Nausab na ba ang Atong Panglantaw sa Sala?

KANIADTO, ang manimba kanunayng makadungog ug wali bahin sa gitawag nga “pito ka mortal nga sala”—kaulag, kaulitan, kahakog, pagkatapolan, kasuko, kasina, ug garbo. Kasagaran, hisgotan sa magwawali ang silot sa sala ug awhagon ang iyang mamiminaw sa paghinulsol. “Karon,” matod sa usa ka magsusulat, “ang kadaghanang wali dili na maghisgot sa mga butang nga makapakonsensiya sa mamiminaw kondili sa mga butang nga makapahimuot kanila.”

Ang mga kolumnista usab nakamatikod niana. Ania ang pipila sa ilang mga komento:

▪ “Ang karaang panglantaw bahin sa sala, paghinulsol, ug kapasayloan dili na popular, ug ang makapahupay nga mga mensahe bahin sa paghigugma ug pagsalig sa kaugalingon mao nay popular.”—Star Beacon, Ashtabula, Ohio.

▪ “Ang mga tawo daw dili na mahadlok nga makasala.”—Newsweek.

▪ “Kita dili na interesado sa kon unsay gisugo sa Diyos, kondili sa kon unsay ikahatag sa Diyos kanato.”—Chicago Sun-Times.

Sanglit ang mga tawo lainlaig tinuohan ug kagikan, dili kono maayo nga imong hukman ang moral nga sukdanan sa uban. Mas makasala pa kono ka kon imo kanang himoon. Busa, ang panghunahuna sa mga tawo karon mao: ‘Buhata lang kon unsay gituohan nimong husto, apan ayaw kana ipugos sa uban. Niining atong panahon, ang mga tawo magkalahig sukdanan nga gisunod. Walay tawong makaingon nga siya ray nasayod kon unsay husto. Ang sukdanan sa uban husto ra usab.’

Tungod niini nga pangatarongan, nausab ang tinamdan sa mga tawo. Wala na nila isipa ang sala ingong seryosong butang. Gani, ang pagpuyopuyo, pagpanapaw, ug homoseksuwalidad komon na kaayo.

Walay duhaduha nga nausab na ang panglantaw sa mga tawo kon unsay “husto” ug kon unsay “sala.” Apan nganong nausab ang tinamdan sa mga tawo? Unsa nay panglantaw karon bahin sa sala? Ug hinungdanon ba kon unsay imong panglantaw bahin niini?