Kon Unsay Gitudlo ni Jesus Bahin sa Iyang Kaugalingon

“Si Jesus nahibalo kaayo kon kinsa siya, kon diin siya gikan, kon nganong mianhi siya sa atong kalibotan, ug kon unsay iyang umaabot.”—MAGSUSULAT NGA SI HERBERT LOCKYER.

UNA kita makapasundayag ug pagtuo sa mga butang nga gitudlo ni Jesus, kinahanglan kitang makaila kaniya. Kinsa ba gayod si Jesus? Diin siya gikan? Unsay katuyoan sa iyang pag-anhi? Diha sa mga Ebanghelyo—Mateo, Marcos, Lucas, ug Juan—atong mahibaloan ang mga tubag gikan mismo kang Jesus.

Siya nagkinabuhi na sa wala pa matawo sa yuta Si Jesus kas-a miingon: “Sa wala pa maglungtad si Abraham, ako mao na.” (Juan 8:58) Si Abraham nabuhi mga 2,000 ka tuig una pa matawo ni Jesus. Bisan pa niana, si Jesus naglungtad na una pa mabuhi ang maong matinumanong patriarka. Apan diin nagkinabuhi si Jesus? “Ako nanaog gikan sa langit,” siya miingon.—Juan 6:38.

Ang Anak sa Diyos Si Jehova dunay daghang anak nga mga manulonda. Apan si Jesus lahi. Gihubit niya ang iyang kaugalingon ingong “bugtong nga Anak sa Diyos.” (Juan 3:18) Kana nga ekspresyon nagkahulogan nga si Jesus mao lamang ang direktang gilalang sa Diyos. Ang tanang ubang butang gilalang sa Diyos pinaagi sa iyang bugtong nga Anak.—Colosas 1:16.

“Ang Anak sa tawo” Kon itandi sa ubang ekspresyon, kini mas subsob nga gigamit ni Jesus sa pagtumong sa iyang kaugalingon. (Mateo 8:20) Busa iyang gipakita nga siya dili usa ka espiritung linalang nga nagsul-ob ug lawas sa tawo. Hinunoa, siya usa gayod ka tawo. Pinaagi sa balaang espiritu, gibalhin sa Diyos ang kinabuhi sa iyang Anak gikan sa langit nganhi sa yuta diha sa tagoangkan sa birhen nga si Maria. Ingong resulta, si Jesus natawo nga hingpit ug walay sala.—Mateo 1:18; Lucas 1:35; Juan 8:46.

Ang sinaad nga Mesiyas “Nahibalo ako nga ang Mesiyas moanhi,” miingon ang usa ka babayeng Samarianhon ngadto kang Jesus. Si Jesus mitubag: “Ako nga nakigsulti kanimo mao siya.” (Juan 4:25, 26) Sama sa pulong nga “Kristo,” ang pulong “Mesiyas” nagkahulogang “Usa nga Dinihogan.” Si Jesus gidihogan, o gitudlo sa Diyos, alang sa usa ka linaing papel aron matuman ang mga saad sa Diyos.

Ang iyang pangunang katuyoan sa pag-anhi Si Jesus kas-a miingon: “Kinahanglan nga . . . ipahayag ko ang maayong balita sa gingharian sa Diyos, tungod kay alang niini gipadala ako.” (Lucas 4:43) Bisan tuod siya mihimog daghang maayong butang alang sa mga tawong nanginahanglan, ang pagsangyaw bahin sa Gingharian sa Diyos mao ang iyang pangunang buluhaton. Kon unsa ang iyang gitudlo bahin sa maong Gingharian hisgotan sa ulahing mga artikulo.

Dayag nga si Jesus dili ordinaryong tawo. a Ingon sa ato unyang makita, ang iyang kinabuhi didto sa langit naghatag ug dugang kahulogan sa iyang gipamulong dinhi sa yuta. Busa dili gayod ikatingala nga ang mensahe nga iyang gisangyaw nakaapektar sa minilyon sa tibuok kalibotan.

[Footnote]