“Sa Maunongon Ikaw Magmaunongon”
Pakigsuod sa Diyos
“Sa Maunongon Ikaw Magmaunongon”
DILI matukib ang kasakit nga bation sa dihang pakyason o luiban kita sa tawong atong gisaligan. Sagad kining mahitabo niining mabudhiong kalibotan. (2 Timoteo 3:1-5) Duna bay usa nga atong kasaligan nga dili gayod moluib kanato? Atong tagdon ang asoy ni Haring David sa karaang Israel.
Grabeng pagluib ang iyang naagoman. Bisag walay sala, siya gigukod ug gustong patyon sa nasinang si Saul, ang unang hari sa Israel. Ang asawa ni David nga si Mikal, wala magpabiling maunongon sa iyang bana, kay ‘iyang gitamay si David sulod sa iyang kasingkasing.’ (2 Samuel 6:16) Si Ahitopel, ang sinaligang magtatambag ni David, mitraydor ug miduyog sa pagrebelde batok kaniya. Ug kinsay utok niini nga rebelyon? Way lain kondili ang anak mismo ni David, si Absalom! Tungod niining tanan, nawad-an ba siyag pagsalig sa uban ug mibati nga wala na gayoy mounong kaniya?
Ang tubag makaplagan diha sa mga pulong ni David sa 2 Samuel 22:26. Si David, nga usa ka tawong lig-on ug pagtuo, mihubit kang Jehova diha sa usa ka awit: “Sa maunongon ikaw magmaunongon.” Kombinsido si David nga bisag pakyason siya sa uban, si Jehova mounong gayod kaniya.
Susihon pa natog dugang ang giingon ni David. Ang Hebreohanong pulong nga gihubad ug “maunongon” mahimo usab hubaron nga “pagpakitag mahigugmaong-kalulot.” Ang tinuod nga pagkamaunongon gipasukad sa gugma. Tungod sa gugma ni Jehova, dili gayod niya biyaan ang mga maunongon kaniya. a
Matikdi usab nga ang pagkamaunongon dili lang basta pagbati; kini makita sa buhat. Si Jehova nagpasundayag ug pagkamaunongon, sama sa nasinati mismo ni David. Sa malisod kaayong mga yugto sa kinabuhi sa matinumanong hari nga si David, siya gitabangan ni Jehova pinaagi sa pagpanalipod ug paggiya kaniya. Si David mapasalamaton kang Jehova sa pagluwas kaniya ‘gikan sa kamot sa tanan niyang kaaway.’—2 Samuel 22:1.
Unsay atong makat-onan sa mga pulong ni David? Si Jehova walay pagkausab. (Santiago 1:17) Siya motuman gayod sa iyang mga saad ug dili motipas sa iyang mga sukdanan. Sa laing salmo, si David misulat: “Dili niya [Jehova] pagabiyaan ang mga maunongon kaniya.”—Salmo 37:28.
Gipabilhan ni Jehova ang atong pagkamaunongon. Gipabilhan usab niya ang atong pagkamasinugtanon, ug siya nag-awhag kanato sa pagsundog kaniya nga magmaunongon sa uban. (Efeso 4:24; 5:1) Kon atong ipasundayag ang pagkamaunongon sama kang Jehova, makasalig kita nga siya dili gayod mobiya kanato. Bisag pakyason kita sa uban, kita makaseguro nga si Jehova magmaunongon kanato, nga magtabang kanato sa pagsagubang sa bisan unsang pagsulay. Dili ka ba gustong mas masuod pa kang Jehova, “ang Usa nga maunongon”?—Pinadayag 16:5.
[Footnote]
a Ang 2 Samuel 22:26 samag ideya sa Salmo 18:25. Ang usa ka bersiyon sa Bibliya naghubad niana nga salmo: “Ikaw mahigugmaon sa tawong maunongon Kanimo.”—The Psalms for Today.