Kon Unsay Gitudlo ni Jesus Bahin sa Gingharian sa Diyos

“Siya mipanaw gikan sa siyudad ug siyudad ug gikan sa balangay ug balangay, nga nagwali . . . sa maayong balita sa gingharian sa Diyos.”—LUCAS 8:1.

KITA gustong mohisgot sa mga butang nga hinungdanon kanato, sa mga butang nga atong gipabilhan. Si Jesus mismo miingon, “sa kadagaya sa kasingkasing ang baba mosulti.” (Mateo 12:34) Pinasukad sa mga butang nga gihisgotan ni Jesus panahon sa iyang ministeryo, makaingon gayod kita nga ang Gingharian sa Diyos bililhon kaayo kaniya.

Unsa ang Gingharian sa Diyos? Ang gingharian maoy usa ka gobyerno nga gimandoan ug hari. Busa ang Gingharian sa Diyos maoy gobyerno nga gitukod sa Diyos. Si Jesus subsob nga naghisgot bahin sa Gingharian sa Diyos, nga maoy tema sa iyang mensahe. Kapin sa 110 ka higayon nga ang Gingharian gihisgotan diha sa upat ka Ebanghelyo. Apan si Jesus wala lamang magtudlo pinaagig mga pulong. Ang mga butang nga iyang gibuhat daghag gitudlo bahin sa Gingharian sa Diyos ug kon unsay buhaton niini.

Kinsa ang Hari? Ang Hari sa Gingharian sa Diyos wala pilia pinaagi sa pagboto sa mga tawo. Hinunoa, kini nga Magmamando gipili mismo sa Diyos. Sa dihang nanudlo si Jesus, iyang gipadayag nga siya ang gipili sa Diyos nga mahimong Hari.

Si Jesus nahibalo nga ang Bibliya nagtagna nga ang sinaad nga Mesiyas magmando sa usa ka Gingharian nga dili gayod mapukan. (2 Samuel 7:12-14; Daniel 7:13, 14; Mateo 26:63, 64) Hinumdomi nga si Jesus dayag nga nagpaila sa iyang kaugalingon ingong ang gitagnang Mesiyas. Busa giangkon ni Jesus nga siya ang Hari nga gitudlo sa Diyos. (Juan 4:25, 26) Haom gayod nga sa pipila ka higayon iyang gigamit ang ekspresyon nga “akong gingharian.”—Juan 18:36.

Si Jesus nagtudlo usab nga siya adunay mga kauban sa pagmando sa Gingharian. (Lucas 22:28-30) Sila iyang gitawag nga “gamayng panon,” tungod kay limitado ra ang ilang gidaghanon. Bahin kanila siya miingon: “Giuyonan sa inyong Amahan ang paghatag kaninyo sa gingharian.” (Lucas 12:32) Ang kataposang basahon sa Bibliya nagpakita nga 144,000 ang hatagag pribilehiyo nga magmando kauban ni Kristo.—Pinadayag 5:9, 10; 14:1.

Diin nahimutang ang Gingharian? “Ang akong gingharian dili bahin niining kalibotana,” miingon si Jesus sa Romanong magmamando nga si Poncio Pilato. (Juan 18:36) Ang Gingharian sa Diyos ubos ni Kristo dili magmando pinaagig tawhanong mga hawas. Sublisubling gihisgotan ni Jesus ang Gingharian sa Diyos ingong “ang gingharian sa mga langit.” a  (Mateo 4:17; 5:3, 10, 19, 20) Busa, ang Gingharian sa Diyos maoy usa ka langitnong gobyerno.

Si Jesus nahibalo gayod nga siya mobalik sa langit human sa iyang temporaryong pag-estar sa yuta. Siya miingon nga siya “mag-andam ug dapit” didto alang sa iyang kaubang mga magmamando.—Juan 14:2, 3.

Unsay mapalampos sa Gingharian? Si Jesus nagtudlo sa iyang mga mamiminaw sa pag-ampo sa Diyos: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:9, 10) Ang kabubut-on sa Diyos ginatuman na didto sa langit. Ang Gingharian mao ang instrumento aron matuman ang katuyoan sa Diyos alang sa yuta. Sa pagpalampos niini, ang Gingharian mohimog dagkong kausaban dinhi sa yuta.

Unsay himoon sa Gingharian dinhi sa yuta? Si Jesus nagtudlo nga ang Gingharian sa Diyos magwagtang sa mga tawo nga padayong nagbuhat ug daotan. (Mateo 25:31-34, 46) Kana nagkahulogan nga mawala na ang tanang matang sa korapsiyon ug pagkadaotan. Si Jesus nagtudlo nga ang magpuyo unya sa yuta maoy mga tawo nga “malumog-buot,” matarong, maluluy-on, ‘putli ug kasingkasing,’ ug makigdaiton.—Mateo 5:5-9.

Ang maong matinumanong mga tawo magpuyo ba sa usa ka hugaw nga planeta? Dili gayod! Si Jesus nagsaad nga duna unyay dagkong kausaban sa yuta ubos sa pagmando sa Gingharian sa Diyos. Ang usa ka tawo nga gilansang tupad ni Jesus miingon: “Jesus, hinumdomi ako sa dihang moabot ka na sa imong gingharian.” Si Jesus mitubag: “Sa pagkatinuod ako magaingon kanimo karong adlawa, Ikaw makauban nako sa Paraiso.” (Lucas 23:42, 43) Oo, ang Gingharian sa Diyos maghimo sa tibuok yuta nga usa ka paraiso—sama sa kahimtang niadto sa tanaman sa Eden.

Unsa pay himoon sa Gingharian alang sa mga tawo? Si Jesus wala lang magsaad kon  unsay himoon sa Gingharian sa Diyos apan gipakita usab niya kana. Si Jesus mihimog daghang milagrosong pagpang-ayo ingong sampol kon unsay iyang buhaton sa dihang siya magmando na sa Gingharian. Ang Ebanghelyo nag-ingon bahin kang Jesus: “Milibot siya lukop sa tibuok Galilea, nga nagtudlo diha sa ilang mga sinagoga ug nagwali sa maayong balita sa gingharian ug nag-ayo sa tanang matang sa balatian ug sa tanang matang sa kaluyahon sa taliwala sa mga tawo.”—Mateo 4:23.

Si Jesus mihimog daghang matang sa pagpang-ayo. Iyang ‘gibuka ang mga mata sa usa ka tawo nga natawong buta.’ (Juan 9:1-7, 32, 33) Gihikap ni Jesus ang usa ka tawong may makaluod nga sakit nga sanla, ug siya naayo. (Marcos 1:40-42) Sa dihang gidala kang Jesus ang “usa ka tawong bungol ug may babag sa pagsulti,” iyang gipakita nga siya dunay gahom sa paghimo sa ‘mga bungol nga makadungog ug sa mga amang nga makasulti.’—Marcos 7:31-37.

Ang tinudlong Hari sa Diyos makawagtang pa gani sa kamatayon. Sa tulo ka okasyon, si Jesus nagbanhaw ug patay. Iyang gibanhaw ang bugtong nga anak sa usa ka babayeng balo, ang usa ka 12-anyos nga batang babaye, ug ang iyang minahal nga higalang si Lazaro.—Lucas 7:11-15; 8:41-55; Juan 11:38-44.

Sa paghubit sa nindot nga palaaboton sa mga sakop sa Gingharian sa Diyos, si Jesus mitagna pinaagi kang apostol Juan: “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 1:1; 21:3, 4) Handurawa—usa ka kalibotan nga wala nay kasub-anan, kasakit, ug kamatayon! Nianang panahona, ang pag-ampo nga ang kabubut-on sa Diyos matuman sa yuta sama didto sa langit bug-os nang matuman.

Kanus-a moabot ang Gingharian sa Diyos? Si Jesus nagtudlo nga ang pagsugod sa iyang pagmando ingong hari motakdo sa usa ka linaing yugto sa panahon nga iyang gitawag nga iyang “presensiya.” Si Jesus naghatag ug detalyadong tagna nga nagpaila kon kanus-a magsugod ang iyang presensiya ingong hari. Niini nga yugto sa panahon mahitabo ang tibuok-kalibotang kalisdanan, nga naglakip sa mga gubat, gutom, linog, kamatay, ug pag-uswag sa pagkamalinapason. (Mateo 24:3, 7-12; Lucas 21:10, 11) Kini ug ang uban pang mga tagna ni Jesus dayag nga nakita sukad sa 1914, ang tuig nga mibuto ang Gubat sa Kalibotan I. Busa, si Jesus nagmando na karon ingong Hari. Sa dili madugay moabot na ang Gingharian aron tumanon ang kabubut-on sa Diyos dinhi sa yuta. b

Sa unsang paagi makaapektar sa imong kinabuhi ang pag-abot sa Gingharian sa Diyos? Kana magdepende kon unsay imong sanong sa mensahe ni Jesus.

[Mga footnote]