Ang Kamatuoran Bahin sa Sala

MAPAMATUD-AN ba sa tawong gihilantan nga wala siyay hilanat kon iyang buakon ang thermometer? Siyempre dili! Sa susama, ang pagsalikway sa mga tawo sa panglantaw sa Diyos bahin sa sala wala magpasabot nga dili tinuod ang sala. Ang Pulong sa Diyos, ang Bibliya, daghag ikasulti bahin niana. Unsa ba gayod ang gitudlo niini bahin sa sala?

Ang Tanan Masipyat Gayod

Mga duha ka libo ka tuig kanhi, si apostol Pablo nagpahayag sa iyang kahigawad kay ‘ang maayo nga buot niyang buhaton dili niya mahimo, apan ang daotan nga dili niya gustong buhaton mao ang iyang ginabuhat.’ (Roma 7:19) Kon ato gayong susihon ang atong kaugalingon, makita nato nga ingon usab niana ang atong kahimtang. Tingali naningkamot kita sa pagsunod sa Napulo ka Sugo o sa uban pang sukdanan sa panggawi apan dili kalikayan nga kitang tanan masipyat. Kana wala magpasabot nga gituyo nato nga mosupak kondili kita huyang gayod. Ngano man? Si Pablo mismo ang mitubag: “Kon, karon, ang dili nako buot buhaton mao ang akong ginabuhat, ang usa nga nagabuhat niini dili na ako, kondili ang sala nga nagpuyo kanako.”—Roma 7:20.

Sama ni Pablo, ang tanang tawo dunay kahuyangan—pamatuod sa napanunod nga sala ug pagkadili-hingpit. “Ang tanan nakasala ug wala makaabot sa himaya sa Diyos,” miingon ang apostol. Unsay hinungdan niini? Si Pablo mipadayon: “Ang sala misulod sa kalibotan pinaagi sa usa ka tawo [si Adan] ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”—Roma 3:23; 5:12.

Daghan ang dili motuo nga ang pagpakasala sa atong unang ginikanan maoy hinungdan nga kita nahilayo sa Diyos ug nahimong dili hingpit. Apan sa pagkatinuod, mao kanay gitudlo sa Bibliya. Ang pagkutlo ni Jesus sa unang mga kapitulo sa Genesis nagpamatuod nga siya nagtuo sa asoy bahin kang Adan ug Eva.—Genesis 1:27; 2:24; 5:2; Mateo 19:1-5.

Ang usa sa importanteng mensahe sa Bibliya mao nga si Jesus mianhi sa yuta aron ang mga tawong nagpasundayag ug pagtuo kaniya tubson gikan sa sala. (Juan 3:16) Ang atong kaugmaon nagdepende sa atong pagdawat sa paagi ni Jehova sa pagluwas sa masinugtanong katawhan gikan sa kasal-anan. Apan, kon wala kita makasabot kon unsa ang sala sumala sa panglantaw sa Diyos, dili nato mapabilhan ang gitagana sa Diyos nga paagi sa pagluwas kanato.

Kon Nganong Hinungdanon ang Paghalad ni Jesus sa Iyang Kinabuhi

Si Jehova naghatag sa unang tawo sa kahigayonan nga mabuhi sa walay kataposan. Mawad-an lamang si Adan nianang nindot nga palaaboton kon siya morebelde sa Diyos. Si Adan mirebelde gayod mao nga siya nahimong makasasala. (Genesis 2:15-17; 3:6) Siya misupak sa kabubut-on sa Diyos, nahimong dili hingpit, ug nadaot ang iyang relasyon sa Diyos. Sa dihang siya nakasala tungod sa pagsupak sa balaod sa Diyos, inanay siyang natigulang ug namatay. Ikasubo, ang tanang kaliwat ni Adan—lakip kita—gipanganak nga makasasala ug sa ingon mamatay. Ngano man?

Simple lang ang katarongan. Ang dili-hingpit nga ginikanan dili makapatunghag hingpit nga mga anak. Ang tanang kaliwat ni Adan gipanganak nga makasasala, ug sumala sa giingon ni Pablo, “ang suhol nga ginabayad sa sala mao ang kamatayon.” (Roma 6:23) Apan ang ikaduhang bahin niana nga bersikulo naghatag kanatog paglaom: “Ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.” Sa ato pa, tungod sa paghalad ni Jesus sa iyang kinabuhi,  ang masinugtanong katawhan mahimo nang maluwas gikan sa mga epekto sa sala ni Adan. a (Mateo 20:28; 1 Pedro 1:18, 19) Unsay angay nimong sanong niana?

Ang Gugma ni Kristo Magpalihok Kanato

Ang maong pangutana gitubag ni apostol Pablo ubos sa paggiya sa Diyos. Siya misulat: ‘Ang gugma nga iya ni Kristo nagatukmod kanamo tungod kay mao kini ang among gikahukom, . . . ug siya namatay alang sa tanan aron sila nga nagakinabuhi magkinabuhi dili na alang sa ilang kaugalingon, kondili alang kaniya nga namatay alang kanila ug gibangon.’ (2 Corinto 5:14, 15) Kon nasabtan sa usa ka tawo nga ang paghalad ni Jesus sa iyang kinabuhi makapahigawas kaniya gikan sa mga epekto sa sala—ug buot niyang ipakita ang iyang apresasyon—kinahanglang maningkamot siya nga sundon kon unsay kabubut-on sa Diyos. Kini nagpasabot nga kinahanglang iyang sayron kon unsay mga balaod sa Diyos, bansayon ang iyang konsensiya sa mga sukdanan sa Bibliya, ug ipadapat kana diha sa iyang kinabuhi.—Juan 17:3, 17.

Ang daotang mga buhat makadaot sa atong relasyon kang Jehova nga Diyos. Sa dihang si Haring David nakaamgo nga dako kaayong sala ang iyang pagpanapaw kang Batseba ug pagpapatay sa iyang bana, siya mibatig tumang kaulaw. Apan ang iyang labawng gikagul-an mao nga iyang nasakit ang Diyos. Kay nagbasol pag-ayo, siya miampo kang Jehova: “Nakasala ako batok kanimo, kanimo lamang, ug nakabuhat ako sa butang nga daotan sa imong mga mata.” (Salmo 51:4) Sa susama, sa dihang si Jose gitental sa pagpanapaw, siya gitukbil sa iyang konsensiya: “Unsaon ko pagbuhat kining dakong pagkadaotan ug makasala gayod batok sa Diyos?”—Genesis 39:9.

Busa, ang sala dili lang ang pagbatig kaulaw kay nasakpan nga nakabuhat ug daotan. Kini dili lang ang kahadlok nga hukman sa ubang tawo o manubag sa balaod tungod kay duna kay nalapas. Sa pagkatinuod, ang pagsupak sa balaod sa Diyos bahin sa sekso, pagkamatinud-anon, pagtahod, pagsimba, ug uban pa, makadaot sa atong relasyon kaniya. Kon gibatasan nato ang pagbuhat ug sala, kita mahimong  kaaway sa Diyos. Kining butanga angay gayong palandongon.—1 Juan 3:4, 8.

Busa unsay nahitabo sa sala? Ang tinuod, wala kini mausab. Gibansagan lang kini sa mga tawo ug lainlaing termino aron dili kaayo bug-at paminawon. Daghan ang nagbalewala sa ilang konsensiya o kaha kini gikubalan na. Apan ang tanan nga gustong pahimut-an ang Diyos kinahanglang molikay niana nga tinamdan. Sumala sa atong nasayran, ang sala dili lang moresultag kaulawan kondili kamatayon. Kini naglangkit mismo sa atong kinabuhi.

Ikalipay nga kita mapasaylo pinaagi sa halad ni Jesus kon kita kinasingkasing nga maghinulsol sa atong mga sala ug dili na mobuhat niana. “Malipayon kadtong kansang mga kalapasan gipasaylo ug kansang mga sala gitabonan na,” misulat si Pablo. “Malipayon ang tawo kansang sala dili gayod pagaisipon ni Jehova.”—Roma 4:7, 8.

[Footnote]

[Kahon/Hulagway sa panid 10]

Usa ka Pagtulon-an nga Giwala

Kadaghanang Katoliko wala makasabot sa pagtulon-an bahin sa Limbo. Sa miaging mga dekada, kini inanayng nawala—hangtod nga wala na kini iapil diha sa katekismo. Ug niadtong 2007, kini bug-os nang giwala sa simbahang Katoliko. Ang ilang opisyal nga dokumento naghisgot nga dunay “mga katarongan base sa teolohiya ug liturhiya nga ang mga batang mamatay nga wala mabunyagi may paglaom nga mahilangit ug makadangat sa walay kataposang himaya.”—International Theological Commission.

Nganong giwala kini nga pagtulon-an? Ang usa ka hinungdan maoy aron makalingkawas ang simbahan sa gitawag sa kolumnista sa France nga si Henri Tincq nga “usa ka bug-at nga pagtulon-an.” Matod pa niya, kini “gidepensahan sa Simbahan sukad pa sa katuigan sa 1100 hangtod sa ika-20ng siglo ug gigamit sa paghadlok sa mga ginikanan aron pabunyagan dayon nila ang ilang mga anak.” Apan ang pagkawala niini nga pagtulon-an nagpatunghag laing mga isyu.

Gipasukad sa Bibliya o sa Tradisyon? Base sa kasaysayan, ang pagtulon-an bahin sa Limbo mitungha sa katuigan sa 1100 tungod sa mga debate bahin sa purgatoryo. Ang simbahang Katoliko nagtudlo nga ang kalag magpabiling buhi human sa kamatayon, busa kinahanglang dunay dapit alang sa kalag sa mga batang wala mabunyagi kay sila dili man mahilangit ug dili usab angayang maimpiyerno. Kanay hinungdan nga mitungha ang pagtulon-an bahin sa Limbo.

Apan ang Bibliya wala magtudlo nga ang kalag magpabiling buhi human sa kamatayon. Hinunoa, kini tin-awng nag-ingon nga ang kalag nga makasala “malaglag” ug “mamatay.” (Buhat 3:23; Ezequiel 18:4, Douay-Rheims Version) Sanglit ang kalag mamatay, nan walay dapit nga gitawag ug Limbo. Dugang pa, ang Bibliya nag-ingon nga ang patay walay panimuot, samag natulog.—Ecclesiastes 9:5, 10; Juan 11:11-14.

Gipakita sa Bibliya nga giisip sa Diyos nga balaan ang gagmayng anak sa Kristohanong mga ginikanan. (1 Corinto 7:14) Kining mga pulonga walay pulos kon kinahanglan pang bunyagan ang mga bata aron maluwas.

Sa pagkatinuod, ang pagtulon-an bahin sa Limbo maoy dako nga insulto sa Diyos, kay imbes mailhan siya ingong matarong ug mahigugmaong Amahan, siya nahimo na hinuong mangtas nga tigsilot sa inosenteng mga bata. (Deuteronomio 32:4; Mateo 5:45; 1 Juan 4:8) Kanay hinungdan kon nganong kini nga pagtulon-an, nga wala itudlo sa Bibliya, dili dalawaton alang sa tinuod nga mga Kristohanon!

[Mga hulagway sa panid 9]

Ang pagkinabuhi subay sa mga sukdanan sa Pulong sa Diyos moresultag maayong relasyon sa Diyos ug sa isigkatawo