Kon Unsay Atong Makat-onan Kang Jesus

Kon sa Unsang Paagi Magmalipayon

Unsay sekreto sa kalipay?

▪ Gihisgotan ni Jesus ang kalipay sa introduksiyon sa iyang gibantog nga wali: “Malipayon kadtong mahunahunaon sa ilang espirituwal nga panginahanglan.” (Mateo 5:3) Unsay iyang gipasabot? Unsa ang atong espirituwal nga panginahanglan?

Aron mabuhi, kinahanglan kitang moginhawa, moinom, ug mokaon, sama sa mga mananap. Apan aron magmalipayon, kita dunay panginahanglan nga wala sa mga mananap—ang panginahanglan nga masabtan ang katuyoan sa kinabuhi. Ang Maglalalang mao lamang ang makatagana sa maong panginahanglan. Busa, si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4) Malipayon kadtong mahunahunaon sa ilang espirituwal nga panginahanglan tungod kay sila masuod kang Jehova, ang “malipayong Diyos,” ug siya maghatag kanilag paglaom—nga gikinahanglan aron magmalipayon.—1 Timoteo 1:11.

Sa unsang paagi si Jesus naghatag ug paglaom?

▪ “Malipayon ang mga malumog-buot, sanglit sila magapanunod sa yuta,” si Jesus miingon. (Mateo 5:5) Gihatagan ni Jesus ug paglaom ang mga tawo pinaagi sa pag-ayo sa mga masakiton ug pagbanhaw sa patay. Gipaambit usab niya ang mensahe sa paglaom. Siya miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Kadtong nagsunod sa sugo sa Diyos makatagamtam ug kinabuhing walay kataposan dinhi sa yuta. Mahanduraw ba nimo nga mopuyo uban sa mga tawong malumo ug dili na matigulang? Dili ikatingala nga ang Bibliya nag-ingon: “Magmaya diha sa paglaom.” (Roma 12:12) Si Jesus naghisgot usab kon sa unsang paagi kita magmalipayon karon.

 Unsa ang malipayong paagi sa pagkinabuhi nga gitudlo ni Jesus?

▪ Si Jesus naghatag ug praktikal nga tambag bahin sa pagpakiglabot sa uban, kaminyoon, pagkamapaubsanon, ug hustong panglantaw sa materyal nga mga butang. (Mateo 5:21-32; 6:1-5, 19-34) Ang pagpadapat sa tambag ni Jesus motabang kanimo nga magmalipayon.

Ang usa magmalipayon usab kon siya manggihatagon. (Buhat 20:35) Pananglitan, si Jesus miingon: “Sa dihang maghikay ka ug usa ka kombira, dapita ang mga tawong kabos, mga baldado, mga bakol, mga buta; ug magmalipayon ka, tungod kay wala silay ikabalos kanimo.” (Lucas 14:13, 14) Magmalipayon ka kon imong unahon ang kalipay sa uban inay ang imong kaugalingong kalipay.

Unsay makahatag ug kinalabwang kalipay?

▪ Ang pagpahimuot sa uban makapalipay, apan labaw nang makapalipay ang pagpahimuot sa Diyos. Labaw pa kana sa kalipay nga bation sa ginikanan nga mapasigarbohon sa ilang anak. Napadayag kana sa usa ka hitabo sa dihang si Jesus nagtudlo sa mga tawo. “Usa ka babaye gikan sa panon sa katawhan mipatugbaw sa iyang tingog ug miingon kaniya: ‘Malipayon ang tagoangkan nga nagsabak kanimo ug ang mga suso nga imong gisusohan!’ Apan siya miingon: ‘Dili, hinuon, Malipayon kadtong nagapatalinghog sa pulong sa Diyos ug nagasunod niini!’”—Lucas 11:27, 28.

Si Jesus mismo mibatig katagbawan ug kalipay sa pagbuhat sa kabubut-on sa iyang langitnong Amahan. Kabubut-on sa Diyos nga ang mga tawo makadungog bahin sa paglaom sa kinabuhing walay kataposan. Kas-a, human ipatin-aw ni Jesus kini nga paglaom ngadto sa usa ka interesado, siya miingon: “Ang akong pagkaon mao ang pagbuhat sa kabubut-on niya nga nagpadala kanako.” (Juan 4:13, 14, 34) Magmalipayon ka usab kon imong pahimut-an ang Diyos pinaagi sa pagpaambit sa kamatuoran sa Bibliya ngadto sa uban.

Alang sa dugang impormasyon, tan-awa ang kapitulo 1 niining libroha, nga gipatik sa mga Saksi ni Jehova.

[Hulagway sa panid 16]

Ang tinuod nga kalipay matagamtam kon atong tagbawon ang atong panginahanglan nga masabtan ang katuyoan sa kinabuhi