Kon Unsay Atong Makat-onan Kang Jesus

Kon Unsaon Pagsunod si Kristo

Sa dihang ang mga tawo magpasundayag ug pagtuo kang Jesus, siya sagad moingon kanila: “Mahimong akong sumusunod.” (Mateo 9:⁠9; 19:21) Unsay buot ipasabot sa pagkahimong sumusunod ni Jesus o sa pagkahimong Kristohanon? Atong tagdon ang mga tubag sa tulo ka hinungdanong pangutana.

Unsaon nimo pagtratar ang uban?

▪ Ang tinun-an ni Jesus kinahanglang mosunod sa sugo kon unsaon pagtratar ang uban. Pananglitan, si Jesus miingon: “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” Komosta man kon dunay makapasuko kanimo? Si Jesus miingon: “Pakighusay sa madali uban sa usa nga nagasumbong batok kanimo.” Giingnan usab niya ang iyang mga sumusunod: “Kon kamo dili magapasaylo sa mga tawo sa ilang kalapasan, dili usab pasayloon sa inyong Amahan ang inyong kalapasan.”​—⁠Mateo 5:25; 6:15; 7:12.

Ang mga minyo gitambagan ni Jesus: “Nadungog ninyo nga kini giingon, ‘Dili ka manapaw.’ Apan ako magaingon kaninyo nga ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” Ang mga pagtulon-an ni Jesus angayng mogiya sa hunahuna ug kasingkasing sa usa ka tinuod nga Kristohanon.​—⁠Mateo 5:​27, 28.

Ang tinuod nga mga Kristohanon andam mosakripisyo alang sa uban. Si Jesus nagsakripisyo. Pananglitan, dihay panahon nga siya ug ang iyang mga apostoles gikapoy sa pagsangyaw ug wala na ganiy panahon nga mokaon. Busa, misakay silag sakayan ug gidala sila ni Jesus sa usa ka hilit nga dapit aron makapahulay. Apan ang mga tawo nakadungog kon asa siya paingon ug naunhan pa nila siya. Ang Bibliya nag-ingon: “Sa pagkawas, iyang nakita ang usa ka dakong panon sa katawhan, apan siya giabot ug kaluoy kanila, tungod kay sila nahisama sa mga karnero nga walay magbalantay. Ug siya misugod sa pagtudlo kanila ug daghang butang.” (Marcos 6:30-34) Imong masundog si Jesus pinaagi sa pagtuman sa sugo sa Diyos, bisan pa tingalig dili kana sayon buhaton.

 Nganong kinahanglan nimong isulti sa uban ang maayong balita?

▪ Gitudloan ni Jesus ang iyang mga sumusunod sa pagsangyaw sa maayong balita. Iyang giingnan ang mga apostoles: “Sa inyong pagpanglakaw, pagwali, nga magaingon, ‘Ang gingharian sa mga langit haduol na.’” (Mateo 10:7) Ang mensahe sa mga sumusunod ni Jesus hinungdanon kaayo. Si Jesus miampo: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos.”​—⁠Juan 17:3.

Gitagna ni Jesus ang usa ka buluhaton diin milyon-milyon sa iyang mga sumusunod ang makigbahin. Siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.” (Mateo 24:14) Kon nakakat-on ka na bahin sa Gingharian sa Diyos ug nagtuo sa giingon sa Bibliya, malipay ka gayod sa pagpaambit sa imong nakat-onan. Daghan sa mga sumusunod ni Jesus unang nakigsulti bahin sa Gingharian sa Diyos ngadto sa ilang mga paryente.​—⁠Juan 1:​40, 41.

Nganong kinahanglan kang magpabawtismo?

▪ Sa dihang si Jesus gibawtismohan sa suba sa Jordan, dayag nga siya miampo: ‘Ako mianhi sa pagbuhat sa imong kabubut-on, Oh Diyos.’ (Hebreohanon 10:7) Kon buot mong buhaton ang kabubut-on sa Diyos, kinahanglan ka usab nga magpabawtismo. Si Jesus nagsugo: “Paghimog mga tinun-an sa katawhan sa tanang kanasoran, nga magabawtismo kanila.”​—⁠Mateo 28:19.

Unsa ang mga responsabilidad ug benepisyo sa dihang ang usa mabawtismohan? Ang bawtismadong mga sumusunod ni Jesus nag-alagad sa Diyos sa tibuok nilang kalag. Gikutlo ni Jesus ang Balaod sa Diyos: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag.” (Mateo 22:37) Siya usab miingon: “Kon adunay buot mosunod kanako, padumilia siya sa iyang kaugalingon.” (Mateo 16:24) Ang bawtismo maoy simbolo nga gidumilian na sa usa ang iyang kaugalingon ug gitugyan kini ngadto sa Diyos. Kadtong nakabaton niining linain nga relasyon makahangyo sa Diyos nga hatagan sila ug hinlong tanlag.​—⁠1 Pedro 3:21.

Alang sa dugang impormasyon, tan-awa ang kapitulo 18 niining libroha, Unsay Tinuod nga Gitudlo sa Bibliya? nga gipatik sa mga Saksi ni Jehova.