa walay kataposan. Angay natong hinumdoman nga ang mga saad sa Diyos matuman gayod.—Isaias 55:10, 11.
Dunay duha ka hinungdanong leksiyon nga atong makat-onan sa 2 Samuel kapitulo 7. Una, kita makasalig nga walay makapugong kang Jesu-Kristo sa pagmando. Busa kita makaseguro nga iyang tumanon ang gipahayag nga katuyoan sa iyang pagmando, nga mao ang pagtuman sa kabubut-on sa Diyos alang sa yuta maingon sa langit.—Mateo 6:9, 10.
Ikaduha, kini nga asoy nagtudlo kanato sa makapatandog nga kamatuoran bahin kang Jehova. Hinumdomi nga nakita ug gipabilhan ni Jehova kon unsay anaa sa kasingkasing ni David. Makapadasig gayod nga si Jehova nagpabili sa atong masibotong pagsimba kaniya. Tungod sa pipila ka kahimtang nga dili nato kontrolado, sama sa problema sa panglawas o katigulangon, dili nato mahimo ang tanang gitinguha sa atong kasingkasing diha sa pag-alagad sa Diyos. Kon ingon niana ang atong kahimtang, hinaot nga mahupayan kita nga si Jehova nahibalo sa mga tinguha sa atong kasingkasing nga punog kasibot sa pagsimba kaniya.
[Footnote]
a Ang arka sa pakigsaad maoy usa ka sagradong kaban nga gipahimo ni Jehova ug gidisenyo mismo niya. Kini naghawas sa presensiya ni Jehova sa karaang Israel.—Exodo 25:22.