Duna bay Gihimo ang Diyos?

“Nganong nagatindog ka sa halayo, Oh Jehova? Nganong nagtago ka sa mga panahon sa kasakit?”⁠ a​—⁠SALMO 10:1.

ANG mga balita karon nagpakita nga kita nagkinabuhi sa “mga panahon sa kasakit.” Ug kon kita na mismo ang mabiktima sa krimen, maaksidente, o mamatyan, kita tingali makapangutana, Nakita ba kini sa Diyos? Siya ba nagatagad kanato? Aduna ba gayoy Diyos?

Apan nakahunahuna ka ba nga basig sayop ang atong mga pagdahom bahin sa Diyos? Sa pag-ilustrar: Handurawa ang usa ka bata nga nasuko kay ang iyang papa milakaw aron motrabaho. Gimingaw kaayo siya sa iyang papa ug gusto niyang mopauli na siya. Gibati sa bata nga siya gipasagdan. Tibuok adlaw siyang nangutana, “Hain si Papa?”

Siyempre, sayop ang panghunahuna sa bata. Ang tinuod, nianang higayona nagtrabaho ang iyang amahan aron matagan-an ang pamilya. Busa, posible kaha nga sayop usab ang atong panghunahuna sa dihang kita moingon, “Hain ang Diyos”?

Pananglitan, gusto sa uban nga silotan dayon sa Diyos ang mga tawong nagbuhat ug daotan, o kaha gusto nila nga mora siyag Santa Claus nga manghatag ug regalo​—⁠sama sa trabaho, kapikas, o pagdaog sa lotto.

Ang maong panghunahuna nagpakita nga kon ang Diyos dili dayon mopahamtang ug hustisya o mohatag sa atong gipangayo, siya walay pagtagad sa atong mga kalisdanan ug sa atong mga panginahanglan. Apan dili kana tinuod! Niini mismong gutloa si Jehova nga Diyos dunay gihimo aron matagan-an ang panginahanglan sa tanang tawo, apan sa paagi nga lahi sa gidahom sa kadaghanan.

Kon mao, unsay gihimo sa Diyos? Sa pagtubag niana, atong balikan ang sinugdanan sa kasaysayan sa dihang ang relasyon sa tawo uban sa Diyos nadaot pag-ayo​—⁠apan mahimo pang ipasig-uli.

Makadaot nga Epekto sa Sala

Handurawa ang usa ka balay nga gusbat na sulod sa daghang tuig. Nahugno na ang atop, nangatangtang ang mga pultahan, ug nadaot ang gawas nga bahin niini. Kaniadto nindot kining balaya apan karon dili na. Kay grabe kaayo ang kadaot, dakong trabaho ang pagreper niini; dili kini mahimo sa usa lang ka adlaw.

Karon tagda ang kadaot nga nahitabo sa tawo mga 6,000 ka tuig kanhi sa dihang ang usa ka dili-makitang espiritu, si Satanas, nagtental kang Adan ug Eva sa pagrebelde sa Diyos. Sa wala pa kana mahitabo, ang unang magtiayon  hingpit ug panglawas ug may paglaom nga mabuhing walay kataposan uban sa ilang umaabot nga mga anak. (Genesis 1:28) Apan sa dihang sila nakasala, sama rag gidaot ni Adan ug Eva ang tanan nilang umaabot nga kaliwatan.

Dako kaayo ang epekto sa maong pagrebelde. Ang Bibliya nag-ingon: “Ang sala misulod sa kalibotan pinaagi sa usa ka tawo [si Adan] ug ang kamatayon pinaagi sa sala.” (Roma 5:12) Gawas nga ang sala nagpahinabog kamatayon, kini nagdaot usab sa atong relasyon sa Maglalalang ug nakaapektar kanato sa pisikal, mental, ug emosyonal. Ingong resulta, ang atong kahimtang maoy sama niadtong gusbat nga balay. Husto ang giingon sa matarong nga tawong si Job nga ang tawo “mubo ug kinabuhi ug tugob sa kasamok.”​—⁠Job 14:1.

Apan gipasagdan na ba sa Diyos ang mga tawo human makasala si Adan ug Eva? Wala gayod! Gani, sukad niadto ang atong langitnong Amahan dunay gihimo alang sa katawhan. Aron mas mapabilhan nato ang iyang gihimo alang kanato, tagda ang tulo ka butang nga gikinahanglan aron ayohon ang usa ka balay ug kon sa unsang paagi kini susama sa gihimo sa Diyos aron mapasig-uli ang tawo sa iyang kanhing kahimtang.

1 Human masusi ang gusbat nga balay, ang tag-iya kinahanglang modesisyon kon kini ba ayohon o gub-on.

Human gilayon sa pagrebelde didto sa Eden, gipahayag ni Jehova nga Diyos ang iyang katuyoan nga ipasig-uli ang katawhan. Iyang giingnan ang dili-makitang espiritu nga maoy utok sa rebelyon: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.”​—⁠Genesis 3:15.

Pinaagi niining mga pulonga, si Jehova nagsaad nga iyang laglagon ang nagpasiugda sa rebelyon sa Eden. (Roma 16:20; Pinadayag 12:9) Dugang pa, si Jehova mitagna nga motungha ang usa ka “binhi” nga maoy magluwas sa tawo gikan sa sala.⁠ b (1 Juan 3:8) Sa ingon gipadayag sa Diyos kon unsay iyang himoon: Inay paphaon, iyang ipasig-uli ang tawo sa iyang kanhing kahimtang. Apan kini nagkinahanglag panahon.

2 Ang arkitekto maghimog detalyadong plano kon unsaon pag-ayo ang balay.

Si Jehova nga Diyos naghatag sa mga Israelitas ug mga balaod ug nagdisenyo sa templo diin sila mosimba kaniya. Ang Bibliya nag-ingon: “Kanang mga butanga maoy landong sa mga butang nga moabot.” (Colosas 2:17) Sama sa usa ka plano, kini naghulagway ug mas labawng butang.

Pananglitan, ang mga Israelitas naghalad ug mga hayop aron mapasaylo ang ilang mga sala. (Levitico 17:11) Kini nagsimbolo sa mas dakong halad nga itanyag ginatos ka katuigan sa ulahi​—⁠usa ka halad nga makaluwas gayod sa mga  tawo.⁠ c Ang disenyo sa tabernakulo ug sa templo diin nagsimba ang mga Israelitas naghulagway kon unsay himoon sa Mesiyas, gikan sa iyang paghalad sa iyang kinabuhi diha sa kamatayon hangtod sa iyang pagkayab sa langit.​—⁠Tan-awa ang  tsart sa panid 7.

3 Magpili ug usa ka kontraktor nga mosunod sa plano ug moayo sa balay.

Si Jesus mao ang sinaad nga Mesiyas kinsa misunod sa sumbanan sa paghalad nga gihimo sa mga Israelitas ug mihatag sa iyang kinabuhi sa pagluwas sa mga tawo. Gani, si Juan nga Tigbawtismo nagtawag kaniya ingong “Kordero sa Diyos nga magakuha sa sala sa kalibotan.” (Juan 1:29) Kinabubut-ong gidawat ni Jesus ang maong asaynment. Siya miingon: “Ako nanaog gikan sa langit aron buhaton, dili ang akong kabubut-on, kondili ang kabubut-on niya nga nagpadala kanako.”​—⁠Juan 6:38.

Ang kabubut-on sa Diyos alang kang Jesus naglakip dili lamang sa “paghatag sa iyang kalag nga usa ka lukat baylo sa daghan” kondili sa paghimo usab ug pakigsaad uban sa iyang mga sumusunod alang sa usa ka Gingharian. (Mateo 20:28; Lucas 22:​29, 30) Kini nga Gingharian ang gamiton sa Diyos aron matuman ang iyang katuyoan alang sa katawhan. Ang mensahe bahin sa Gingharian sa Diyos gitawag nga “maayong balita” kay kini nagsaysay nga gitukod na sa Diyos ang usa ka gobyerno sa langit nga magmando sa yuta!​—⁠Mateo 24:14; Daniel 2:44.⁠ d

Ang Pagpasig-uli Nagpadayon

Una pa mokayab sa langit, gisugo ni Jesus ang iyang mga sumusunod: “Paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu . . . Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.”​—⁠Mateo 28:​19, 20.

Busa ang pagpasig-uli sa katawhan wala matapos sa dihang namatay si Jesus. Kini nagpadayon hangtod sa “kataposan sa sistema sa mga butang”​—⁠ang panahon nga ang Gingharian sa Diyos mosugod sa pagmando sa yuta. Kanang panahona mao na karon. Nahibalo kita niana tungod kay ang ilhanan nga gitagna ni Jesus bahin sa “kataposan sa sistema sa mga butang” nagakahitabo na.⁠ e​—⁠Mateo 24:3-14; Lucas 21:7-11; 2 Timoteo 3:1-5.

Karon, diha sa 236 ka nasod, gituman sa mga Saksi ni Jehova ang sugo ni Jesus nga isangyaw ang maayong balita sa Gingharian sa Diyos. Gani, katuyoan niining magasina nga tabangan ka nga makakat-on kon unsa ang Gingharian ug kon unsay himoon niini. Sa panid 2 sa matag gula sa Ang Bantayanang Torre, imong mabasa kini nga komento: “Kining magasina . . . magahupay sa mga tawo pinaagi sa maayong balita nga ang Gingharian sa Diyos, nga usa ka tinuod nga kagamhanan sa langit, hapit nang maglaglag sa tanang pagkadaotan ug maghimo sa yuta nga usa ka paraiso. Kini motabang sa mga tawo sa pagpalig-on sa ilang pagtuo kang Jesu-Kristo, kinsa namatay aron atong maangkon ang kinabuhing walay kataposan ug kinsa nagmando na karon ingong Hari sa Gingharian sa Diyos.”

Tinuod, makabalita gihapon ka karon ug pag-atake sa mga terorista o mga kalamidad, o basin ikaw mismo ang nakasinatig trahedya. Apan ang pagtuon sa Bibliya magkombinsir kanimo nga wala pasagdi sa Diyos ang mga tawo. Hinunoa, “siya dili halayo gikan sa matag usa kanato.” (Buhat 17:27) Ug siya motuman gayod sa iyang saad nga ipasig-uli kon unsay nawala sa atong unang ginikanan.​—⁠Isaias 55:11.

[Mga footnote]

 [Chart/Mga hulagway sa panid 7]

 (Alang sa aktuwal nga pagkahan-ay, tan-awa ang publikasyon)

Ang Gihulagwayan sa Tabernakulo

HALARAN

Ang pagkaandam sa Diyos sa pagdawat sa halad ni Jesus.—⁠HEBREOHANON 13:10-12.

HATAAS NGA SASERDOTE

Si Jesus.​—⁠HEBREOHANON 9:11.

1 Sa Adlaw sa Pagtabon-sa-Sala, ang hataas nga saserdote magtanyag ug halad alang sa sala sa mga tawo.​—⁠LEVITICO 16:​15, 29-31.

1 Sa Nisan 14, 33 C.E., gihalad ni Jesus ang iyang kinabuhi alang kanato.​—⁠HEBREOHANON 10:5-10; 1 JUAN 2:​1, 2.

BALAAN NGA DAPIT

Ang pagkainanak-sa-espiritu ni Jesus.​—⁠MATEO 3:​16, 17; ROMA 8:14-17; HEBREOHANON 5:4-6.

KORTINA

Ang unodnong lawas ni Jesus nga nag-ulang sa iyang yutan-on ug langitnong kinabuhi.​—⁠1 CORINTO 15:​44, 50; HEBREOHANON 6:​19, 20; 10:​19, 20.

2 Ang hataas nga saserdote moadto sa pikas bahin sa kortina nga nag-ulang sa Balaan ug sa Labing Balaan.

2 Human mabanhaw, si Jesus ‘miadto sa pikas bahin sa kortina’ pinaagi sa pagkayab sa langit “aron moatubang sa persona sa Diyos alang kanato.”​—⁠HEBREOHANON 9:24-28.

LABING BALAAN NGA DAPIT

Langit.​—⁠HEBREOHANON 9:24.

3 Sa dihang ang hataas nga saserdote anaa na sa Labing Balaan, iyang iwisik ang dugo sa gihalad nga mananap sa atubangan sa arka sa pakigsaad.​—⁠LEVITICO 16:12-14.

3 Pinaagi sa pagpresentar sa bili sa iyang giula nga dugo, gitagana ni Jesus ang tinuod nga pagtabon sa atong mga sala.​—⁠HEBREOHANON 9:​12, 24; 1 PEDRO 3:​21, 22.