Among mga Magbabasa Nangutana . . .

Si Jesus ba mao si Miguel nga Arkanghel?

▪ Ang simpleng tubag maoy oo. Diha sa daghang kultura, naandan na nga ang usa ka tawo tawgon ug lainlaing ngalan. Ingon usab niana ang kahimtang sa pipila ka ngalan diha sa Bibliya. Pananglitan, ang patriarkang si Jacob ginganlan usab ug Israel. (Genesis 35:10) Si apostol Pedro adunay lima ka ngalan—Simeon, Simon, Pedro, Cefas, ug Simon Pedro. (Mateo 10:2; 16:16; Juan 1:42; Buhat 15:7, 14) Unsaon nato pagtino nga ang Miguel maoy laing ngalan ni Jesus? Tagda ang mosunod nga ebidensiya gikan sa Bibliya.

Ang Bibliya lima ka beses nga naghisgot sa gamhanang espiritung linalang nga si Miguel. Ang tulo niini makita diha sa basahon ni Daniel. Sa Daniel 10:13, 21, atong mabasa nga ang usa ka sinugo nga manulonda giluwas ni Miguel, kinsa gitawag nga “usa sa mga labawng prinsipe” ug “ang inyong prinsipe.” Dayon, sa Daniel 12:1, atong makat-onan nga sa panahon sa kataposan, “si Miguel mobarog, ang dakong prinsipe nga nagbarog alang sa mga anak sa imong katawhan.”

Ang lain pang paghisgot kang Miguel anaa sa Pinadayag 12:7, nga naghubit kang ‘Miguel ug sa iyang mga manulonda’ nga nakigsangka sa usa ka hinungdanong gubat nga miresulta sa pagpalayas kang Satanas nga Yawa ug sa iyang mga demonyo gikan sa langit.

Matikdi nga sa matag higayon nga gihisgotan si Miguel, siya gihubit ingong usa ka manggugubat nga manulonda kinsa nakig-away alang sa katawhan sa Diyos ug nanalipod kanila, ug nakigsangka pa gani sa kinalabwang kaaway ni Jehova nga si Satanas.

Sa Judas bersikulo 9, si Miguel gitawag nga “arkanghel.” Kining pulonga nagkahulogang “pangulong manulonda” o “pangunang manulonda,” ug diha sa Bibliya usa lang ang gihisgotang arkanghel. Ang usa pa ka teksto nga naghisgot sa pulong arkanghel mao ang 1 Tesalonica 4:16, diin gihubit ni Pablo ang nabanhawng si Jesus, nga nag-ingon: “Ang Ginoo [si Jesus] manaog gikan sa langit uban sa singgit sa pagsugo, uban sa tingog sa arkanghel ug uban sa trompeta sa Diyos.” Busa gipaila mismo niini nga si Jesu-Kristo mao ang arkanghel, o pangulong manulonda.

Pinasukad sa nahisgotan na, unsay atong ikahinapos? Si Jesu-Kristo mao si Miguel nga arkanghel. Kanang duha ka ngalan—Miguel (nagkahulogang “Kinsay Sama sa Diyos?”) ug Jesus (nagkahulogang “Si Jehova ang Kaluwasan”)—nagpaila sa iyang papel ingong pangunang tigpaluyo sa pagkasoberano sa Diyos. Ang Filipos 2:9 nag-ingon: “Ang Diyos nagbayaw kaniya [ang binanhawng si Jesus] ngadto sa usa ka labaw nga katungdanan ug malulotong naghatag kaniya sa ngalan nga labaw sa tanang uban pa nga ngalan.”

Angay natong tagdon nga ang pagkatawo ni Jesus dinhi sa yuta dili mao ang sinugdanan sa iyang kinabuhi. Sa wala pa matawo si Jesus, si Maria giduaw sa usa ka manulonda ug giingnan nga siya manamkon pinaagi sa balaang espiritu ug iyang nganlan ug Jesus ang bata. (Lucas 1:31) Panahon sa ministeryo ni Jesus, sagad siyang naghisgot nga siya nabuhi sa langit sa wala pa moanhi sa yuta.—Juan 3:13; 8:23, 58.

Busa si Jesus mao si Miguel nga arkanghel sa wala pa siya matawo sa yuta. Human siya mabanhaw ug mobalik sa langit, gipadayon ni Jesus ang iyang pag-alagad ingong si Miguel, ang pangulong manulonda, “alang sa kahimayaan sa Diyos nga Amahan.”—Filipos 2:11.