Sulat Gikan sa South Africa

“Nganong Nanghunong man Sila Dinhi?”

“DELIKADO NGA LUGAR—DAGHANG TULISAN UG PAMPAM.” Kini ang karatula sa daplin sa gamayng dalan nga among gihunongan. Dihay pipila ka sakyanang nagparking ubos sa usa ka dakong karatula nga nagtudlo sa dalan paingon sa sosyal nga suroyanan nga dunay casino. Gilabyan mi sa mahalong mga kotse ug among namatikdan diha sa nawong sa mga sakay niini ang katingala, nga mora bag nangutana: ‘Nganong nanghunong man sila dinhi?’

Nanaog mi ug miduyog sa desenteg besti nga mga tawong nagpasilong sa karatula. Ang among grupo lainlaig rasa—butang nga hangtod karon talagsa rang makita sa South Africa. Kining dapita maoy mga 100 kilometros amihanan-kasadpan sa Johannesburg. Kami mianhi aron ipaambit sa mga molupyo ang kamatuoran sa Bibliya.

Diha sa daplin sa dalan naghisgot mi kadiyot ug usa ka teksto sa Bibliya ug naghimog mga kahikayan sa pagpamalaybalay. Nag-ampo mi ug namalik sa among mga kotse. Makita sa layo ang mga balay ug payag nga dili maayong pagkaplastar. Gagmay kining tan-awon tungod kay dunay nagbuntaog nga mga biya sa minahan sa platinum duol niini. Pobre kaayo ang mga tawo dinhi, bisan tuod ug dunay dako kaayong minahan sa minerales.

Kauban namo sa akong asawa ang usa ka magtiayong taga-Germany, ug kaming upat namalaybalay nianang buntaga. Mga 30 porsiyento sa mga molupyo dinhi walay trabaho, busa pinobre kaayo ang ilang pinuy-anan. Daghan niini maoy mga payag-payag lang. Gani ang kalo-kalo sa dagkong lansang sa mga atop nga sin gama lang sa gipipi nga tansan sa beer.

Diha sa matag balay manuktok mi sa geyt, ug sagad ang misis maoy moatubang namo. Ang mga tawong among maestorya interesadong maminaw sa among mensahe, ug espesyal kaayo ang ilang pag-abiabi kanamo. Tungod sa naglagiting nga kainit sa adlaw, daw hurno ang sulod sa balay mao nga sagad sugoon ang mga bata sa pagdala sa mga lingkoranan ilalom sa kahoy aron didto kami molingkod.

Ang tibuok pamilya magtapok ug maglingkod sa mga bangkito o kahon. Bisan ang mga batang nagduladula sa ilang hinimo-himong mga dulaan panawgon aron maminaw. Amo silang basahan ug mga teksto sa Bibliya ug pabasahon ang ubang bata sa binase-sa-Bibliya nga mga publikasyon. Halos tanan nga among nakaestorya malipayong midawat sa among  mga basahon, ug daghan ang gustong magpabalik.

Pagkaudto, nangaon mig sandwich nga giparisag bugnawng ilimnon ug dayon among gibalikan ang mga tawong among giadtoan sa miagi namong pagsangyaw. Ang una namong giduaw mao si Jimmy, nga taga-Malawi ug trabahante sa usa sa mga minahan ug platinum dinhi. Pipila na ka bulan namo siyang ginaduaw. Siya malipay sa dihang makakita kanamo, ug mogugol mig taas nga panahon sa paghisgot sa Bibliya. Ang asawa ni Jimmy maoy usa ka nitibong Setswana ug siya dunay duha ka buotang anak. Wala namo siya makita sa miagi namong pagduaw busa naghinamhinam mi nga mangomosta kaniya.

Pag-abot namo sa gamayng balay ni Jimmy, namatikdan dayon namo nga dunay problema. Sagbot kaayo ang lagwerta, nangalaya na ang iyang tanom nga mais, ug nawala na ang mga manok nga mangakha diha sa tugkaran. Ang pultahan sa iyang balay gikadenahan. Miduol kanamo ang iyang silingan ug amo siyang gipangutana kon asa si Jimmy. Nakurat mi sa iyang gibalita: Patay na si Jimmy, ug ang iyang pamilya mipauli sa ginikanan sa iyang asawa.

Giisip nila nga dili maayong pamatasan ang pagsukitsukit, apan nangutana mig pipila ka detalye. “Namatay siya tungod sa sakit,” matod pa sa iyang silingan. “Daghan nag sakit karon mao nga daghan ang nangamatay.” Bisag wala siyay giingon nga espesipikong sakit, kay dili nila kana gustong hisgotan, ang nagkadaghang pantiyon sa sementeryo maoy makasubong pamatuod nga tinuod ang gisulti sa babaye. Gisaysayan namo siya bahin sa paglaom sa pagkabanhaw, ug mibiya mi paingon sa sunod namong giduaw nga medyo bug-at ang among dughan.

Miadto mi sa laing baryo, didto sa kataposang laray sa mga balay duol sa dakong bungdo sa mga biya sa minahan. Mihunong mi sa tumoy sa kalsada. Tataw kaayo ang mga letra nga gipintal sa bato diha sa lagwerta, “Ang paglangan-langan sa pagdesisyon makahurot ug panahon.” Si David, a nga maoy nagsulat niana, milili samtang nag-ayo sa makina sa iyang karaang Volkswagen. Nasulawan siya sa dan-ag sa milingay na nga adlaw, apan pwerte niyang ngisi sa dihang nakita mi niya, ug migilak ang bulawang bansil sa iyang ngipon. Nanarapo siya sa iyang kamot ug miduol kanamo.

“Komosta na mo!” matod niya. “Diin mo gikan?” Nalipay mi nga nakita siya pag-usab. Nangayo siyag dispensa nga dili kaayo siya makatagad kanamo kay talilakaw na siya paingon sa minahan. Iyang naestorya kanamo nga nakakita siyag trabaho human sa among miaging pagduaw. Bibo ang among panaghisgot ug wala gayod mawala ang pahiyom sa iyang nawong. “Nausab ang akong kinabuhi sukad nga nasangyawan ko ninyo!” malipayon siyang misugilon. “Sa tinuod lang, wala ko mahibalo kon unsa nay nahitabo kanako kon wala ko kamo makaila.”

Miluag na ang among dughan pagbiya namo kang David. Talisalop na ang adlaw sa dihang kami mibiyahe pauli. Sa kataposang higayon milingi mi sa mga balay, ug medyo dulom na ang palibot. Naghunahuna mi kon sa unsang paagi kaha mahatdan sa maayong balita ang tanang tawo niining dapita. Nakita gayod namo kon unsa ka tinuod ang giingon ni Jesus: “Dako ang alanihon, apan diyutay ang mga mamumuo.”—Lucas 10:2.

[Footnote]

[Picture Credit Line sa panid 17]

Kind permission given by the South African Post Office