Among mga Magbabasa Nangutana . . .

Unsay Panglantaw sa mga Saksi ni Jehova Bahin sa Interfaith o Panag-uban sa Lainlaing Relihiyon Diha sa Pagsimba?

▪ Sumala sa World Christian Encyclopedia, dunay mga “10,000 ka lainlaing relihiyon sa tibuok kalibotan.” Sanglit ang panagbangi sa mga relihiyon miresultag grabeng kasamok, daghang tawo ang naghunahuna nga makatabang ang interfaith. Sila nagtuo nga kini makapatunghag kalinaw ug panaghiusa niining nabahinbahin nga kalibotan.

Ang panaghiusa gidasig sa Bibliya. Si apostol Pablo nagtandi sa Kristohanong kongregasyon sa lawas sa tawo, nga ang matag usa “takdo nga pagkadugtong ug gihimong magtambayayongay.” (Efeso 4:16) Si apostol Pedro nagdasig usab sa iyang mga isigkamagtutuo: “Kamong tanan magbaton ug samang panghunahuna.”—1 Pedro 3:8.

Ang unang mga Kristohanon nagkinabuhi taliwala sa lainlaing kultura ug relihiyon. Apan, sa dihang si Pablo misulat bahin sa panagtapo sa lainlaing relihiyon, siya miingon: “Aduna bay bahin ang tawong matinuohon uban sa usa ka dili-magtutuo?” Dayon iyang gipasidan-an ang mga Kristohanon sa ‘paggula gikan sa ilang taliwala.’ (2 Corinto 6:15, 17) Dayag nga si Pablo supak sa interfaith. Ngano man?

Gipatin-aw sa apostol nga ang panag-uban sa matuod nga Kristohanon ug sa dili matuod nga Kristohanon diha sa pagsimba maoy dili timbang nga pagyugo, o dili haom. (2 Corinto 6:14) Makadaot kini sa pagtuo sa usa ka Kristohanon. Ang kabalaka ni Pablo mahimong itandi sa kabalaka sa usa ka amahan kinsa nahibalo nga ang ubang bata sa silingan dili maayog kinaiya. Ingong mahigugmaong ginikanan, iyang pilion kon kinsa lang ang angayng ikadula sa iyang anak. Lagmit ang uban dili makaangay sa iyang desisyon. Apan kana manalipod sa iyang anak batok sa daotang impluwensiya. Sa susama, si Pablo nahibalo nga ang pagkahimong bulag gikan sa ubang relihiyon manalipod sa mga Kristohanon gikan sa daotang mga buhat.

Ang baroganan ni Pablo mao usab ang baroganan ni Jesus. Si Jesus ang kinalabwang panig-ingnan sa pagpasiugdag kalinaw, apan siya wala mag-apil-apil sa interfaith. Daghang grupo sa relihiyon, sama sa mga Pariseo ug mga Saduseo, ang aktibo sa panahon ni Jesus. Kini nga mga sekta nagkahiusa sa pagsupak kang Jesus ug nagplano pa gani sa pagpapatay kaniya. Busa, gisugo ni Jesus ang iyang mga sumusunod sa ‘pagbantay batok sa pagtulon-an sa mga Pariseo ug sa mga Saduseo.’—Mateo 16:12.

Komosta sa atong panahon? Mapadapat pa ba ang pasidaan sa Bibliya bahin sa interfaith? Oo. Ang nagkasumpaking mga pagtulon-an dili mahiusa pinaagig interfaith, sama ra nga dili magsagol ang lana ug tubig diha sa usa ka sudlanan. Pananglitan, kon ang mga tawo sa lainlaing relihiyon mag-uban sa pag-ampo alang sa kalinaw, kinsa nga diyos ang ilang ampoan? Ang Trinidad ba nga Diyos sa Kakristiyanohan? Si Brahma sa mga Hindu? Si Budha? O uban pang diyos?

Ang propetang si Miqueas nagtagna nga “sa kaulahiang bahin sa mga adlaw,” ang mga tawo gikan sa tanang kanasoran moingon: “Umari kamo, ug manungas kita ngadto sa bukid ni Jehova ug ngadto sa balay sa Diyos ni Jacob; ug siya magatudlo kanato bahin sa iyang mga dalan, ug kita magalakaw sa iyang mga alagianan.” (Miqueas 4:1-4) Ang resulta niini maoy kalinaw ug panaghiusa sa tibuok kalibotan, dili tungod sa panagtapo sa tanang relihiyon, kondili tungod sa pagdawat sa tanang tawo sa usa ka matuod nga relihiyon.

[Hulagway sa panid 27]

Mga membro sa dagkong relihiyon sa kalibotan panahon sa interfaith conference niadtong 2008

[Credit Line]

REUTERS/Andreas Manolis