Ang Bibliya Makabag-o sa Kinabuhi

UNSAY nakatabang sa usa ka nag-inusarang ginikanan sa Russia nga mabuntog ang iyang pagkaadik sa droga ug masuod sa iyang mga anak? Unsay nakatabang sa usa ka tawong naglatagaw sa kadalanan sa Kyoto, Japan, nga mabuntog ang iyang kahuyangan nga maoy nakaingon sa iyang kakabos? Sa unsang paagi nahunong sa usa ka bakero sa Australia ang iyang pagkapalainom? Atong susihon kon unsay ilang giingon.

“Kinahanglan Kong Manginabuhi Aron Tagan-an ang Akong Kaugalingon.”—NELLY BAYMATOVA

EDAD: 45

NASOD: RUSSIA

KANIADTO: ADIK SA DROGA

KAAGI: Nagdako ko sa Vladikavkaz, ang kaulohan sa Republic of North Ossetia (karon Alania). Arangan ang among pamilya apan dili ko malipayon. Pag-edad nakog 34, kaduha na ko naminyo nga pulos pakyas. Napulo ka tuig kong naadik sa droga ug kaduha gi-rehab. Duha ang akong anak, apan wala koy gugma nila; wala sab koy maayong relasyon sa akong mga higala ug pamilya.

Ang akong inahan nahimong Saksi ni Jehova, ug kanunay nako siyang madunggan nga maghilak ug mag-ampo kang Jehova nga tabangan ko. Naghunahuna ko: ‘Pataka ra man ni si Mama! Unsaon god tawon ni Jehova pagtabang nako?’ Misulay ko nga mohunong sa pagdroga. Pero kulang kog determinasyon. Dihay panahon nga wala ko makadroga sulod sa duha ka adlaw. Kay gusto kong mogawas sa balay, miambak ko sa bentana. Ang nakaapan kay naa ko sa ikaduhang andana. Nabali ang akong bukton ug bitiis ug nabun-og ang akong likod. Kapin sa usa ka bulan kong naglubog sa banig.

Samtang nagpaayo ko, giatiman ko sa akong inahan ug wala gyod ko niya kasab-i. Nakasabot siya nga niadtong higayona wala sa maayong kondisyon ang akong hunahuna ug emosyon. Hinuon, binlan ko niyag mga magasing Pagmata! a duol sa akong higdaanan. Gibasa ko kadtong tanan ug nainteres ko sa akong nabasa. Busa, nakadesidir ko nga magtuon sa Bibliya uban sa mga Saksi.

GIBAG-O SA BIBLIYA ANG AKONG KINABUHI: Ang usa ka butang nga akong nakat-onan sa Bibliya mao ang pagkahimong responsable. Imbes magpabuhi sa akong Mama, kinahanglan kong manginabuhi aron tagan-an ang akong kaugalingon ug ang akong mga anak. Dili kana sayon para nako kay wala ko maanad nga manarbaho.

Nakatabang usab kanako ang tambag sa Deuteronomio 6:5-7, nga tudloan sa mga ginikanan  ang ilang mga anak bahin sa Diyos. Nakaamgo ko nga manubag diay ko sa Diyos sa akong paagi sa pagpadako sa akong mga anak. Busa, naggugol kog panahon uban kanila ug naningkamot nga pakitaan silag gugma.

Mapasalamaton kaayo ko kang Jehova nga gihatagan ko niyag kahigayonan nga makakat-on bahin kaniya. Busa akong gipahinungod ang akong kinabuhi kaniya ug nagpabawtismo ingong Saksi ni Jehova.

MGA KAAYOHAN NGA AKONG NABATONAN: Tungod kay nabuntog na nako ang akong kahuyangan nga daling masuko, nasuod na mi ni Mama. Nasuod na sab ko sa akong mga anak.

Kay ako nakakat-on sa pagdumot sa panggawi nga wala uyoni sa Diyos, daghan sa akong kanhing mga problema nawala na. Karon, malipayon kaayo ko sa pagtabang sa uban nga makakat-on sa kamatuoran bahin sa atong mahigugmaong Diyos nga si Jehova.

“Naluwas Gayod ang Akong Kinabuhi.”—MINORU TAKEDA

EDAD: 54

NASOD: JAPAN

KANIADTO: NAGLATAGAW SA KADALANAN

KAAGI: Nagdako ko sa siyudad sa Yamaguchi uban ni Papa ug ni Lola. Wala ko makaila sa akong Mama. Sa dihang nag-edad kog 19, namatay si Lola, ug duha na lang mi ni Papa sa balay. Kosinero ko, ug ingon usab niana ang trabaho ni Papa. Lainlain ang among eskedyul sa trabaho mao nga halos dili mi mag-abot sa balay. Wala koy laing gihimo kondili magtrabaho ug mag-inom-inom uban sa akong barkada.

Kadugayan gipul-an ko sa akong trabaho. Misukol ko sa akong amo ug misamot pa ang akong bisyo sa pag-inom. Sa ulahi, sa hapit na kong mag-30 anyos, mihawa ko sa balay ug mipuyo sa laing lugar. Sa nahurot na ang akong kuwarta, mitrabaho ko sa sugalan. Diha koy nakaila nga babaye ug nagminyo mi. Apan nagbulag mi paglabay lang sa duha ka tuig ug tunga.

Nawad-an kog gana sa kinabuhi ug naputos sa utang. Gisibatan nako ang mga naningil kanako ug mipuyo kadiyot uban sa akong amahan, apan namakak ko niya mao nga nadaot ang among relasyon. Ako siyang gikawatan ug mibalik ko sa pagpanugal. Natilok ang akong kuwarta ug mipuyo ko sa estasyonan sa tren. Mibalhin ko sa Hakata, dayon sa Himeji, ug sa ulahi sa siyudad sa Kyoto. Naglatagaw ko sa kadalanan sulod sa pipila ka tuig.

GIBAG-O SA BIBLIYA ANG AKONG KINABUHI: Niadtong 1999, didto ko sa usa ka parke duol sa Kamogawa River sa Kyoto sa dihang giduol ko sa duha ka babaye. Ang usa kanila nangutana, “Gusto ka bang magtuon sa Bibliya?” Akong gidawat ang ilang tanyag. Gidumalahan kog pagtuon sa Bibliya sa hamtong nga mga Kristohanon sa usa ka kongregasyon sa mga  Saksi ni Jehova ug ilang gipasabot kanako nga hinungdanon ang pagpadapat sa mga prinsipyo niini. Sila misugyot nga mangita kog trabaho ug balayng kapuy-an. Aron malipay sila, nangaplay kog trabaho. Sa sinugdanan wala ra kaayo ko maningkamot, apan sa ulahi miampo ko alang sa tabang ug naninuod na sa pagpangita mao nga nakatrabaho ra gyod ko.

Ang pag-ampo nakatabang usab kanako sa pagsagubang sa malisod kaayong problema. Natultolan ko sa akong giutangan ug ila kong gisingil. Naguol kaayo ko. Usa ka adlaw niana, akong nabasa ang Isaias 41:10. Nianang tekstoha, ang Diyos nagsaad sa iyang matinumanong mga alagad: “Ako sa pagkatinuod magatabang kanimo.” Ang maong saad nakapalig-on kanako. Nagkugi ko sa pagtrabaho mao nga sa ulahi nabayran nako ang akong mga utang. Sa tuig 2000, nagpabawtismo ko ingong usa sa mga Saksi ni Jehova.

MGA KAAYOHAN NGA AKONG NABATONAN: Ang akong nakat-onan sa Bibliya nagpalihok kanako nga mangayog pasaylo sa akong amahan, ug iya kong gipasaylo sa akong daotang binuhatan kanhi. Nalipay siya nga nakakat-on ko sa pagkinabuhi sumala sa sukdanan sa Bibliya. Naluwas gayod ang akong kinabuhi kay akong gipadapat ang mga prinsipyo niini.

Dugang pa, kay nakatrabaho na ko, ako nang natagan-an ang akong panginahanglan. (Efeso 4:28; 2 Tesalonica 3:12) Nakakaplag usab kog tinuod nga mga higala sulod sa Kristohanong kongregasyon. (Marcos 10:29, 30) Ako kinasingkasing nga nagpasalamat kang Jehova tungod sa iyang pagtudlo kanako.

“Dili Sayon ang Paghimog mga Kausaban.”—DAVID HUDSON

EDAD: 72

NASOD: AUSTRALIA

KANIADTO: PALAINOM

KAAGI: Ako ang ika-11 nga anak sa akong ginikanan nga si Willie ug Lucy. Nagpuyo mi sa Aurukun, usa ka komunidad sa mga Aborigine sa amihanang bahin sa Queensland. Ang Aurukun nahimutang duol sa nindot nga Archer River ug kini duol usab sa dagat. Gitudloan mi sa among ginikanan sa pagpangayam ug pagpangisda. Niadtong panahona, ang gobyerno mao ang nagdumala sa kuwarta namong mga Aborigine, ug gitugotan kami sa pagpuyo diha lamang sa usa ka espesipikong dapit.

Ang akong ginikanan naningkamot pag-ayo nga tudloan mi sa akong mga igsoon ug maayong pamatasan, pagtahod sa mga edaran, ug pagkamanggihatagon bisan pa sa among kapobrehon. Tungod niana, among giisip ang mga hamtong ingong among amahan, inahan, uyoan, ug iyaan.

Si Papa namatay pag-edad nakog siyete, ug namalhin mi sa usa ka komunidad sa mga  Aborigine sa Mapoon, nga mga 150 kilometros amihanan sa Aurukun. Pag-edad nakog 12, nakakat-on ko sa pag-atiman ug kabayo ug baka, ug nahimo kong bakero hangtod nag-edad kog 40 kapin. Dili maayo ang akong pagkinabuhi. Palainom ko mao nga nahisugamak ko sa daghang problema.

Kas-a nahubog ko ug paggawas nako sa hotel nabanggaan ko. Duha ka tuig kong nagpatambal ug wala na ko makabalik sa akong trabaho.

GIBAG-O SA BIBLIYA ANG AKONG KINABUHI: Sa panahon nga nagpatambal ko, gidad-an ko sa akong amiga ug magasin nga Bantayanang Torre ug Pagmata! Apan dili kaayo ko makamaong mobasa kay mubo ra kog grado. Usa ka adlaw niana, giduaw ko sa usa ka tigulang nga 83 anyos. Kay init kaayo, gipadayon nako siya ug gipainom ug tubig. Gibinlan ko niyag mga basahon nga naghisgot bahin sa Bibliya ug nangutana siya kon pwede siyang mobalik aron hisgotan ang unod niana. Sa ngadtongadto, regular na ming nagtuon sa Bibliya. Nakita nako nga kinahanglan nakong bag-ohon ang akong personalidad ug paagi sa pagkinabuhi aron akong mapahimut-an ang Diyos.

Dili sayon ang paghimog kausaban. Apan tungod sa pagmatuto ni Mama kanako, gitahod nako pag-ayo ang tigulang nga nagtudlo kanako sa Bibliya ug gipabilhan ang iyang pagpatin-aw niana. Apan ako nagpanuko sa pagpahinungod sa akong kinabuhi ngadto sa Diyos. Naghunahuna ko nga kinahanglan una nakong makat-onan ang tanang gitudlo sa Bibliya.

Apan, gitabangan ko sa akong kauban sa trabaho nga matul-id ang akong panghunahuna. Usa siya ka Saksi ni Jehova, ug iyang gibasa kanako ang Colosas 1:9, 10. Kana nag-ingon nga kita kinahanglang “molambo sa tukmang kahibalo sa Diyos.” Gipasabot niya kanako nga walay kinutbanan ang pagkat-on, busa dili nako angayng tugotan ang kakulang sa kahibalo sa pagpugong kanako nga moalagad sa Diyos.

Nakadayeg ko sa mga Saksi ni Jehova ilabina sa dihang nakig-uban ko nila. Nakita nako ang mga tawo nga lainlaig kultura nga nagkahiusa sa pagsimba sa Diyos. Busa ako nakombinsir nga akong nakaplagan ang matuod nga relihiyon, ug niadtong 1985 nagpabawtismo ko ingong Saksi ni Jehova.

MGA KAAYOHAN NGA AKONG NABATONAN: Miuswag ang akong katakos sa pagbasa, ug karon naggugol kog daghang oras matag semana sa pagtabang sa uban nga makabasa ug makakat-on sa Bibliya. Dugang pa, ang akong amiga nga maoy unang naghatag kanakog Bantayanang Torre ug Pagmata! nagtuon usab sa Bibliya uban sa mga Saksi ni Jehova, nagpabawtismo, ug nahimong akong asawa. Kaming duha malipayon kaayong nagtabang sa uban diha sa komunidad sa mga Aborigine sa pagkat-on bahin kang Jehova nga Diyos.

[Footnote]

[Blurb sa panid 21]

Kami sa akong asawa malipayon kaayo sa pagtabang sa uban diha sa komunidad sa mga Aborigine sa pagkat-on bahin sa Diyos