Tumotumo Batok Kamatuoran—Ang Kamatuoran Bahin Kang Jesus

UNSAY IMONG HUNAHUNA SA MOSUNOD NGA MGA PAHAYAG, KAMATUORAN O TUMOTUMO?

Si Jesus natawo sa Disyembre 25.

Sa dihang natawo si Jesus, siya giduaw sa tulo ka maalamong tawo.

Si Jesus walay mga igsoon.

Si Jesus mao ang Diyos nga nagpakatawo.

Si Jesus dili lang usa ka maayong tawo.

DAGHAN ang moingon nga husto ang tanang gihisgotan sa ibabaw. Ang uban tingali moingon nga lisod, o imposible pa gani, ang pagtino niana. Lagmit nagtuo sila nga basta duna lang kay pagtuo kang Jesus, dili na hinungdanon kon unsay tubag niana.

Apan lahi ang giingon sa Bibliya. Kini nagdasig kanato sa pagbatog “tukmang kahibalo sa atong Ginoong Jesu-Kristo.” (2 Pedro 1:8) Atong mabatonan ang maong kahibalo pinaagi sa pagsusi sa mga Ebanghelyo. Kini nagbutyag sa kamatuoran bahin kang Jesus, nga tungod niini atong maila ang matuod gikan sa bakak. Busa atong susihon kon unsay giingon sa mga Ebanghelyo maylabot sa mga pagtulon-an nga gihisgotan sa ibabaw.

PAGTULON-AN: Si Jesus natawo sa Disyembre 25.

KATEGORIYA: TUMOTUMO.

Wala hisgoti sa Bibliya ang bulan o adlaw nga natawhan ni Jesus. Nan, diin naggikan ang petsa nga Disyembre 25? Sumala sa The Encyclopædia Britannica, ang uban nga nag-angkong Kristohanon “mipili sa maong petsa aron iatol sa paganong pista sa mga Romano nga magsugod . . . sa winter solstice, sa dihang ang kahayag sa maadlaw moanam na usab ug kataas ug ang adlaw daw layo kaayo diha sa kalangitan.” Ang samang reperensiya nag-ingon nga daghang kostumbre sa Pasko naggikan sa “paganong  mga pangilin labot sa agrikultura ug sa adlaw panahon sa tingtugnaw.”

Mouyon kaha si Jesus nga saulogon ang iyang natawhan sa Disyembre 25? Tagda kini: Wala mahibaloi ang adlaw nga natawhan ni Jesus. Wala usab isugo sa Bibliya nga saulogon kini, ni adunay pamatuod nga ang unang mga Kristohanon nagsaulog niini. Sa kasukwahi, gihisgotan sa Bibliya ang eksaktong petsa sa kamatayon ni Jesus, ug iyang gisugo ang iyang mga sumusunod sa paghandom niini. a (Lucas 22:19) Dayag nga mas gusto ni Jesus nga pabilhan ang kahinungdanon sa iyang kamatayon ingong halad inay ang iyang pagkahimugso.—Mateo 20:28.

PAGTULON-AN: Sa dihang natawo si Jesus, siya giduaw sa tulo ka maalamong tawo (o mga hari, sumala sa ubang pagtuo).

KATEGORIYA: TUMOTUMO.

Tingali nakakita ka nag mga dibuho o Belen nga naghulagway sa masusong si Jesus diha sa pasungan, nga gilibotan sa tulo ka maalamong tawo nga nagdalag mga gasa. Apan kini nga hulagway maoy tumotumo, dili kamatuoran.

Tinuod nga dihay mga tawo gikan sa Sidlakan nga miduaw sa batang si Jesus. Apan kini nga mga bisita sa pagkatinuod maoy mga astrologo. (Mateo 2:1) Ug ila bang naabtan si Jesus diha sa pasungan? Wala; sila miduaw kaniya diha sa usa ka balay. Dayag nga sila miabot pipila na ka bulan human matawo si Jesus.—Mateo 2:9-11.

Pila ka tawo ang miduaw kang Jesus, 2, 3, o 30? Ang Bibliya walay giingon. Lagmit nga ang gituohang gidaghanon nga tulo gipasukad sa ilang tulo ka matang sa gasa. b (Mateo 2:11) Gituohan pa gani sa uban nga ang matag usa sa gitawag nga maalamong mga tawo naghawas sa lainlaing rasa sa katawhan. Apan kana nga ideya wala itudlo sa Bibliya. Hinunoa, sumala sa usa ka komentaryo sa Ebanghelyo, kini nga tinumotumong sugilanon minugna lamang sa “imahinasyon sa usa ka historyano sa ikawalong siglo.”

PAGTULON-AN: Si Jesus walay mga igsoon.

KATEGORIYA: TUMOTUMO.

Dayag nga gipakita sa mga Ebanghelyo nga si Jesus dunay mga manghod. Ang Ebanghelyo ni Lucas naghisgot kang Jesus ingong “panganay” ni Maria, nga nagpasabot nga si Maria sa ulahi nakabatog ubang mga anak. c (Lucas 2:7) Ang Ebanghelyo ni Marcos nagtaho nga ang ubang tawo sa siyudad sa Nasaret wala maglantaw kang Jesus nga labaw sa iyang mga igsoon. Sila nangutana: “Dili ba si Santiago, Jose, Judas, ug Simon iyang mga igsoon? Dili ba ang iyang mga igsoong babaye nagpuyo gihapon sa atong lungsod?”—Marcos 6:3, Contemporary English Version; Mateo 12:46; Juan 7:5.

Bisan pa sa giingon sa mga Ebanghelyo, daghang teologo nagtuo gihapon nga si Jesus walay mga igsoon. Ang uban nag-ingon nga ang gihisgotang mga igsoon ni Jesus sa pagkatinuod maoy iya konong mga ig-agaw. d Gihunahuna sa uban nga kini nga mga manghod maoy mga anak ni Jose sa laing babaye. Apan tagda kini: Kon si Jesus mao lang ang anak ni Maria, makasulti kaha niadto ang mga Nasaretnon? Sa kasukwahi, ang uban kanila lagmit nakakita sa mga pagmabdos ni Maria. Sila nahibalo gayod nga si Jesus maoy usa sa daghang anak ni Maria.

PAGTULON-AN: Si Jesus mao ang Diyos nga nagpakatawo.

KATEGORIYA: TUMOTUMO.

Ang ideya nga ang Diyos mianhi sa yuta ug nahimong tawo nga si Jesus, nga maoy dugokan sa doktrinang Trinidad, dugay na kaayong naglungtad—apan kini nga pagtuo wala pa  motungha sa panahong si Jesus dinhi sa yuta. Hinunoa, ang The Encyclopædia Britannica nag-ingon: “Ang pulong Trinidad ni ang pagtulon-an bahin niana dili makita sa Bag-ong Tugon . . . Ang doktrina inanayng miyuhot sulod sa kasiglohan ug miagig daghang kontrobersiya.”

Sa pagkatinuod, gipakaubos sa usa ka relihiyon si Jesus kon kini nagtudlo nga siya mao ang Diyos nga nagpakatawo. e Ngano man? Tagda kini nga ilustrasyon. Ang pipila ka empleyado dunay gihangyo sa ilang superbisor, apan iyang gisultihan sila nga wala siyay awtoridad sa pagtugot niana. Kon tinuod ang iyang gisulti, maalamong gipakita sa superbisor nga iyang giila ang iyang limitasyon. Kon dili tinuod ang iyang gisulti—kon siya makahimo sa pagtugot sa ilang gihangyo apan midumili lang—siya nanglimbong.

Nan, unsay sanong ni Jesus sa dihang duha sa iyang mga apostoles nagtinguhag taas nga posisyon? Iyang gisultihan sila: “Kining paglingkod sa akong tuong kamot ug sa akong wala dili akoa ang paghatag, kondili kini iya niadtong gitagan-an niini sa akong Amahan.” (Mateo 20:23) Kon si Jesus mao ang Diyos, dili ba kini pagpamakak? Hinunoa, pinaagi sa pagpasakop ngadto sa Usa nga mas dakog awtoridad, si Jesus naghatag ug maayong ehemplo sa pagkamakasaranganon—ug iyang gipakita nga siya dili tupong sa Diyos.

PAGTULON-AN: Si Jesus dili lang usa ka maayong tawo.

KATEGORIYA: KAMATUORAN.

Tataw nga gipahayag ni Jesus nga siya dili lang usa ka maayong tawo. Siya miingon: “Ako Anak sa Diyos.” (Juan 10:36) Tinuod, si bisan kinsa mahimong mangangkon nga siya Anak sa Diyos. Apan kon dili tinuod ang pangangkon ni Jesus, unsay atong ikasulti bahin kaniya? Siya usa gayod ka bakakon, dili usa ka maayong tawo!

Ang labing kasaligang pamatuod naggikan mismo sa Diyos. Duha ka higayon nga siya miingon bahin kang Jesus: “Kini mao ang akong Anak.” (Mateo 3:17; 17:5) Hunahunaa kini: Ang Bibliya nagtaho lag pipila ka hitabo nga ang tingog sa Diyos nadungog dinhi sa yuta—apan sa duha niini iyang gipahayag nga si Jesus maoy iyang Anak! Kini ang labing lig-ong pamatuod nga husto si Jesus sa iyang gipangangkon.

May nahisgotan ba kining artikuloha bahin kang Jesus nga wala nimo mahibaloi kaniadto? Kon mao, nganong dili nimo susihon ug dugang ang inspiradong mga Ebanghelyo? Kon imo kining buhaton, ikaw malipay ug makabenepisyo gayod. Sa pagkatinuod, si Jesus miingon nga ang pagkat-on sa kamatuoran bahin kaniya ug sa iyang Amahan “nagkahulogan ug kinabuhing walay kataposan.”—Juan 17:3.

[Mga footnote]

[Kahon/Hulagway sa panid 14]

Dugang Pang Kamatuoran nga Lagmit Makapahingangha Nimo

Unsay mga kinaiya ni Jesus? Siya ba estrikto kaayo ug walay pakabana sa uban mao nga dili siya makasabot sa ordinaryong mga tawo? Ang uban tingali motubag ug oo. Lagmit kanay hinungdan nga sila nahingangha nga si Jesus . . .

• mitambong ug malipayong mga okasyon.—Juan 2:1-11.

• midayeg sa uban.—Marcos 14:6-9.

• nalipay sa pagpakig-uban sa mga bata.—Marcos 10:13, 14.

• mihilak sa dayag.—Juan 11:35.

• mibatig kaluoy.—Marcos 1:40, 41.