Kon Unsay Gitudlo ni Jesus Bahin sa Diyos

“Ang usa nga nakaila pag-ayo sa Amahan mao lamang ang Anak. Apan buot sa Anak nga suginlan ang uban bahin sa Amahan, aron nga sila makaila usab kaniya.”—LUCAS 10:22, CONTEMPORARY ENGLISH VERSION.

SA WALA pa matawo dinhi sa yuta ang panganayng Anak sa Diyos, siya kauban na sa iyang Amahan sulod sa taas kaayong panahon. (Colosas 1:15) Busa ang Anak nahibalo kaayo sa hunahuna, pagbati, ug sukdanan sa iyang Amahan. Sa ulahi, sa dihang kini nga Anak mianhi sa yuta ingong ang tawo nga si Jesus, siya interesado kaayo sa pagtudlo sa kamatuoran bahin sa iyang Amahan. Kita daghag makat-onan bahin sa Diyos pinaagi sa pagpamati sa kon unsay gisulti sa Anak.

Ngalan sa Diyos Ang balaang ngalan nga Jehova hinungdanon kaayo alang kang Jesus. Buot niining pinalanggang Anak nga mailhan ug gamiton sa uban ang ngalan sa iyang Amahan. Ang mismong ngalan ni Jesus nagkahulogang “Si Jehova Maoy Kaluwasan.” Sa gabii una siya mamatay, si Jesus miingon diha sa iyang pag-ampo kang Jehova: “Gipaila ko ang imong ngalan.” (Juan 17:26) Dili ikatingala nga gigamit ni Jesus ang ngalan sa Diyos ug gipaila kini ngadto sa uban. Siyempre, sa unsang paagi masabtan sa mga mamiminaw ni Jesus ang kamatuoran bahin kang Jehova kon sila dili mahibalo sa Iyang ngalan ug sa kahulogan niini? a

Dakong gugma sa Diyos Si Jesus kas-a miingon sa dihang miampo sa Diyos: ‘Amahan, . . . ikaw nahigugma kanako sa wala pa matukod ang kalibotan.’ (Juan 17:24) Kay nasinati ni Jesus ang gugma sa Diyos didto sa langit, iyang gipadayag ang talagsaong mga kinaiyahan sa maong gugma sa dinhi siya sa yuta.

Gipakita ni Jesus nga ang gugma ni Jehova dako kaayo. Si Jesus miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Ang Gregong pulong nga gihubad ug “kalibotan” wala magpasabot sa “yuta.” Sumala sa pagkagamit dinhi, kini nagpunting sa mga tawo—sa pagkatinuod, sa tanang tawo. Busa dako gayod ang gugma sa Diyos alang sa katawhan nga tungod niana iyang gihatag ang iyang pinalangga nga Anak aron ang mga tawong matinumanon maluwas gikan sa sala ug kamatayon ug makabatog kinabuhing walay kataposan. Dili nato masukod ang gilapdon ug giladmon sa dakong gugma sa Diyos.—Roma 8:38, 39.

Gipamatud-an ni Jesus ang usa ka makapadasig kaayong kamatuoran: Si Jehova nahigugma pag-ayo sa iyang mga magsisimba ingong indibiduwal. Si Jesus nagtudlo nga si Jehova samag usa ka magbalantay nga nag-isip sa matag usa sa iyang karnero ingong bililhon. (Mateo 18:12-14) Si Jesus miingon nga walay bisan usa ka goryon nga mahulog sa yuta nga dili mahibaloan ni Jehova. Si Jesus midugang: “Ang mismong mga buhok sa inyong ulo naihap ang tanan.” (Mateo 10:29-31) Kon mamatikdan ni Jehova ang pagkawala sa usa ka goryon gikan sa salag niini, dili ba labaw niyang mamatikdan ug mahalon ang matag usa sa iyang tawhanong magsisimba? Kon ang matag usa ka buhok sa atong ulo naihap ug namatikdan ni Jehova, nan duna bay bahin sa atong kinabuhi—atong mga panginahanglan, kalisdanan, ug mga gikabalak-an— nga dili niya mahibaloan?

Langitnong Amahan Sama sa atong nahisgotan sa miaging artikulo, si Jesus mao ang bugtong nga Anak sa Diyos. Busa dili ikatingala nga kining pinalanggang Anak sagad nagtawag kang Jehova ug naghisgot Kaniya ingong iyang “Amahan.” Gani, sa unang narekord nga mga pulong ni  Jesus nga iyang gisulti sa templo sa dihang siya 12 anyos pa lamang, iyang gitawag si Jehova ingong “akong Amahan.” (Lucas 2:49) Ang terminong “Amahan” makita halos 190 ka beses diha sa mga Ebanghelyo. Si Jesus nagtawag kang Jehova ingong “inyong Amahan,” “Amahan namo,” ug “akong Amahan.” (Mateo 5:16; 6:9; 7:21) Kay gitawag ni Jesus si Jehova niining paagiha, iyang gipakita nga ang makasasala ug dili-hingpit nga mga tawo mahimong makabaton ug suod nga relasyon sa iyang Amahan.

Maluluy-on ug andam nga mopasaylo Si Jesus nahibalo nga ang dili-hingpit nga mga tawo nagkinahanglan sa dagayang kaluoy ni Jehova. Sa iyang sambingay bahin sa anak nga mausikon, gitandi ni Jesus si Jehova sa usa ka mabination ug mapinasayloong amahan nga andam sa pagdawat ug balik sa iyang mahinulsolong anak. (Lucas 15:11-32) Busa ang mga pulong ni Jesus nagpasalig kanato nga ang gitan-aw ni Jehova mao ang kausaban sa tinamdan sa usa ka makasasalang tawo ug pinaagi niana pakitaan Niya siyag kaluoy. Si Jehova andam nga mopasaylo sa usa ka makasasalang tawo nga naghinulsol. “Ako magasulti kaninyo,” miingon si Jesus, “nga sa ingon adunay labaw nga kalipay sa langit tungod sa usa ka makasasala nga maghinulsol kay sa kasiyamag-siyam nga mga matarong nga wala magkinahanglan sa paghinulsol.” (Lucas 15:7) Kinsay dili gustong masuod sa maong maluluy-ong Diyos?

Tigpatalinghog sa mga pag-ampo Didto sa langit, sa wala pa moanhi si Jesus sa yuta, iya mismong nakita nga si Jehova mao ang “Tigpatalinghog sa pag-ampo” ug Siya nalipay sa mga pag-ampo sa iyang matinumanong mga magsisimba. (Salmo 65:2) Busa, panahon sa iyang ministeryo, gitudloan ni Jesus ang iyang mga mamiminaw kon unsaon sa pag-ampo ug kon unsay angayng iampo. “Ayaw balikbalika pagsulti ang samang mga butang,” siya mitambag. Iyang gidasig ang iyang mga mamiminaw nga iampo nga ang kabubut-on sa Diyos “matuman unta . . . , maingon sa langit, mao man usab sa yuta.” Makaampo usab kita alang sa pagkaon sa matag adlaw, sa kapasayloan sa atong mga sala, ug sa pagsukol sa tentasyon. (Mateo 6:5-13) Si Jesus nagtudlo nga si Jehova mosanong sa mga pag-ampo sa Iyang mga alagad sama sa usa ka amahan, ug motubag sa tim-os nga mga hangyo nga gihimo pinasukad sa pagtuo.—Mateo 7:7-11.

Dayag nga si Jesus naningkamot sa pagtudlo sa kamatuoran bahin kang Jehova ug kon unsang matanga siya sa pagka-Diyos. Apan duna pay laing butang bahin kang Jehova nga gustong itudlo ni Jesus—ang instrumento nga gamiton ni Jehova sa pagpahinabog tibuok-kalibotang kausaban aron matuman ang Iyang katuyoan sa yuta ug sa mga tawo nga nagpuyo niini. Sa pagkatinuod, kining bahina sa mensahe ni Jesus mao ang tema sa iyang pagsangyaw.

[Footnote]